Yakamish Piur pa Nfalang

Paul tatuku ukweta an aad ulondin anch: “Kupwa kwa kukandam kwa usey wa yom mwi ngand yetu, yakudia yakepa ni yapandakana usey. Twilonga mu mulong asaa avud, pakwez yakudia yapwa kurutu nilanda. Antu auma nakash mulong wa nzal, ni amwing alengumoka. Usey wa maswir ma pakampwil wakaninika kushik mu ma miliyon mavud. Kupwa, nfalang ja mwi ngand yetu jakepa usey. Nashadisha kont wam wa bank, nfalang jam ja kwinkwash anch mar majim mankwat, ni ja pasion.”

Paul wijika anch, chakwel dijuku diend dipanda, wafanyina kusadil “manangu makin.” (Jinswir 3:21) Urumburil anch: “Nading nij mudimu wa kasu ka nzembu, pakwez nitiya mudimu wawonsu nafanyina kutan, ap anch wading wa makut makemp. Antu amwing anfuta yakudia ap yom ya usey ya mu chikumbu. Pinalandang sabang munying, nasadilanga mwaad ni nalandishanga mukwau. Napita an a nzol 40. Papamau, nayilandisha ni nalanda kand akwau 300. Kupwa, naswimpisha anzol 50 ku mifuku ya wung wa kabak ma kilo 50. Kusutil ku mifuku ya wung yiney, nadisha dijuku diam ni majuku makwau kand mu chisu chilemp.”

Paul wading kand wij anch chom cha usey nakash chafanyinay muntu mwawonsu kusal chidi kumuchingejin Nzamb. Anch twasal yom yitwitinay Nzamb, ukutukwash. Pa mulong wa kwikal nich yom ya kumujimbu, Yesu walonda anch: “Kangal wanengananany; mulong . . . Tatukwen wij kal anch, ukwetany kuswir kwa yom yiney.”​—Luka 12:29-31.

Cha ushon, Satan, mukankuny mujim wa Nzamb, uyidimbining antu avud a pa mangand ndond yawonsu chakwel ipana nakash ku yom ya kumujimbu mu mwom wau. Antu akat kwinan nakash piur pa maswir mau makin ni kwitongin, ni akat kwiyakamish mulong wa kwikal ni yom yikwetau nich kuswir nakash. Antu avud akat kusondam, ni kwilej mu mutapu uyimp anch “mwin kusondam ukat kwikal muswik wa mwin kumusondjik.”​—Jinswir 22:7.

Antu amwing akat kukwat mipak yiyimp. Paul ulondin anch “Amutej avud akat kusha majuku mau ni kuyilamat arund nau mulong wa kukimb ‘mashakamin mawamp.’” “Amwing akat kuya mwi ngand yindjing pakad ap kwitenchik ap pakad chitongijok cha kuman mudimu. Yisu yivud akat kuyijingam ampurish ni kulal mu ma balibal ap pol. Kakatap kumushil Nzamb chisu cha kuyikwash. Pakwez, ku ukwash wa Nzamb, tudandamedin kurish pamwing mu dijuku ni milong ya nfalang.”

LONDULANY CHIYUL CHA YESU

Paul ulondin kand anch: “Yesu walonda anch: ‘kangal wiyakamishany mulong wa diamashik, mulong diamashik niyau dikwet yakamish yau. Dichuku ni dichuku dikwet kal mar mau mawanyidina.’ Chawiy lel, malembil mam ma pichuku pichuku mading kwau anch Nzamb ‘Itwinkisha lel unou yakudia yetu ya nlel’ chakwel twikala ni mwom. Ni watukwasha kamu, mudi mwakanay Yesu. Yisu yawonsu tukatap kutambul yom tuswirikedining. Dichuku dimwing, nading niminy mu mulong, pakad kwijik yom yadingau kulandish. Pinashika kurutu, namana anch wading yaourt. Nadingap nikatina yaourt. Pakwez yaourt winou wading yakudia, mulong twamudia uchuku winiwa. Nikat kumujikitish Nzamb yisu yawonsu, mulong dijuku diam dialalap ni nzal pa chirungu chinicha.”a

“Chiswapeling kuman yom ya kuland pakwez nfalang jikatap kumekan yisu yawonsu. Pakwez kutongin pa yom ya usey twileja mulong wa kurish nich yakamish kwatukwasha kumuchingejin Nzamb. Yehovab ukutukwash yisu yawonsu anch twadandamen kusal rusot rend. Twamana kuwanyin kwakin kwa Kuseng 34:8 ulondina anch: ‘Pakany bil, chakwel umanany anch Yehova uwapin; wayuk kwend muntu ukata kwikangil mwi ndiy.’ Mudi chibudikin, tukwetap kand wom wa kurish nich yakamish piur pa nfalang.”

“Twijik kal katat nawamp anch yom yikwetau nich antu kuswir, yidiap mudimu ap nfalang, pakwez yakudia. Tuchingejin nakash kamu chisu chikuwanyina kushilamu kwa Nzamb kudia anch: ‘Kukwikal mbut jivud mwi ngand.’ Nlel unou, anch tukwet ‘yakudia ni yakudjal, tukwikal ni musangar mulong wa yom yiney.’ Bibil utukasikeshin anch: ‘Kangal ris ra nfalang rakuyikelany, pakwez sangarany nich yom yiukwetanya. Mulong Nzamb amwinend walonda anch: “Kinikukushap, kinikez kukulikap chikupu.” Chawiy mwamu niyetu tukutwish kulond patok, wakad wom, anch: “Nsalejam, ndiy mwin kwinkwash, kinikez kwovap wom.”’”c

Chikasikeshin ritiy anch ‘twend pamwing ni Nzamb’ mudi mwasalay Paul ni dijuku diend. (Disambishil 6:9) Ap anch tukwetap katat nfalang ap anch tukujiburen kurutu oku, chilakej cha ritiy cha Paul ni manangu makin yitufundishin malejan ma usey nakash.

Pakwez, ov, chidi nchik anch milong ya dijuku dietu yituletidin yakamish?