Mulong wak Nzamb uyilikidil antu akweta usu ayimesha mar akad usu?

Bibil ukwet jinsangu jimwing jiyimp jilejena mutapu wadingau antu ayimp akweta usu kuyimesh antu akad usu mar. Tushinshikinany chilakej cha Nabot.a Akab, mwant wa Isarel mu yitot dikum ya mivu K.C.C., wamulikidila mukajend, Jezabel, kumujipeshish Nabot ni anend chakwel atambula chir chend cha nviny. (1 Ant 21:1-16; 2 Ant 9:26) Mulong wak Nzamb wayilikidila ant kusadil usu wau nayimp?

Tushinshikinany diyingish dimwing dia usey dilondina anch: Nzamb kakutwishap kudimban. (Titus 1:2) Chom ik chafanyinay kusal piur pa yisal yiyimp ya kumeshan mar? Kwinsambishil, Nzamb wayibabesha antu anch kumubwambwil kwafanyina kulet chibudikin chiyimp​—rufu. Dizu dia Nzamb diawanyina, mulong rufu randama mu mangand pa chisu chamubwambwilau mu chir cha Eden kudi antu. Rufu ra muntu wa kusambish, radiokala ku chisal cha rukis​—pamujipau Abel kudi mwanamakwend Kain.​—Disambishil 2:16, 17; 4:8.

Kukwatijan ni jinsangu ja antu kushik ni katat, Dizu dia Nzamb dilondin mu winswimp piur pa yom yisadikina anch: ‘Muntu ukat kumuyikel mukwau mulong wa kumumesh mar.’ (Mulej 8:9) Mazu minam madi makin? Yehova wayibabesha antwend, muchid wa Isarel anch ant au afanyina kuyimesh mar, ni antu afanyina kumudidil Nzamb mulong wa mar minam. (1 Samwel 8:11-18) Ap Mwant mwin manangu Salomon wayimesha antwend mar. (1 Ant 11:43; 12:3, 4) Ant ayimp, mudi Akab, ading in rukis ripandikena. Shinshikin chom chinech: anch Nzamb wakangesha yisal ya winyikel yawonsu mudi yiney, mazu mend mafanyinap kwikal ma makasu?

Vurik, chom chikwau anch Satan ukat kulond anch, antu akat kumusadil Nzamb nich mayingish mayimp. (Job 1:9, 10; 2:4) Anch Nzamb ukat kuyiking atushalapolend awonsu mwinshin mwa winyikel wawonsu, ov, mazu malonday Satan mafanyinap kumekan makin? Ni ang Nzamb wakangesh mar ma antu awonsu, yiney yikutwishap kumwikadish mwin makasu mujim? Nich diking mudi dined, antu avud akutwish kuman anch akwiyikelen ayinau nawamp pakad ukwash wa Nzamb. Pakwez Dizu dia Nzamb dilondin chakin anch: muntu kakwetap usu wa kwitakel amwinend. (Jeremiy 10:23) Tuswirikedin anch Want wa Nzamb weza; chawiy chisu chikeza uyimp kupwa.

Chimeken anch Nzamb kasadinap chom ap chimwing piur pa uyimp? Bwat kwau. Tushinshikinany mayingish maad: Chakusambish, Nzamb ukisin uyimp win wawonsu. Chilakej, Dizu diend dilejen patok piur pa mpung ya Jezabel pantaliken ni Nabot. Bibil ulejen kand anch kudi muntu ukweta usu wakad kumekan ukata kusadish yom yiney yiyimp. (Yohan 14:30; 2 Korint 11:14) Bibil ulejen anch muntu winou udi Satan Djabul. Kumumekesh muntu winou patok kutukwashin etu kwijik musul wa uyimp ni mar, ni Nzamb utukwashin kwilam ku uyimp. Ni chikwau kand, Nzamb ukat kutuking mulong wa machuku metu ma kurutu.

Chakaad, Nzamb utwinkishin mayingish makash ma kuchingejin disudiel dia mar. Mutapu wamekeshay patok, warumburishay ni wayipupay Akab, Jezabel ni antu akwau utwinkishin kashinsh piur pa mutapu ukezay kuyipup antu ayimp mudi mwashilayamu kal. (Kuseng 52:1-5) Nzamb utwinkishin ruchingej anch ukez kutenchik yom yawonsu ya antu akatilay yayipa mulong wa uyimp.b Mwin kushinshaman Nabot ukez kushakam pamwing nau anend chikupu mu paradis pa divu diakad kwikal ni uyimp.​—Kuseng 37:34.