Tumuchingejinany Ntakel Wetu wa Usu Kristu

1, 2. Chisend ik chijim chikalay nich Joshua pafay Moses?

YEHOVA wamuleja Joshua anch: “Moses, kashalapol wam, wafa kal. Katat ey, tumbuk, uya ushad wa wit wa Yordan, ey ni antu inay awonsu uyany mwi ngand yinipanyina kudi en in Isarel.” (Joshua 1:1, 2) Kuswimp mudi ik kudi Joshua muntu wading nkwash wa Moses mu mivu piswimp 40!

² Moses wayitakela in Isarel mu mivu yivud, pakwez katat Joshua ndiy ukimbina kuyitakel. Chawiy wafanyina kwiyipul anch antu akutwish kumwitiy mudi ntakel wau. (Kuvurik Yijil 34:8, 10-12) Kukwatijan ni Joshua 1:1, 2, buku umwing wisambidina piur pa Bibil ulondin anch, chisu chikash nakash ni cha ubaj ku muchid, pasak ap nlel chiding chisu chikatau kumuswinkan ntakel kudi ntakel mukwau.

3, 4. Mutapu ik wamuyukishau Joshua kudi Yehova mulong wamuchingejina ndiy, ni chipul ik tukutwisha kwiyipul?

³ Joshua wading ni diyingishin diwamp dia kwiyakamish. Pakwez wamuchingejina Yehova ni wading ukatin kulondul mbil jend. (Joshua 1:9-11) Nzamb wamuyukisha Joshua mulong wamuchingejina ndiy ni wasadina mwangel chakwel amutakel Joshua ni in Isarel. Mwangel winou wading kamu mudi Dizu, Mwan wa kusambish wa Nzamb.​—Kubudik 23:20-23; Yohan 1:1.

⁴ Yehova wayikwasha in Isarel kurijek yitongijok yau piur pa kuswimp kwikalaku pikalay Joshua ntakel wau musu. Nlel unou, kudi kand kuswimp kuvud nakash kusadikina. Tukutwish kwiyipul anch, ‘Mulong dirijek dia Nzamb didandamedin kuya kurutu, ov, tukwet diyingishin dia kumuchingejin Ntakel wetu watondau kal, Yesu?’ (Tang Mateu 23:10.) Mulong wa kwakul ku chipul chinech, tukwilej mutapu wayitakelay Yehova antwend pakur, chisu chaswimpang yom.

KUYITAKEL ANTU A NZAMB MULONG WA KUYITWAL MWI NGAND YA KUSHILAMU

5. Joshua wamana yom ik yadingay kand kal amanangap piswimp ni Yeriko? (Tal chipich cha kwinsambishin.)

⁵ Chisu chikemp kupwa kwa in Isarel kwauk wit wa Yordan, Joshua wamana yom yimwing yadingay kand kal amanangap. Piswimp ni musumb wa Yeriko, Joshua wamusankana ikundj umwing wading ni mpak ya musamun. Joshua wamwipula anch: “Ov, ey udi wetwetu anch udi wa akankuny netu?” Joshua washimoka pamwakulau kudi ikundj winou anch wading “kalal wa chisak cha amasalay cha [Yehova],” wading mwangel wayirishinang antu a Nzamb. (Tang Joshua 5:13-15.) Ap anch pa jindond jikwau rusangu rilondin anch Yehova ndiy wading kulond ni Joshua, chimeken patok anch Nzamb wading usadidin mwangel mulong wa kumulondin, mudi wasalangay yisu yivud pakur.​—Kubudik 3:2-4; Joshua 4:1, 15; 5:2, 9; Midimu 7:38; Galatia 3:19.

6-8. (a) Mulong wak mbil jimwing ja mwangel jamekana mudi jiwapinap? (b) Mutapu ik twija anch mbil jinej jading ja manangu ni ajipana pa chisu chiwanyidina? (Tal kand mazu ma kwinshin.)

⁶ Mwangel wamuleja Joshua yom yading yifanyidinay kusal mulong wa kukwat musumb wa Yeriko. Kwinsambishin, mbil jimwing jafanyina kumekan mudi jiwapinap. Chilakej, mwangel wamuleja Joshua kuyitwal amasalay awonsu ku mukand. Chinech charumburika anch kafanyinap kutwish kurish mu machuku makemp. Ov, chading kamu chisu chiwamp cha kuyitwal amakundj inay ku mukand?​—Disambishil 34:24, 25; Joshua 5:2, 8.

⁷ Pamwing ap amasalay iyipula anch, ‘Mutapu ik tukuchidija majuku metu anch akankuny aturishikish?’ Pakwez, kwashikena chom chimwing chakad kuchingejin! Pa ndond pa kuyirishikish in Isarel, amakundj a mu Yeriko ayova wom. Tutangin anch: “Chawiy apata yis ya Yeriko, ayikas nakash, mulong wa in Isarel. Kwikil muntu wading ni kubudik ap kwandam.” (Joshua 6:1) Rusangu riner rafanyina kuyibachik in Isarel kuchingejin nakash wintakel wa Nzamb!

⁸ Mwangel wamuleja Joshua anch in Isarel kafanyidinap kurishikish Yeriko. Pakwez, afanyina kunyingumuk musumb kapamp kamwing pa dichuku mu machuku musamban ni kupwa tupamp sambwad pa dichuku dia sambwad. Amasalay afanyina kutong anch, ‘Kusal mwamu kudi kushesh usu wau ni chisu chau.’ Pakwez, Ntakel wakad kumekan ku mes wa in Isarel wading wij nawamp yom yading yisadinay! Kulondul mbil jend, kwakasikesha ritiy ra in Isarel, ni kafanyinap kurish nau amasalay a mu Yeriko.​—Joshua 6:2-5; Hebereu 11:30.a (Tal mazu ma kwinshin.)

9. Mulong wak tufanyidin kulondul mbil jin jawonsu tutambwila mu dirijek dia Nzamb? Let chilakej.

⁹ Yom ik tukutwisha kwilejin ku rusangu riner? Yisu yimwing, dirijek dia Yehova dikat kusal yom mu mutapu usu, ni tukutwishap chisu chawonsu kwov kurumburik mulong wak disadin mwamu. Chilakej, twatonginap anch chading chitongijok chiwamp cha kusadin ma aparey elekitronik mulong wa dilejan dia muntu panrend, mu mudimu wa kulejan ap mulong wa yikumangan. Pakwez katat, chimeken anch tutanidinamu mu kusadin yom yiney. Anch twaman yibudikin yiwamp ya kuswimp mudi kwinoku, ritiy retu rikat kukasikan ni tukat kwikal mu umwing nau akadivar nau anambaz netu.

MUTAPU IK WATAKELAY KRISTU IN KRISTU AKUSAMBISH?

10. Nany watakela chakin mambamb ma usey ma chisak chitakedila chading mu Yerusalem piur pa kutwal antu ku mukand?

¹⁰ Kupwa kwa mivu piswimp 13 Mukamuchid umwing wading wakad kutwalau ku mukand dijin diend Korney wikala mwin Kristu, pakwez in Kristu amwing in Yuda ading adandamedin kulond anch chading cha usey kumutwal muntu ku mukand. (Midimu 15:1, 2) Mu musumb wa Antiosh, akadivar ading kupwitijan piur pa mulong winou. Chawiy amakurump arijeka anch Paul aya ku Yerusalem mulong wa kwipul chisak chitakedila piur pa mulong winou. Pakwez nany wading kamu chakin urijekina chakwel Paul aya? Paul warumburila anch: “Naya mulong Nzamb wanjingunina chakwel am niya kwinikwa.” Mu kulond patok, Kristu ndiy watakela milong chakwel chipul chinech achakula kudi chisak chitakedila.​—Galatia 2:1-3.

11. (a) Yom ik yadandamenau in Kristu amwing in Yuda kwitiyij piur pa kutwalan ku mukand? (b) Mutapu ik wamekeshay Paul anch ukwashin amakurump a mu Yerusalem nich kwikepish? (Tal kand mazu ma kwinshin.)

¹¹ Kristu watakela chisak chitakedila chakwel chovikesh nawamp anch in Kristu akad kwikal in Yuda kafanyidinap kuyitwal ku mukand. (Midimu 15:19, 20) Kupwa kwa mivu, in Kristu in Yuda avud adandamena kuyitwal anau amakundj ku mukand. Kupwa amakurump a mu Yerusalem atesha manyinyit anch Paul kalimishinap chijil cha Moses. Chawiy amakurump amuleja Paul kusal chom chikumekesha anch ulimishin chijil.b (Tal mazu ma kwinshin.) (Midimu 21:20-26) Amuleja kusend amakundj anying mulong wa kuya nau ku Tempel chakwel antu akutwish kuman anch Paul ulimishin Chijil. Paul wafanyina kulond anch: ‘Chom chinech chovikenap! Mulong wak winlejinany kusal mwamu? In Kristu in Yuda akad kov kurumburik piur pa mulong wa kutwal antu ku mukand, awiy akweta mulong.’ Pakwez, Paul wijika anch amakurump akimbin anch in Kristu awonsu ikal mu umwing, chawiy walondula nich kwikepish mbil jau. Chawiy tukutwish kwiyipul anch mulong wak Yesu walika anch kutwalan ku mukand kudandamena kwikal mulong mu chisu chilemp, ap anch Chijil cha Moses chapwa usey chisu chafay Yesu.​—Kolosay 2:13, 14.

12. Pamwing ap mulong wak Kristu walika anch chisu chilemp chisuta kurutu apwisha mulong piur pa kutwalan ku mukand?

¹² Chitin chisu mulong wa kwijidin kutesh kwa katat. Chading chitin chisu kudi in Kristu in Yuda amwing chakwel itiya uman umekeshina anch kadingap kand mwinshin mwa Chijil. (Yohan 16:12) Ading achidandamedin kutong anch kutwalan ku mukand chading chijingidij chimekeshina urund wa pakampwil ni Nzamb. (Disambishil 17:9-12) Akwau ading ovil wom anch akuyizengol kudi akwau in Yuda anch alik kuyitwal ku mukand. (Galatia 6:12) Pakwez pa chisu chiwanyidina, Kristu wayinkisha wintakel uvud kusutin mikand ya Paul.—Rom 2:28, 29; Galatia 3:23-25.

KRISTU UDANDAMEDIN KUTAKEL CHIKUMANGEN CHEND

13. Yom ik yikutwisha kutukwash mulong wa kukwash mutapu ututakedinay Kristu nlel?

¹³ Kristu udandamedin kwikal Ntakel wa chikumangen cha win Kristu nlel. Chawiy anch dirijek diasal kuswimp kuwakad kov kurumburik ap kuwakad kutesh, tongijokin pa mutapu Kristu wayitakelay antu a Nzamb pakur. Chikalap nchik pa chirung cha Joshua ap cha atwimbuy, Kristu wayinkisha chisu chawonsu wintakel wa manangu chakwel achidij antu a Nzamb, akasikesh ritiy rau, ni ayikwasha kwikal mu umwing.​—Hebereu 13:8.

14-16. Mutapu ik umekeshina mbil tutambwila kudi ‘kashalapol ushinshamena ni kubabal’ anch Kristu ukatin kutukwash kulam ritiy retu rikash?

¹⁴ Nlel, ‘kashalapol ushinshamena ni kubabal’ utwinkishin wintakel tukweta nich kuswir pa chisu tuukweta nich kuswir. (Mateu 24:45) Wintakel winou umekeshin anch Kristu utubangidin. Marko, ukweta an anying ulondin anch: “Satan usadin usu wa kuziyish chikumangen mu kurishikish majuku. Katat mulong wa kukasikesh twatambwila piur pa kutakel difukwil dia mu dijuku rubing rawonsu, uruu woviken patok kudi antakel a majuku anch afanyidin kuchidij majuku mau!”

¹⁵ Anch twaman mutapu ututakedinau kudi Kristu, tukutesh nawamp anch ukatin kutukwash kulam ritiy retu rikash. Chilakej, Patrick mukurump umwing wa chikumangen ulondin anch: “Kwinsambishin, antu amwing amana anch chadingap chikasikeshina kutanijan mu yisak yikemp yikemp mulong wa kulejan mukach mwa rubing.” Pakwez ulondin anch kuswimp kwinoku kumekeshin anch Kristu umubangidin muntu mwawonsu udia mu chikumangen. Chilakej, akadivar amwing nau anambaz ading akweta wom ap ading akad kusal mudimu wa kulejan nakash iyovil anch adi a usey nakash ni asadin mudimu wa kulejan chipandikena. Chinech chakasikeshin ritiy rau.

¹⁶ Kristu utukwashin kand nlel kushinshikin nakash pa mudimu wetu wa kulejan, udia mudimu wa usey nakash usadikina nlel pa divu. (Tang Marko 13:10.) André, mukurump musu wa chikumangen, usadining chisu chawonsu usu wa kulondul wintakel wawonsu usu uletinau kudi dirijek dia Yehova. Ulondin anch: “Kukepish kwa antu ku biro wa mutiy kutuvurishin anch chisu chashal kal chikemp ni anch chidi cha usey kushinshikin pa mudimu wa kulejan.”

MUTAPU IK TUKUTWISHA KUKWASH KU WINTAKEL WA KRISTU?

17, 18. Mulong wak tufanyidin kushinshikin pa mutapu tutanidinamu mu kwijidin kuswimp kusadikina?

¹⁷ Wintakel utwinkishinay Kristu, Mwant wetu uyikedila, ukutukwash katat ni machuku ma kurutu. Sal usu wa kushinshikin mutapu watanyidinamu mulong wijididin kuswimp kusu. Pa chisu cha difukwil dia mu dijuku, ukutwish kwisambinany mutapu kuswimp kwa yikumangan ap kwa mudimu wa kulejan kwakwashina dijuku dien.

¹⁸ Anch twavurik anch kulondul mbil jiletinau kudi dirijek dia Yehova kutwadin ku yibudikin yiwamp, chikutuswapel kulondul wintakel winou ni tukwikal ni musangar. Chilakej, mulong tuchapinap kand mikand yivud mudi pakur, tulamin nfalang jivud. Ni mulong tusadidin tekinoloji wa katat, tukwet mutapu wa kuyitan antu avud mulong wa kuyilej rusangu ruwamp. Ov, niyey ukutwish kusadin mikand ni yom yikwau kand ya elekitronik? Winou udi mutapu umwing wa kumukwash Kristu, ukatina anch tusadin yom ya dirijek ni manangu.

19. Mulong wak tufanyidin kukwash ku wintakel wa Kristu?

¹⁹ Anch twakwash wintakel wa Kristu, tuyikwashin akadivar nau anambaz kwikal ni ritiy rikash ni kwikal kamu mu umwing. André ulondin piur pa kuswimp kwasadikina katat piur pa kukepish kwa antu a mu dijuku dia Betel dia pa mangand mawonsu anch: “Mwikadil uwamp wamekeshinau akadivar ading mu dijuku dia Betel aswimpina chitongijok chau kukwatijan ni kuswimp kwinoku kwimbachikin kuyichingejin ni kuyilimish. Alondwil kamu ditemb dia Yehova mu kwikal nich musangar mu chisend chawonsu chiyinkishinau.”

IKAL NI RITIY NI MUCHINGEJINA NTAKEL WETU

20, 21. (a) Mulong wak tufanyidin kumuchingejin Kristu Ntakel wetu? (b) Chipul ik tukwisambina mu mutu wa mulong wambakedinap?

²⁰ Piswimp ap, Ntakel wetu Yesu Kristu “[ukurish] ni kuyipandakan akwau usu” ni ‘ukulejan yom yishimokishena.’ (Kujingunik 6:2; Kuseng 45:4) Pakwez, ap katat ututenchikin mulong wa mwom mu mangand masu, ni mulong wa mudimu tukusala mwinimwa, patukuyifundisha antu akuvumbulau ni kukwash mulong wa kusal divu kwikal paradis.

²¹ Pitudandamedina kumuchingejin Ntakel wetu ni Mwant, chikalap nchik yom yishikedina, ukututakel djat ni mu mangand masu. (Tang Kuseng 46:1-3.) Nlel, kuswimp kukutwish kwikal kukash, pakampwil anch kwatushiken mu mutapu twakad kuchingejin. Anch yom mudi yiney yashiken, mutapu ik tukutwisha kulam chisambu chetu cha mu manangu ni ritiy retu rikash mudiay Yehova? Tukwisambin chipul chinech mu mutu wa mulong wambakedinap.