Lam Chisambu cha Mu Manangu ap Anch Mashakamin Maswimp

1, 2. (a) Kuswimp kwa chikashimwish mu mashakamin metu kukwet usu ik? (Tal chipich cha kwinsambishin.) (b) Kukwatijan ni Kuseng 131, yom ik yikutwisha kutukwash kwikal ni chisambu cha mu manangu?

KUPWA kwa Lloyd ni Alexandra kusadin ku Betel mu mivu 25 ni kusut, ayituma mu teritwar kuya kulejan. Kwinsambishin ova ushon. Lloyd ulondin anch: “Natongang anch mudimu wam wa ku Betel wading kwau wa rawonsu. Mu manangu mam nasangera mayingishin ma kuswimp kwinoku, pakwez mbing ni angond alondulaku, yisu yivud niyovang mudi anlik kal.” Chisu chimwing, Lloyd watongang yom yiwamp piur pa kuswimp kwinoku, pakwez chisu chikwau waziyang.

² Yisu yawonsu, kukutwish kwikal kuswimp kanang kutwakad kuchingejin mu mashakamin metu, ni chinech chikusal anch twikala nich yakamish yivud. (Jinswir 12:25) Anch chitukasikedin kwitiy ni kwijidin kuswimp, yom ik tukutwisha kusal chakwel tulika kuzazat? (Tang Kuseng 131:1-3.) El tumanany mutapu watwishau atushalapol a Yehova, a pakur ni akatat kwikal ni chisambu cha mu manangu ap anch mashakamin mau maswimpa mu chikashimwish.

MUTAPU UTUKWASHINA “CHISAMBU CHA NZAMB”

3. Mutapu ik waswimpa mashakamin ma Josef mu chikashimwish?

³ Chilakej tong bil piur pa Josef. Pakach pa anend awonsu, Jakob wading umukatin nakash Josef. Chom chinech chasala anch anamakwend amovil mukau. Pawanyishay Josef mivu 17, anamakwend amulandisha mudi kabindj. (Disambishil 37:2-4, 23-28) Mu mivu piswimp 13, Josef wamana mar mu Idjibit, chakusambish wading kabindj ni kupwa wading muntu wa rukan. Josef wading kulemp ni tatukwend wading umukatina nakash. Yom yamushikena yafanyina kusal anch aburen ruchingej ni ajiman, pakwez kasalap mwamu. Yom ik yamukwasha?

4. (a) Yom ik yasalay Josef padingay mu rukan? (b) Mutapu ik wakulay Yehova ku malembil ma Josef?

⁴ Pading pamenay Josef mar mu rukan, wafanyina kushinshikin mutapu umukwashinau kudi Yehova. (Disambishil 39:21; Kuseng 105:17-19) Pamwing ap watongijokina kand pa yilat ya uprofet yalatay chisu chadingay mwanikanch ni kwikal nich kashinsh anch Yehova wading nend. (Disambishil 37:5-11) Pamwing ap walembilang chisu chawonsu ni kumulej Yehova yom yawonsu yading mu muchim wend. (Kuseng 145:18) Ni Yehova wakula ku malembil ma Josef ni kumwinkish kashinsh anch wafanyina “kwikal nend” chikalap nchik yom yamushikena.​—Midimu 7:9, 10.a (Tal mazu ma kwinshin.)

5. Mutapu ik ukutwisha “chisambu cha Nzamb” kutubachik kudandamen kumusadin Yehova?

⁵ Ap anch mashakamin metu madi makash, tukutwish kwikal ni “chisambu cha Nzamb” chichidijina “yitongijok” yetu ni kusal anch tulik kuzazat. (Tang Filip 4:6, 7.) Anch twikal ni yakamish, “chisambu cha Nzamb” chikutukasikesh kudandamen kumusadin Yehova ni kulik kuziy. El twilejany yilakej yimwing ya katat ya akadivar nau anambaz amana yom yiney.

MWITA YEHOVA AKUKWASH KWIKAL KAND NI CHISAMBU

6, 7. Mutapu ik ukutwisha malembil metu kutukwash kwikal kand ni chisambu cha mu manangu? Let chilakej.

⁶ Pateshay Ryan ni Juliette anch chisend chau mudi ayibol a pakampwil a chisu chikemp chapwa kal, aziya nakash. Ryan ulondin anch: “Twateka mulong winou mu makas ma Yehova kusutin malembil. Twijika anch twading ni mutapu uwamp wa kumekesh ruchingej retu mudiay ndiy. Antu avud mu chikumangen chetu ading asu mu uyakin, chawiy twamulembila Yehova anch atukwasha kusha chilakej chiwamp cha ritiy.”

⁷ Mutapu ik wakulay Yehova malembil mau? Ryan ulondin anch: “Kapamp kamwing kupwa kwa kulembil, yitongijok yetu yiyimp ni minan twading nich kwinsambishin yapwa. Chisambu cha Nzamb chading chilamin michim yetu ni yitongijok yetu. Twamana anch tukutwish kudandamen kwikal ni usey kudi Yehova anch twalam mwikadil uwamp.”

8-10. (a) Mutapu ik ukutwishay spiritu wa Nzamb kutukwash anch tukwet yakamish? (b) Mutapu ik ukutwishay Yehova kutukwash anch twashinshikin pa kumusadin ndiy?

⁸ Spiritu wa Nzamb ukutwish kusal anch tulik kuzazat ni ukutwish kand kututwal ku maverse mamwing ma Bibil makutwisha kutukwash kwijik chom chidia cha usey nakash mu mwom. (Tang Yohan 14:26, 27.) Tal yom yamushikena Philip ni mukajend Mary, ambay a uruw asadina ku Betel mu mivu piswimp 25. Mu angond anying, amakwau ni anamakwau afa ni Philip ni Mary ading afanyidin kumulam tatukwend a Mary wading ukweta mayej ku wong.

⁹ Philip ulondin anch: “Namanang anch niwanyishin yom yimwing nawamp, pakwez nading niburedin chom chimwing. Nawila pa mukand wa Kolosay 1:11, wading mu Chinong cha Kalam cha kwilej. Chakin nading nijijamen, pakwez nadingap nijijamena kamu nakash. Nafanyina ‘kujijaman kamu nich kushimpish kwa muchim ni musangar.’ Verse winou wanvurisha anch musangar wa mu mwom wam wimedinap pa yom yinshikedina mu mwom, pakwez wimedin pa usu ukweta spiritu wa Nzamb mu mwom wam.”

¹⁰ Mulong Philip ni Mary adandamena kushinshikin pa kumusadin Yehova, wayiyukisha mu mitapu yivud. Chawiy, chisu chikemp kupwa kwa kudiokal ku Betel, awonsu ikala nau in kwilej Bibil aya kurutu nawamp ni akata kwilej tupamp tuvud pa rubing. Mary ulondin anch: “In kwilej inay ading musangar wetu ni winou wading mutapu watulejay Yehova anch yom yawonsu yikuwap kwau.”

SAL CHOM CHIKUTWISHAY YEHOVA KUYUKISH

11, 12. (a) Mutapu ik wasalay Josef chom chatwishay Yehova kuyukish? (b) Yehova wamufuta Josef mutapu ik?

¹¹ Anch mashakamin maswimp kwa chikashimwish, tukutwish kwikal ni yakamish ni kusambish kutongijokin pa milong yetu. Yawiy yom yafanyina kumushiken Josef. Pakwez, watonda kusal yom yawonsu yikutwishay kusal kukwatijan ni yom yamushikena. Mudi mwasalay kand mudimu ukash mulong wa Potifar, wasala mudimu nakash mu rukan mu chisend chawonsu chamwinkishangau kudi mwin kulam rukan.​—Disambishil 39:21-23.

¹² Dichuku dimwing, amwinkisha Josef chisend cha kuyilam antu aad a rukan asadinang ku chipang cha Farao. Josef wading muntu muwamp kudi awiy ni antu inay aad atwisha kumulej piur pa yakamish yau ni yilat yayakamisha yalatau. (Disambishil 40:5-8) Josef kadingap kija yom yikushikena, pakwez mambamb minam masala anch ikal ni want ipau. Kupwa kwa mivu yaad, amudiosha mu rukan ni wikila mwin kutakel wa usu nakash mu Idjibit. Farao ndiy kusu wading piur nakash kumusutamu Josef!​—Disambishil 41:1, 14-16, 39-41.

13. Mutapu ik tukutwisha kusal yom yikutwishay Yehova kuyukish, chikalap nchik yom yitushikedina?

¹³ Mudi Josef, tukutwish kwikal mu milong yikutwisha kutukasiken kuyipwish. Pakwez anch tudi in kushimpish muchim ni kwikasikesh kusal yom yiwamp, Yehova ukutuyukish. (Kuseng 37:5) Ap anch tudi ni yakamish, tufanyidinap ‘kushadish ruchingej.’ (2 Korint 4:8) Yehova ukwikal niyetwetu, pakampwil anch twadandamen kushinshikin pa mudimu wa kulejan.

DANDAMEN KUSHINSHIKIN PA MUDIMU WA KULEJAN

14-16. Mutapu ik wadandamenay Filip kulejan ap anch mashakamin mend maswimpa?

¹⁴ Filip mwin kulejan rusangu ruwamp wading chilakej chiwamp cha muntu wadandamena kushinshikin pa mudimu wend wa kulejan chikalap nchik kuswimp kwend kwa mashakamin. Chisu chimwing, wading usangaredin chisend chisu mu Yerusalem. (Midimu 6:1-6) Kupwa yom yawonsu yaswimpa. Kupa kwa kumujip Stefan, ayizengola nakash In Kristu, ni achina mu Yerusalem. Mulong Filip wakata kushal ukwatikena mulong wa kumusadin Yehova, chawiy waya mu ul wa Samaria, kwinikwa kwading antu akweta kuswir kwa kutesh rusangu ruwamp.​—Mateu 10:5; Midimu 8:1, 5.

¹⁵ Filip wayangang kwa kwikatin kwi ndond kwawonsu kwamubachikang spiritu wa Nzamb anch aya. Chawiy Yehova wamusadina chakwel alejan ku jindond kwading antu ading kandikal ateshap rusangu ruwamp. In Yuda avud ayimanang in Samaria mudi antu akad usey ni ayisadinang mu mutapu uyimp. Pakwez Filip kadingap nich kasolikany, ni wayileja nich mushiku rusangu ruwamp. Chad in Samaria amutesha ‘nich muchim umwing’!​—Midimu 8:6-8.

¹⁶ Kupwa, spiritu wa Nzamb wamubachika Filip kulejan mu musumb wa Azot ni Sezarey, kwading antu avud akad kwikal in Yuda. (Midimu 8:39, 40) Kupwa mashakamin ma Filip maswimpa kand. Washakama kwinikwa ni wikala ni dijuku. Pakwez chikalap nchik mutapu waswimpa mashakamin ma Filip, washala ukwatikena nich mudimu wa kulejan ni Yehova wadandamena kumuyukish ni dijuku diend.​—Midimu 21:8, 9.

17, 18. Anch mashakamin metu maswimp mu mutapu kanang, mutapu ik ukutukwasha kushinshikin pa mudimu wetu wa kulejan?

¹⁷ Antu avud adia mu mudimu wa chisu chawonsu alondin anch kushinshikin pa mudimu wa kulejan kuyikwashin kwikal ni musangar ni kwikal ni yitongijok yiwamp ap anch mashakamin mau maswimp. Chilakej, chisu chadiokalau ambay a uruw amwing a mu Afrique du sud Osborne ni Polite ku Betel, atonga anch chikutwish kuyiswapel kuman mudimu ukuyishila chisu ni kuman ndond ya kushakam. Pakwez Osborne Ulondin anch: “Cha ushon mudimu uwamp wamekanap swa mudi mutwading tutongina.” Polite Ulondin anch: “Twamanap mudimu mu angond asatu, ni twadingap ni nfalang. Wading mulong ukash.”

¹⁸ Yom ik yamukwasha Osborne ni Polite mu chisu chinech cha yakamish? Osborne ulondin anch: “Mudimu wa kulejan pamwing ni chikumangen watukwasha nakash kudandamen kushinshikin pa yom yiwamp.” Pa ndond pa kushakam ku chikumbu ni kusambish kwinan, akwata mupak wa kushal akwatikena mu mudimu wa kulejan. Kusal mwamu kwayiletina musangar nakash! Osborne ulondin kand anch: “Twakimba mudimu kwi ndond kushalijan, ni kupwa twamana mudimu.”

MUCHINGEJINA KAMU YEHOVA

19-21. (a) Yom ik yikutukwasha kulam chisambu chetu cha mu manangu? (b) Mutapu ik tukutwisha kutaninamu anch twijidin kuswimp kwa chikashimwish?

¹⁹ Mudi twamana kal, anch twasal yom yiwamp chikalap nchik yom yitushikedina ni kumuchingejin kamu Yehova, tukutwish kulam chisambu chetu cha mu manangu chikalap nchik yom yishikedina. (Tang Mike 7:7.) Mu kusut kwa chisu, tukutwish kuman anch mutapu twikasikeshina kwijidin kuswimp kwinoku kwakasikeshin urund wetu ni Yehova. Polite urumburil anch pamudioshau ku Betel, kuswimp kwinoku kwamufundisha chirumburikina chakin kumuchingejin Yehova ap anch mashakamin mamekan anch madi makash. Ulondin anch: “Urund wam ni Yehova wakurika nakash.”

²⁰ Mary, twajimbulang kwinsambishin, udandamedin kumulam tatukwend wananapina kal ni ukat kusal uchibol. Ulondin anch: “Nilejin anch, ang nikal ni yakamish, nifanyidin kwiman, kulembil, ni kwiswedish. Kusha mulong mu makash ma Yehova diading dilejan dijim nakash nileja ni nikwikal ni kuswir kwa dilejan dined mu machuku ma kurutu.”

²¹ Lloyd ni Alexandra itiyin anch kuswimp kwikala mu mashakamin mau kwapaka ritiy rau mu mutapu wakad kuchingejin. Pakwez amana mutapu wayikwasha kupak kwinoku. Katat ij anch ritiy rau ridi rikash mulong wa kuyikasikesh anch adi ni milong, ni iyovil anch ikadin antu awamp.

22. Anch twasal usu wa kusal yom yiwamp chikalap nchik mashakamin metu, kashinsh ik tufanyidina kwikal nich?

²² Mu mangand minam, mashakamin metu makutwish kuswimp mu chikashimwish. Tukutwish kwikal ni chisend cha mutapu ukwau mu mudimu wa Yehova, kuyel, ap kwikal ni chisend cha kulam dijuku dietu mu mutapu ukwau. Pakwez chikalap nchik yom yikutwisha kushiken, ikal nich kashinsh anch Yehova ukubangidin ni ukukukwash pa chisu chiwanyidina. (Hebereu 4:16; 1 Pita 5:6, 7) Kusambish katat, sal usu wa kusal yom yiwamp chikalap nchik mashakamin mey. Mulembila Tatukwey, Yehova, ni ileja kumuchingejin ching ndiy. Anch wasal mwamu, chikalap nchik mutapu ukuswimpa mashakamin mey, ukudandamen chisu chawonsu kwikal ni chisambu cha mu manangu chidiokila kudi Yehova.