Yipul ya in Kutang

Yom ik yading yifidinay kambuy Paul kulond palonday anch: “Mulong wa yijil, nafil kal ku yijil”?​—Gal. 2:19, TMK.

Paul wafunda anch: “Mulong wa yijil, nafil kal ku yijil, chakwel nikal mwom kudi Nzamb.”​—Gal. 2:19.

Yom yafunday Paul mu mukand winou yading yikwatijadin ni chitongijok chayifundinay in Kristu a ku yikumangen ya mu Galatia wading provens wa Rom. In Kristu amwing a mu yikumangen yiney ading asambishin kal kutesh mafundish ma alej a makasu. Alej inay afundishang anch pakwel anch muntu apand, ufanyidin kuziyin Chijil cha Moses, pakampwil chijil cha kutwalan ku mukand. Pakwez Paul wading wij anch atushalapol a Nzamb kadingap kand kakweta kuswir kwa kuyitwal ku mukand. Chawiy, kusutin mutapu warumburilay yom nich manangu, wamekesha anch mafundish minam mad ma makasu ni wayikasikesha akadivar kwikal ni ritiy mu chakupesh cha difut cha Yesu Kristu.​—Gal. 2:4; 5:2.

Bibil ulejen patok anch ang muntu wafa kijap kand chom, ni yom yawonsu yisadikina yikwetap kand usu pad ndiy. (Mul. 9:5) Palonday Paul anch: “Nafil kal ku yijil,” wading ufidin kulond anch Chijil cha Moses chadingap kand chikweta usu pad ndiy. Pakwez Paul wading ukwet kashinsh anch mulong wa ritiy radingay nich mu difut, wading ukwet “mwom kudi Nzamb.”

Paul waswimpa “mulong wa yijil.” Mutapu ik? Wading udiokidinap pa kurumburil anch “muntu kakumuyingishinap mulong ukat kulondul Yijil ya Moses, pakwez akumuyingish ching kusu mulong umwitiyijin Yesu Kristu.” (Gal. 2:16) Chijil chasala mudimu wa usey nakash. Paul wayirumburila in ku Galatia anch: “Yijil ayiwejaku mulong wa kujingunin mutapu wa yitil. Chad yifanyidin kushakam djat ni pakushikinay mwan wa kushilamu.” (Gal. 3:19) Mwaning, Chijil chamekesha patok anch antu akad kuwanyin adia akayitil kadingap kakweta mutapu wa kulimish Chijil mu mutapu uwanyidina ni anch ading akwet kuswir kwa chakupesh chiwanyidina. Chawiy Chijil chayitakela antu mulong wa kuyitwal kud “mwan wa kushilamu,” Kristu. Nzamb wafanyina kumuman muntu mud utentamin anch wamekesh ritiy mudiay Yesu Kristu. (Gal. 3:24) Anch Paul walonda mwamu, chid mulong Chijil chawiy chamukwasha kumwitiyij Yesu. Mwamu tukutwish kulond anch Paul ‘wafila ku yijil’ ni kwikal “mwom kudi Nzamb.” Chijil chadingap kand chikweta usu pad ndiy, ching kusu Nzamb.

Paul wafunda kand chitongijok cha mutapu winou mu mukand wayifundinay in Rom. Wayifundina anch: “Anakamakwam in Kristu, mulong wa rufu ra Kristu udiany mudi afu, Yijil ya Moses kiyikukasinanyap kand . . . Katat Nzamb watusuril kal ku Yijil yading yitukasina.” (Rom 7:4, 6) Mukand winou ni wa Galatia 2:19 yimekeshin anch Paul kadingap kisambidina rufu mud ra muntu ufishinau nich ku Chijil. Pakwez wading wisambidin piur pa kukwolik. Chijil chadingap kand chikweta usu pad ndiy ni pad antu akwau ading mud ndiy. Ritiy radingau nich mu difut dia Kristu rayikola.