Ov, Wij?
Mulong wak chadinga cha ukwash kud in Isarel payitiyijau kupesh amayemb ap atwinkudimb?
CHIJIL chading chitiyijin kupesh atwinkudimb ni amayemb kud Yehova. Atujil inay aad ayijimbulang awonsu aad pamwing mu yijil yisambidina piur pa yakupesh ni kajil ukwetay muntu pa atujil inay ndiy walambulangay. (Lev. 1:14; 12:8; 14:30) Mulong wak chadinga cha ukwash? Diyingishin dimwing did anch amayemb kamekanangap yisu yawonsu. Mulong wak?
Iyemb
Amayemb ad atujil akata kubuk ni kushakam mu Isarel mwawonsu pa chirung cha marungul. Mwi Ngond wa 10 win mwawonsu, akat kubukin mu jingand jidia mutambu wa kurul mudia marungul, ni akat kuchirik mu Isarel pa chisu cha marungul. (Mum. 2:11, 12; Jer. 8:7) Chinech chimekeshin anch chading chiyikasikedin in Isarel a pasak kupesh amayemb pa chirung cha mashik.
Kankudimb
Ku mutambu ukwau, atwinkudimb kakatap kubuk, chawiy ading kumekanang chisu chawonsu mu Isarel. Cha usey kupandakan, atwinkudimb ayipitang. (Ilikej ni Yohan 2:14, 16.) Buku umwing (Bible Plants and Animals) ulondina anch: “Ading kupitang atwinkudimb mu misumb ni mu mal mawonsu mading mu Palestin. Ku chikumbu ni chikumbu kwading katal ka atwinkudimb, ap mapan kwi mbumbu, mwafanyinangau kushakam atwinkudimb.”—Ilikej ni Isay 60:8.
Kankudimb udia mu dipan
Yehova wamekesha anch ud Nzamb wa rukat ni wisikena kusutin kwitiy anch amupeshang atujil ading kumekanang chisu chawonsu mu Isarel.