Ukutwish Kutan Musangar Wakin

1. Musangar wetu wimedin mutapu ik pa kwijik anch tukwet kuswir kwa yom ya Nzamb?

MUSANGAR wakin yidiap kwau yovil ya muchim yikutwishay kwov muntu mu kachisu kakemp, kupwa yashadik kand. Muntu ukat kwikal ni musangar wakin mu mwom wend wawonsu. Mutapu ik? Yesu warumburila mu Mafundish mend ma pa Mukandu anch: “Ayuk kwau antu ija anch: ‘Tukwet kuswir kwa yom ya Nzamb mu michim yetu.’” (Mat. 5:3) Yesu wading wij anch antu ayitanga ni maku ma kumwijik ni kumwifukwil Sakatang wau Yehova Nzamb. Ni mulong Yehova uding ‘Nzamb wa musangar,’ antu awonsu akata kumwifukwil akutwish niyau kwikal ni musangar.​—1 Tim. 1:11.

2-3. (a) Kukwatijan ni Yesu, anany akutwisha niyau kwikal ni musangar? (b) Yom ik tukushinshikina mu mutu wa mulong winou, ni mulong wak tufanyidina kusal mwamu?

² Ov, kwikal ni musangar wakin kurumburikin kuburen milong mu mwom wetu? Bwat. Mu Mafundish mend ma pa Mukandu, Yesu walejana yom yimwing yishimokishena. Ap “antu akweta runeng”—pamwing ap mulong ifishin nich mulong wa yitil yau, ap mulong arishin ni milong yikash, akutwish kwikal ni musangar. Yesu walonda yom yawiy yimwing piur pa “antu azengodilau mulong awiy akat kusal mudi musotilay Nzamb” ni antu ‘asaadinau’ mulong ad in kwilej a Kristu. (Mat. 5:4, 10, 11) Pakwez, mutapu ik chitwishikina kwikal ni musangar wakin mu mikadil mud yiney?

³ Yesu wading ukimbin kutufundish anch musangar wakin udiokilingap ku kuburen milong, pakwez ku kuwanyish maswir metu ma mu spiritu, ni ku kumusejin Nzamb piswimp. (Jak. 4:8) Mutapu ik tukutwisha kusal mwamu? Mu mutu wa mulong winou, tukwisambin yom yisatu ya pakampwil yikutwisha kutuletin musangar wakin.

TANG NI ILEJA BIBIL

4. Chom ik cha kusambish chikutwisha kutuletin musangar wakin? (Kuseng 1:1-3)

⁴ CHOM CHA 1: Mulong wa kwikal ni musangar wakin, tufanyidin kutang ni kwilej Bibil. Antu ni annam, awonsu akwet kuswir kwa yakudia ya ku mujimbu, mulong wa kudandamen kwikal ni mwom. Pakwez ching kusu antu awiy akutwisha kudia yakudia ya mu spiritu. Ni tukwet kamu kuswir kwa yakudia yiney. Chawiy chalonday Yesu anch: “Muntu kakutwishap kwikal mwom mulong wa yakudia kusu, pakwez ukwet kuswir kwa mazu mawonsu makat kulonday Nzamb.” (Mat. 4:4) Chawiy, tufanyidinap kusutish dichuku ap dimwing pakad kutang Bibil, Dizu dia Nzamb dikweta usey nakash. Nfund a kuseng wafunda anch: ‘Wayuk muntu ukata kusangar pa kulondul yijil ya Yehova ni ukata kuyilej muten ni uchuku.’—Tang Kuseng 1:1-3.

5-6. (a) Yom ik tukutwisha kwilej kusutin Bibil? (b) Kutang Bibil kukutwish kutukwash mutapu ik?

⁵ Yehova watulejin kal nsangu ja usey nakash piur pa mutapu tukutwisha kwikal ni musangar wakin mu mwom wetu kusutin Bibil. Mu buku winou, twilejin yom yikatinay kusal piur pa mwom yetu. Twilejin kand yom tufanyidina kusal mulong wa kumusejin piswimp ni kutambul dilikishin dia yitil yetu. Ni twilejinamu kand ruchingej ripandakena kuwap ra yom yatushidinayamu kal piur pa machuku ma kurutu. (Jer. 29:11) Uyakin winou twilejina mu Bibil ukat kutuletin musangar nakash mu michim yetu!

⁶ Mud mutwija, Bibil wizwil kand too nich yiyul ya usey yikutwisha kutukwash mu mwom wetu wa pichuku pichuku. Anch twalondul yiyul yiney, tukutwish kutan musangar wakin. Chisu chawonsu ukwiyova kuziy mulong wa yakamish ya mwom, sutish chisu chivud nakash mu kutang ni mu kutongijokin pa Dizu dia Yehova. Yesu walonda anch: “Ayuk kwau antu akata kutesh dizu dia Nzamb ni kudisadil!”—Luka 11:28.

7. Yom ik yikutwisha kutukwash kutaninamu nakash mu chisu twitekidina mulong wa kutang Dizu dia Nzamb?

⁷ Piutangina Dizu dia Nzamb, itekina chisu cha kusanger yom utangina. Chilakej, ov, chom chinech chakushikenap kal? Muntu umwing ukat kwisuk yom ukatining nakash. Pakwez mulong pamwing ap ukwetap chisu chivud, ap ukwatiken nakash ni midimu yikwau, wasambish kuminy yom ya njuwjuw pakad kuyichakuny nawamp. Kupwa kwa kupwish kudia, wajingunin anch wadia kal mau mau nakash, ni watong anch wading ufanyidin kudia pakemp pakemp mulong wa kusanger yakudia yiney. Chikutwish kwikal mutapu umwing ni chisu utangina Bibil. Yisu yimwing tukutwish kumutang mau mau, ni kulik kusanger kamu yom tutangina. Ishila chisu cha kusanger Dizu dia Nzamb; sal mud umen yom mutapu uyisadikina, ni uteshin mazu ma antu alondina, ni tongijokin pa yom utangina. Kusal mwamu kukukuletin kamu musangar wakin.

8. Mutapu ik ukatay ‘kashalapol ushinshamena ni kubabal’ kuwanyish chisend chend? (Tal kand mazu ma kwinshin.)

⁸ Yesu wamutonda ‘kashalapol ushinshamena ni kubabal’ mulong wa kutwinkish yakudia ya mu spiritu pa chisu chiwanyidina, ni utuwanyishidin nawamp maswir minam.b (Mat. 24:45) Yakudia yawonsu ya mu spiritu yikatay kubudish kashalapol yimedin pa Dizu dia Nzamb. (1 Tes. 2:13) Yakudia yiney ya mu spiritu yikat kutukwash kwijik yitongijok ya Yehova mud muyilejenau mu Bibil. Chawiy tukata kutangin gazet Chinong cha Kalam ni Lankany! ni mitu ya milong yidia pa jw.org. Tukat kwirijek mulong wa yikumangan ya mukach mwa rubing ni ya kwinsudiel kwa rubing. Ni tukat kutal program wa ngond ni ngond wa JW Télédiffusion anch wabudik. Anch twikal nich kashinsh anch tudandamedin ni chaku cha kutang ni kwilej Bibil, chawiy, tukutwish chad kusal chom cha kaad chikutwisha kutukwash kutan musangar wakin.

SHAKAM KUKWATIJAN NI MBIL JA YEHOVA

9. Chom ik cha kaad chikutwisha kutuletin musangar wakin?

⁹ CHOM CHA 2: Mulong wa kwikal ni musangar wakin, tufanyidin kushakam kukwatijan ni mbil ja Yehova. Nfund a kuseng umwing wafunda anch: “Wayuk kwend muntu mwawonsu ukata kumulimish [Yehova], ndiy kamu ukata kuziyil mazu mend.” (Kus. 128:1) Kumwov Yehova wom kurumburikin kumulimish nakash ni kwipuk kusal chom chin chawonsu chikutwisha kumunenganesh. (Jnsw. 16:6) Chawiy tukata kudandamen kusal usu wa kushakam kukwatijan ni mbil ja Nzamb piur pa kuwap ni kuyip mud murumburilau mu Bibil. (2 Kor. 7:1) Tukwikal ni musangar anch twasal yom yikatinay Yehova ni twipuk kusal yom yikisinay.—Kus. 37:27; 97:10; Rom 12:9.

10. Kukwatijan ni Rom 12:2, chisend ik tukweta?

¹⁰ Tang Rom 12:2. Muntu kafanyidinap kwend kwimen kusu pa kwijik anch Yehova ukwet ulabu wa kutek mbil piur pa kuwap ni kuyip, pakwez ufanyidin kand kuziyin mbil ja Nzamb mu mwom wend. Chilakej, muntu ukutwish kwijik anch guvernema ukwet ulabu wa kutek mimbu piur pa mau mafanyidinay kuya muntu wendishina motak mwi njil. Pakwez ukutwish walik kwend kuziyin ku mimbu yiney. Mud chibudikin, ukutwish kwendish mau mapandakena. Tukat kumekesh kusutin mwikadil wetu anch tukwet kamu kashinsh anch mwom uwamp wimedin pa kulimish mbil ja Yehova. (Jnsw. 12:28) Wawiy mutapu wiyovay David, chawiy chalonday piur pa Yehova anch: “Ey ukat kwinlej njil ya mwom. Nizwil nich musangar anch nid pamwing ni yeyey. Ey ukat kwisangaresh chikupu ni chikupu.”—Kus. 16:11.

11-12. (a) Anch twazangen ap tuzinin mulong wa milong kanang, yom ik tufanyidina kubabel? (b) Mazu madia mu Filip 4:8 makutwish kutukwash mutapu ik chisu tukimbina kutond mulad wa kwipuwangej?

¹¹ Chisu twazangena ap tuziyina mulong wa milong kanang, tukutwish kukimb mutapu wa kupwish milong yetu. Chiyipinap kwau kusal mwamu, pakwez tufanyidin kubabal chakwel kangal twiyandjik mu kusal chom chikisinay Yehova.—Efes 5:10-12, 15-17.

¹² Mu mukand wayifundinay in Kristu a ku Filip, kambuy Paul wayikasikesha in Kristu inay kudandamen kushinshikin pa “yom yitentamina, . . . yidia zwang, . . . yom yikatishena, [ni] yom ya ranaken.” (Tang Filip 4:8.) Ap anch Paul kadingap kafundina yom yiney piur pa milong ya kwipuwangej, yom yafunday yikutwish kututakel chisu tutondina milad ya kwipuwangej. Pakish kusal chom chinech: Pa ndond yawonsu padia dizu “yom” mu verser, diswinkesha nich dizu “miminy,” “mafilim,” “mabuku,” ap “masengan ma video.” Kusal mwamu kukutwish kukukwash kuman yom yikatinay Nzamb ni yikisinay. Tusotin kushakam kukwatijan ni mbil ja piur ja Yehova. (Kus. 119:1-3) Kupwa, nich kom kadia zwang, tukutwish chad kusal chom chikwau chikutwisha kutuletin musangar wakin.—Mid. 23:1.

TEK DIFUKWIL DIA YEHOVA PA NDOND YA KUSAMBISH

13. Chom ik cha kasatu chikutwisha kutuletin musangar wakin? (Yohan 4:23, 24)

¹³ CHOM CHA 3: Ikal nich kashinsh anch difukwil dia Yehova did pa ndond ya kusambish mu mwom wey. Mulong Yehova ud Sakatang wetu, ndiy tufanyidina kwifukwil. (Kuj. 4:11; 14:6, 7) Chawiy, chom cha usey nakash chid anch tufanyidin kumwifukwil mu mutapu ukatinay ndiy, ‘mu spiritu ni uyakin.’ (Tang Yohan 4:23, 24.) Tukatin anch spiritu utumbila atakel difukwil dietu chakwel dikwatijan ni uyakin udia mu Dizu diend. Difukwil dietu difanyidin kwikal pa ndond ya kusambish ap anch tushich mwi ngand mukangeshinau mijikit yimwing ap kujidik mudimu wetu. Pitulondina ap, kud akadivar ni anambaz 100 ni kusut adia mu jinkan mulong kwau ad Atuman a Yehova.c Chikalap nchik mwamu, akat kusal nich musangar yawonsu yikutwishau mulong wa kulembil, kwilej, ni kuyirumburil antu akwau piur pa Nzamb ni Want wend! Chisu chituzengodinau ap kutulond nayimp, tukutwish kwikal ni musangar pa kwijik anch Yehova ud netu ni anch ukutufut.—Jak. 1:12; 1 Pita 4:14.

CHILAKEJ CHA RUSANGU RAKIN

14. Yom ik yamushikena nsand umwing wa mu Tadjikistan, ni mulong wak?

¹⁴ Akadivar ni anambaz netu amwing arisha ni milong yikash mu yisu kanang, pakwez atana musangar wakin mulong asala yom yisatu twisambina kal kwiur oku. Tal yom yamushikedina Jovidon Bobojonov wa mu Tadjikistan padingay ni mivu 19, mulong walikin kwandam mu usalay. Pa machuku ma ngond 4 Ngond wa 10, 2019, amusenda ku usu kwol kwend amutek mu rukan mu angond avud, ni amuzengola mud mpopol. Rusangu piur pa mutapu wakad kutentam wamusadinau rashika mu jingand jivud. Alejana anch amubula mulong wa kumushindin kusal machip ma usalay ni kudjal masun ma usalay. Kupwa, amufisha nich ku dirumburish ni amukasa mu rukan djat ni pafanyinau kamulikishin kud ntakel wa ngand ni kulejan anch amulikishaku. Chisu chawonsu chasutishay mu rukan, Jovidon walama kushinshaman kwend ni musangar wend. Mutapu ik watwishay kusal mwamu? Kusutin kubangin chisu chawonsu maswir mend ma mu spiritu.

15. Mutapu ik wawanyishay Jovidon maswir mend ma mu spiritu padingay mu rukan?

¹⁵ Padingay mu rukan, Jovidon wadandamena kwilej piur pa Yehova, ap anch kadingap ni Bibil ap mikand yetu. Mutapu ik watwishay kusal mwamu? Akadivar ni anambaz amuletinang yakudia ya ku mujimbu ni afundang mufund wa dichuku pa ntwuku wamutekinangau yakudia. Mwamu watwishang kutang Bibil ni kutongijokin pa yom yatangangay dichuku diawonsu. Kupwa kwa kumubudish mu rukan, walonda mazu manam mulong wa kuyibabesh antu akadingap kal kurish ni yikokujol yikash: “Ufanyidinany kusadin chisu ukwetanya katat mulong wa kukudish ronganyin ren piur pa Yehova kusutin kutang Dizu diend ni mikand yetu.”

16. Jovidon washinshikina yitongijok yend pa yom ik?

¹⁶ Mukadivar netu washakama kukwatijan ni mbil ja Yehova. Pa ndond pa kutongijokin pa maku mayimp ni kwiyandjik mu yisal yiyimp, washinshikina padiay Yehova ni pa yom yikwatinay nich usey. Jovidon wasangerang kuwap kwa yitang ya Nzamb. Pamanch pin pawonsu walankang mulong wa kutesh masok ma atujil adidina. Uchuku watalang mwiur mulong wa kushinshikin ngond ni atutumbu. Ulondin anch: “Yipan yiney yidiokila kud Yehova yikat kwinletin musangar ni kwinkasikesh.” Anch tud in kujikitish mulong wa yom ya mu spiritu ni ya ku mujimbu yitwinkishinau kud Yehova, tukwikal ni musangar ku muchim, ni musangar winou ukutwish kutukwash kujijaman.

17. Mazu madia mu 1 Pita 1:6, 7 makutwish mutapu ik kumukwash muntu ukutwisha kurish ni yikokujol mud yarishay nich Jovidon?

¹⁷ Chikwau kand, Jovidon wateka difukwil dia Yehova pa ndond yakusambish. Wading wij usey wa kudandamen kulam kushinshaman kwend kud Nzamb wakin. Yesu walonda anch: “Chifanyidin kumwifukwil [Yehova] Nzamb wey, ni kumusadil ndiy kusu!” (Luka 4:8) Amakurump a amasalay ni amasalay au akata anch Jovidon alikap relijon wend. Pakwez, wamulembilang Yehova muten ni uchuku, ni wamwitang ukwash mulong wa kushal ushinshamena. Chikalap nchik yom yiyimp yamusalau, Jovidon washala ushinshamena. Mud chibudikin, ukwet katat musangar nakash, mulong ukwet ritiy rapakinau, chom chading chiburedinay kurutu kwa kumusend kwol kwend ku usu, kumubul nfimbu, ni kumutek mu rukan.—Tang 1 Pita 1:6, 7.

18. Mutapu ik tukutwisha kulam musangar wetu?

¹⁸ Yehova wij yom tuswirikedina mulong wa kwikal kamu ni musangar wakin. Anch wasadin yom yisatu yikata kulet musangar wakin, ukutwish kulam musangar wey chikalap nchik yikokujol ukutwisha kurish nich. Chawiy niyey ukutwish kulond anch: “Ayuk kwau antu amukweta [Yehova] kwikal Nzamb wau!”—Kus. 144:15.