Kuburen Kwa Ukash Uwamp wa mu Manangu pa Mangand Mawonsu
“Yisu yivud nikat kwiyakamishang mu chilik kanang, ap anch nid kwam amwinam.”
“Anch niyov kamu nawamp nakash, nikat kwiyakamishang. Nijing anch, ang nov musangar nakash kwinsudien ching kamu nov ushon.”
“Nisadining usu wa kulam mu manangu anch dichuku ni dichuku dikweting milong yad. Pakwez yisu yimwing nikat kwiyakamish mulong wa yom yikwau.”
Mazu minam amalondin kud antu ayedina mu manangu. Ov, ey amwiney ap muntu mukwau ulamina wiyovilap kal mwamu?
Ikal ni kashinsh anch udiap kwey amwiney. Antu avud nlel arishin ni kuburen kwa ukash uwamp wa mu manangu, chikala wa ayinau ap wa akatish nau.
Chakin kamu, tud mu “machuku ma mar nakash” matuletidina yakamish yivud. (2 Timote 3:1) Rapor umwing ulejen anch, pa mangand mawonsu, piswimp muntu umwing pa antu chinan urishin ni kanvundangesh ka mu manangu. Mulong wa chipupu cha KOVID-19, mu muvu 2020 kwiwejidin antu piswimp 26 pa chitot ading arishina ni yakamish kusutamu mu muvu wa 2019, kwiwejin kand antu piswimp 28 pa chitot ading aziyina nakash kusutamu mu muvu wa 2019.
Chid cha usey kwijik anch antu avud nlel arishin ni yakamish ni kuziy nakash. Pakwez chid cha usey nakash kwijik mutapu ukutwisha ey ni akatish ney kwiyov nawamp mu chilik chiwanyidina.
Ukash wa mu manangu chom ik?
Ukash uwamp wa mu manangu ud mutapu wa mashakamin mawamp mukutwishay muntu kwiyov nawamp ni kusal yom nawamp. Ukutwish kupandakan yakamish, kusal mudimu ni kutan yibudikin yiwamp, ni kusanger mwom.
Kanvundangesh ka mu manangu . . .
CHIDIAP chibudikin cha kuziy kwa muntu.
UD mwikadil wa chiumwingang ukata kulet yakamish nakash, kanrumbangesh mu manangu, ni mu yisal.
Kakutwish kusal anch muntu aburena kuta urund nau antu akwau ni kupwish milong ya pichuku pichuku.
Kakutwish kwikal ni usu pad antu a yimbu, tubil, ulombu wa chikit, michid, relijon, ndond, ap akweta mapit kushalijan.
Kukimb ukwash mulong wa mayej ma mu manangu
Anch ey ap mwan amakwey urishinany ni milong yeney mu mwom wen, kuker tul ap kulik kwov ja kudia, ap kuziy nakash, kwiyakamish, ap ushon, ukutwish kuswiriken ukwash wa dokter mulong wa kujingunin yom yisadina anch wiyova mwamu. Pakwez kwisu ukutwisha kutan ukwash?
Yesu, Kristu ikundj wadinga ni manangu nakash walonda anch “Antu akash kakuswirinangap mwingang, ching kusu antu ayedila.” (Mateu 9:12) Antu akata kurish nich mayej anch atambul ukwash wa chiumwingang akutwish kukepish yijingidij ya mayej minamni ni chikutwish kuyikwash kwikal ni mwom usangareshina. Chid cha manangu kud antu inay kwiyokish pakad kulab kwiyokish anch yijingidij yiney yid yikash ap yikata kusal machuku mavud.a
Ap anch Bibil kadiap buku wa chimwingang, yiyul yidiamu yikutwish kutukwash kurish ni ukash wetu wa mu manangu. Tukwitin kushinshikin mitu ya milong yilondwilaku ey yisambidina mutapu ukutwishay Bibil kutukwash kurish ni milong ya ukash wa mu manangu.
a Chinong cha Kalam chilejenap yom yawonsu kwiyokish. Muntu ni muntu ufanyidin kushinshikin nawamp yitongijok yend ap yom yifanyidinay kusal kurutu akwata mupak.