Ov, Ukwet Ritiy?

Mulong wa kumusangaresh Yehova, tufanyidin kwikal ni ritiy. Pakwez, Bibil ulondin anch ‘kadap antu awonsu akweta ritiy.’ (2 Ts. 3:2) Kambuy Paul wading ulondin piur pa “antu ayimp, in chisum,” amuzengolang. Pakwez yom yilondinay piur pa ritiy yiyitadin kand antu akwau. Antu amwing kakatap kwitiy anch kud Nzamb watanga yom yawonsu. (Rom 1:20) Akwau akutwish kulond anch akat kwitiyij mu chom ap mu muntu kanang ukweta usu nakash. Pakwez kwitiyij kwinoku akwinaku kuwanyidinap mulong wa kumusangaresh Yehova.

Tufanyidin kwikal nich kashinsh anch Yehova udaku ni ukat kuyifut antu akweta ritiy rikash. (Heb. 11:6) Ritiy chid chikunku cha dibuj da spiritu utumbila. Mulong wa kutambul spiritu utumbila, tufanyidin kumwitay Yehova mu malembil. (Luk. 11:9, 10, 13) Mutapu ukwau wa kwikal nich spiritu utumbila ud wa kutang Bibil wapepilau. Kupwa tukutwish kutongijokin pa yom tutangina ni kuyisadin. Mwamu spiritu wa Yehova ukutwish kwikal ni usu mu mwom wetu, ni kutukwash kwikal ni ritiy rikumusangaresha Yehova.