Mintizro ya Vapostola

19 Na Apolosi a ha li Korinte, Pawulo a tsremakanya hi makazri ka miganga ya le Aziya a fulamela a tlhasa Efesa. Lani a kumiki vadondzrisiwa va kukazri 2 a va vutisa a ku: “A nkama lowu mi viki vapfumeli mi yamukele moya wa ku xwenga?” va mu hlamula va ku: “A hi ngi ngi swi twa leswaku ku ni moya wa ku xwenga.” 3 Xileswo a ku: “I babatiso dzra muxaka muni ledzri mi babatisiwiki ha dzrone?” Vone va ku: “Hi babatisiwe hi babatiso dzra Yohane.” 4 Pawulo a ku: “Yohane a babatise hi babatiso ledzri yimelaka ku tisola, a byela vhanu leswaku va ndzruluka va pfumela ka lweyi a taka ntsrhaku kwake, ku nga Yesu.” 5 Loko va twa leswo, va babatisiwa hi vito dzra Hosi Yesu. 6 Kutani loko Pawulo a va tlhanteka mavoko, va yamukela moya wa ku xwenga va va va sungula ku vulavula hi tindzrimi timbeni va tlhela va profeta. 7 Hinkwavu a va li kolomu ka 12 wa vavanuna.

8 A a hamba a ya sinagogeni a ya vulavula na a nga txhavi ntxhumu ku dzringana tihweti tizrazru, a vulavula a tlhela a yanakanyisisa na vone hi ndlela ya ku va kholwisa mayelanu ni Mfumu wa Xikwembu Nkulukumba. 9 Kambe loko van’wana va titlanyalisa timbilu* va nga djuli ku pfumela, va vulavula ku biha mayelanu ni Ndlela a mahlweni ka xitsrhungu, a suka lani va nga kone a teka vadondzrisiwa a famba na vone, a dondzrisa siku ni siku a xikole xa Tirano. 10 A dondzrise ka xikole xolexo ku dzringana malembe mabidzri, lakakuva hinkwavu lava a va hanya a xifundzreni xa Aziya, Vayuda ni Vagriki, va twa zritu dzra Hosi.

11 Xikwembu Nkulukumba a a ya mahlweni a yentxa mahlolana lamakulu hi ku tizrisa Pawulo, 12 lakakuva nambiloko va khumba mizri wake hi mpahla kumbe hi ntuzro, va gama va swi teka va swi yisa ka mhunu lweyi a vabyaka, a a daheka, nambi ku li mademona a ma huma. 13 Kambe a Vayuda van’wana lava a va fambafamba va hlongola mademona, na vone va zame ku tizrisa vito dzra Hosi Yesu ka lava a va ni mademona; a va ku: “Hi vito dzra Yesu lweyi Pawulo a zrezraka mayelanu na yene, na ku zruma, huma.” 14 A ku ni 7 wa vana va xinuna va muprista lwenkulu wa Muyuda lweyi a vitaniwaka Skevha, lava na vone a va yentxa leswo. 15 Kambe a demona dzri va hlamula dzri ku: “Na mu tiva Yesu, na ye Pawulo ni mu tolovelile, kambe n’wine mi vamani?” 16 Xileswo wanuna lweyi a a ni demona a va tlulela, a dliva ha mun’wemun’we, a va hlula lakakuva va huma ka muti wolowo hi ku tsrutsruma na va nga yambalanga ntxhumu na futsrhi va vavisiwile. 17 Leswo swi tiviwe hi hinkwavu lava a va hanya a Efesa, Vayuda kun’we ni Vagriki; kutani hinkwavu va sungula ku txhava, a vito dzra Hosi Yesu dzri ya mahlweni dzri twalisiwa. 18 Nakone vanyingi lava viki vapfumeli a va buya va hlaya swidoho swavu va tlhela va paluxa mintizro yavu va nga fihli ntxhumu. 19 Nakunene, vhanu va vanyingi lava a va tizrisa masalamusi va buyise mabuku yavu va ma hlengeleta va ma hisa na va voniwa hi vhanu hinkwavu. Loko ku kontiwa mali leyi tizrisiwiki akuva ma xaviwa, ku ve 50.000 wa mali ya prata. 20 Hi kola ka ntamu wa Yehovha a zritu dzrake dzri ye mahlweni dzri hangalaka dzri tlhela dzri hlula.

21 Ntsrhaku ka loko ku yentxeke leswo, Pawulo a kunguhate leswaku ntsrhaku ka ku suka a Makedoniya ni le Akaya, a a ta yendzra a ya a Yerusalema. A te: “Loko kutani ni yile a Yerusalema ni fanela ku ya ni le Roma.” 22 Xileswo a zrumela vapfunisi vake vabidzri a Makedoniya, Timotewu na Eraxtu, kambe yene a tama a tsrhama a xifundzreni xa Aziya ku dzringana nkamanyana.

23 Hi nkama wolowo ku va ni mpfilumpfilu yikulu mayelanu ni Ndlela. 24 Hikusa wanuna wa kukazri lweyi a vitaniwaka Demetriyo, lweyi a a hambe switempelana swa Artemisi hi prata, a a ganyise vhanu vanyingi lava a va tizrisana na yene. 25 A va hlengeleta kun’we ni vambeni lava a va kota ku yentxa ntizro wolowo, a ku: “Vavanuna, mi swi tiva ha hombe leswaku hi za hi ganya hi ku tasi hi mhaka ya ntizro lowu. 26 Swoswi ma swi vona ni ku swi twa leswaku lweyi va liki i Pawulo a kholwise xitsrhungu xa xikulu a tlhela a xi yentxa xi txintxa mayanakanyela, a hlaya leswaku a swikwembu leswi yentxiwiki hi mavoko a hi swikwembu swa kakunene, leswo a nge swi hlaya ntsena a Efesa kambe a swi hlaye a xifundzreni hinkwaxu xa Aziya. 27 Handle ka leswo, leswi a swi nge ti yentxa leswaku ku dzreliwa ntsena a bindzru dzrezru, kambe swi ta yentxa ni leswaku tempele dzra xikwembu lexikulu Artemisi dzri voniwa dzri nga ha li dzra ntxhumu, a xikwembu lexi xi nga ha gandzreliwi nambi ku dzrumisiwa a xifundzreni hinkwaxu xa Aziya ni le misaveni hinkwayu.” 28 Loko vavanuna lavo va twa leswo, va hlundzruka va bandlukana va ku: “I mukulu Artemisi, xikwembu xa Vaefesa!”

29 Xileswo a doropeni ku va ni yimayima, hinkwavu va tsrutsruma va nghena ka sala ledzri a ku hambeliwa ka dzrone teyatru na va kokovisa Gayu na Arixtaku vavanuna va le Makedoniya, lava a va fambafamba na Pawulo. 30 Pawulo a a swi djula ku nghena a ya vulavula ni vhanu, kambe a vadondzrisiwa a va mu pfumelelanga. 31 Nambi van’we va valulamiseli va minkhuvu ni mintlangu lava a va ni xinghanu na yene, va zrume vhanu leswaku va ya mu ba ndleve akuva a nga tipeti nghozini hi ku va a nghena ka sala ledzri a ku hambeliwa ka dzrone teyatru. 32 Nakunene van’we a va huwelela va hlaya leswi, na van’wana va hlaya leswiya; hikusa a xitsrhungu a xi li ka yimayima, nakone a xi nga swi tivi leswaku ha yini a xi ye hlengeletana lahaya. 33 Xileswo a Vayuda va susa Alexandri ka xitsrhungu, na va mu txhovhetela va mu zrangisa phambeni, kutani Alexandri a tlakuxa voko a kombisa leswaku a djula ku vulavula a tiyimelela ka vhanu. 34 Kambe loko va tsrumbula leswaku i Muyuda, hinkwavu va sungula ku bandlukana ku dzringana kolomu ka mawora mabidzri va hlaya ntxhumu wa wun’we va ku: “I mukulu Artemisi, xikwembu xa Vaefesa!”

35 Loko hi wugamu adminixtradori wa doropa a kote ku miyeta xitsrhungu, a te: “Vavanuna va Efesa, i mani lweyi nakunene a kalaka a nga swi tivi leswaku a doropa dzra Vaefesa hi dzrone dzri hlayisaka tempele dzra Artemisi lwenkulu, ni xifaniso lexi wiki hi le tilweni? 36 Leswi ku nga leswaku a ku na mhunu lweyi a nga yi phikaka mhaka leyi, mi fanele mi zrula, mi nga yentxi ntxhumu hi magugu. 37 Hikusa vavanuna lava mi va buyise lani nakasi a va yivi matempele, nambi ku zruka xikwembu* xezru. 38 Kutani loko Demetriyo kun’we ni lava a tizrisanaka na vone va ni mhaka ni mhunu wa kukazri, ku ni masiku lawa matribunali ma tizraka ha wone nakone ku na vagovhernadori, hi lava va faneliki va ya mangala ka vone. 39 Kambe loko mi djula swa ku tlula leswi, a mhaka yi fanela ku tsremiwa hi ku landzra nawu hi nhlengeletanu ya doropa. 40 Hikusa nakunene hi le nghozini ya kuva hi voniwa nandzru wa ku pfukela mfumu hi mhaka ya leswi yentxekiki namunhla, hikusa a hi na xivangelo lexi twisisekaka xa ku hi nga xi nyikela, xa leswaku hi mhaka muni ku va ni yimayima leyi.” 41 Kutani ntsrhaku ka ku hlaya leswo, a hangalasa xitsrhungu.