Mintizro ya Vapostola
21 Ntsrhaku ka loko hi tsravukane na vone na hi vavisekile, hi wele hi ya tlhasa Kosi, hi mundzruku ka kone hi ya Rhoda hi gama hi suka Rhoda hi ya Patara. 2 Loko hi kume boti ledzri a dzri ya Fenikiya, hi khwele hi famba. 3 Hi tlhase lani a hi kota ku vona xihlale xa Kipra, kambe hi xi khaluta hi xi siya hi tlhelo dzra ximatsri* hi wela hi ya Siriya, hi tlhasa hi yima a Tiri lani boti a dzri xixa mintsrhwalu ya dzrone. 4 Hi djuleteli vadondzrisiwa hi za hi va kuma hi va hi tsrhama na vone ku dzringana 7 wa masiku. Kambe hi ku susumetiwa hi moya wa ku xwenga a vadondzrisiwa a va tsrhamela ku byela Pawulo leswaku a nga yi a Yerusalema. 5 Loko yi txhayile ya ku va hi famba, hi suke hi famba hi ya mahlweni ni liyendzro dzrezru kambe vone hinkwavu, ni vavasati kun’we ni vana, va hi hekete hi za hi huma doropeni. Kutani hi tlhase hi khinsama a lwandle hi khongota 6 hi gama hi lelelana. Ntsrhaku ka leswo hi khwela boti kambe vone va tlhelela makaya kwavu.
7 Ntsrhaku ka leswo hi suke Tiri hi boti hi ya tlhasa Pitolemayi, hi losa vamakwezru hi tlhela hi tsrhama na vone siku dzrin’we. 8 Hi siku ledzri landzreliki hi suke hi ya Khezariya, hi tlhasa hi nghena kaya ka Filipi muevhangeli, lweyi a a li mun’we wa vavanuna va 7,* kutani hi tsrhama na yene. 9 Wanuna lweyi a a ni mune wa vana va van’hwanyana lava a va nga txhatanga* lava a va profeta. 10 Kambe ntsrhaku ka loko hi tsrhame kohala ku dzringana masikunyana, ku te muprofeta wa kukazri lweyi a vitaniwaka Agabu lweyi a a pfa Yudeya. 11 Kutani a tlhasa lani a hi li kone a teka bandhi dzra Pawulo a titsrimba milenge ni mavoko a ku: “A moya wa ku xwenga wu li: ‘A n’winyi wa bandhi ledzri a ta tsrimbiwa hi ndlela leyi hi Vayuda a Yerusalema, va tlhela va mu nyikela mavokweni ya vhanu va matiko.’” 12 Loko hi twe leswo, hine kun’we ni lava a va li kolanu hi sungule ku mu kombela leswaku a nga tlhantuki a ya Yerusalema. 13 Kutani Pawulo a hlamula a ku: “Mi dzrilela yini, nakone ha yini mi dzringisa ku ni heta ntamu?* Tiyisekani leswaku ni lulamele ku nga li ntsena ku tsrimbiwa kambe ni ku fa a Yerusalema hi kola ka vito dzra Hosi Yesu.” 14 Loko hi xiya leswaku a nga txintxi makungu yake, hi tsrhike ku mu sindzrisa* hi hlaya leswi: “A ku yentxeki ku zrandzra ka Yehovha.”
15 Kutani ntsrhaku ka masiku lawo, hi lulamisele liyendzro hi va hi ya Yerusalema. 16 Van’we va vadondzrisiwa va le Khezariya na vone va fambe na hine, va hi heleketa ka Minasoni wa le Kipra, mun’we wa vadondzrisiwa va ku sungula lweyi a hi ta yendzrela kaya kwake. 17 Loko hi tlhase Yerusalema, vamakwezru va hi yamukele hi ku nyonxa. 18 Hi mundzruku ka kone Pawulo a fambe na hine hi ya kumana na Yakobe, nakone vakulu hinkwavu a va li kone. 19 Kutani a va losa a va a sungula ku va tlhamuxela hi wunyaminyami leswi Xikwembu Nkulukumba a swi yentxiki ka vamatiko hi ku tizrisa ntizro wa ku zrezra lowu yene a wu yentxiki.
20 Loko va twa leswo, va sungula ku dzrumisa Xikwembu Nkulukumba, kambe va mu byela va ku: “Wa swi vona makwezru leswaku ku ni magidigidi ya Vayuda lava viki vapfumeli nakone hinkwavu va wu hisekela Nawu. 21 Kambe va twe mavalivali ya leswaku u dondzrisa Vayuda hinkwavu a xikazri ka vamatiko akuva va lwisana ni Nawu wa Moxe, u va byela leswaku va nga sokisi vanavu kumbe ku landzra swihena. 22 Hi fanela ku yentxa yini mhakeni leyi? Phela va ta swi twa leswaku u tlhasile. 23 Kutani yentxa leswi hi ku byelaka swone: Hi ni mune wa vavanuna lava tiyentxeliki xihlambanyu. 24 Teka vavanuna lava u famba na vone mi ya tibasisa hi ku ya hi Nawu u tlhela u va hakelela akuva va tsremetiwa misisi. Kutani hinkwavu va ta swi tiva leswaku a mavalivali lawa va ma hlayiki mayelanu na wene a hi ntiyiso kambe wene u yentxa mintxhumu hi ndlela leyi nga yone nakone na wene wa wu hlayisa Nawu. 25 Kambe a vapfumeli lava pfaka hi ka vamatiko, hi va zrumele leswi hi kunguhatiki swone, hi va tsralele leswaku va fanela ku tsrhika mintxhumu hinkwayu leyi nyikeliwiki ka swithombe, ngati, swihazri leswi fiki hi ku tlimbiwa nkolo* ni swiyentxo swa tingana hi tlhelo dzra tinkuku.”*
26 Kutani hi mundzruku ka kone, Pawulo a teka vavanuna lavo a ya tibasisa kun’we na vone hi ku landzra Nawu, a gama a nghena tempeleni akuva a va tivisa leswaku a masiku ya ku tibasisa hi ku landzra Nawu ma ta hela siku muni ni leswaku mun’wana ni mun’wana wavu a fanela ku yentxeliwa gandzrelo siku muni.
27 Loko Vayuda lava a va buya hi Aziya va mu vona tempeleni, na masiku lawa ya 7 ma ya ku heleni, va hlohlotela xitsrhungu hinkwaxu, va gama va mu khoma, 28 va bandlukana va ku: “Vavanuna va Israyele hi pfunani! Wanuna lweyi hi lweyi a dondzrisaka vhanu hinkwavu a mimbangwini hinkwayu akuva va lwisana ni vhanu vezru, Nawu wezru kun’we ni mbangu lowu. Ximbenyani futsrhi, a nghenise nambi ku li Vagriki a tempeleni a nyamisa mbangu lowu, lowu xwengiki.” 29 Va hlaye leswo hikusa va sungule va vona Pawulo a doropeni na a na Trofimo wa Muefesa, va gama va yanakanya leswaku a mu nghenise tempeleni. 30 A doropa hinkwadzru a dzri li ka yimayima, kutani vhanu va tsrutsruma va tlhasa va khoma Pawulo va mu kokovisa va mu humesa handle ka tempele, ku va ku tekela ku pfaliwa swipfalu. 31 Nkama lowu a va zama ku mu dlaya, a muzrangeli wa yimpi a tlhaseliwa hi ndzrava ya leswaku a doropeni hinkwadzru dzra Yerusalema ku ni yimayima; 32 A vhela a teka masotxha ni vazrangeli va wone va fulamela hi ku tsrutsruma va va yela. Loko vhanu va vona muzrangeli wa yimpi ni masotxha, va tsrhika ku bukutela Pawulo.
33 Kutani a muzrangeli wa yimpi a tlhasa a mu khoma, a zrumisa leswaku a tsrimbiwa hi matxhini mabidzri; a gama a mu vutisa leswaku hi yene mani nakone a hone yini. 34 Kambe van’wana ka xitsrhungu va sungula ku bandlukana va hlaya leswi, na vambenyani va hlaya leswiya. Kutani leswi muzrangeli wa yimpi a a hluleka ku twisisa leswaku ku yentxeke yini hi mhaka ya leswi a va hamba pongwe, a va zruma leswaku va mu teka va famba na yene a bazini dzra masotxha. 35 Kambe loko a tlhasa lani a ku ni swikada, swi sindzrise leswaku a tlakuliwa hi masotxha hikusa a xitsrhungu a xi djula ku mu vavisa, 36 swanga hi leswi a xi tama xi va landzra, na xi bandlukana xi ku: “Dlayani lweyo!”
37 Na Pawulo a li kusuhi ni ku nghenisiwa a bazini dzra masotxha, a vutisa muzrangeli wa yimpi a ku: “Na pfumeleliwa kuva ni ku byela swa kukazri?” A muzrangeli wa yimpi a ku: “Kasi wa khanela Xigriki? 38 A hi wene Muegipta lweyi a minkameni ya khale a hlohloteliki vhanu akuva va lwisana ni mfumu, a tlhela a zrangela 4.000 wa vadlayi akuva va nghena mananga?” 39 Kutani Pawulo a ku: “Nakunene ni Muyuda wa le Tarso a doropeni dzra Kilikiya, ledzri dumiki swinene. Xileswo ni kombela u ni pfumelela kuva ni vulavula ni vhanu.” 40 Loko a mu nyike mpfumelelo, Pawulo na a yime ka swikada a miyeta vhanu hi voko. Kutani loko ku te tititi, a vulavula na vone hi lidzrimi dzra Xiheberu, a ku: