Mintizro ya Vapostola
23 Pawulo a lavisisa huvo ya Sanedri a gama a ku: “Vavanuna, vamakwezru, ni nga hlaya a mahlweni ka Xikwembu Nkulukumba leswaku a lipfalu dzranga dzri ni byela leswaku a ni honanga ntxhumu ku ta tlhasa namunhla.” 2 Xileswo a muprista lwenkulu Ananiya a zruma lava a va yime kusuhi na Pawulo leswaku va mu ba nomu. 3 Kutani Pawulo a mu byela a ku: “Xikwembu Nkulukumba a ta ku ba, mukanganyisi ndzriwene. U tsrhama lani akuva u ta ni yavanyisa hi ku ya hi Nawu u tlhela u ndzruluka u tlula Nawu hi ku va zruma leswaku va ni ba?” 4 Lava a va yime kolanu va mu vutisa va ku: “Wo zruka muprista lwenkulu wa Xikwembu Nkulukumba?” 5 Kutani Pawulo a ku: “Vamakwezru, a ni nga swi tivi leswaku i muprista lwenkulu. Hikusa ku tsraliwile: ‘U nga txhuki u zruketela hosi yenu.’”
6 Hi ku tiva leswaku a huvo ya Sanedri yi vumbiwa hi Vasaduki ni Vafarisi, Pawulo a bandlukana a ku: “Vavanuna, vamakwezru, ni Mufarisi, n’wana wa Vafarisi. Ni yavanyisiwa hi mhaka ya leswi ni kholwaka ka ku pfuka ka vafi.” 7 Hi kuva a hlaye leswo, ku va ni ku phikisana a xikazri ka Vafarisi ni Vasaduki, kutani va yavana. 8 Hikusa a Vasaduki va hlaya leswaku a ku na ku pfuka ka vafi, a ku na tintsrumi nambi moya wa ku xwenga a wu kone, kambe a Vafarisi va pfumela* leswaku hinkwaswu leswo swi kone. 9 Xileswo ku va ni yimayima ya yikulu ngopfu swinene, kutani van’we va vatsrali va ntlawa wa Vafarisi va sekeleka va sungula ku va hlundzrukela ngopfu swinene, va ku: “A hi kumi xa ku biha ka wanuna lweyi, kambe loko moya wa ku xwenga kumbe ntsrumi ye vulavula na yene . . .” 10 Loko mholova yi kula ngopfu swinene, hi ku txhava leswaku Pawulo va nga mu handzrula hi makazri, a muzrangeli wa yimpi a zruma masotxha leswaku ma xika ma ya mu susa makazri kwavu hi ku kahlula, ma mu yisa bazini dzra wone.
11 Kambe a wusikwini ka kone a Hosi yi humelela kwake yi ku: “Vana ni xixixi! Hikusa ku fana ni leswi u nyikeliki wumboni hi ku helela mayelanu na mine a Yerusalema, u fanela ku tlhela u ya nyikela wumboni ni le Roma.”
12 Loko byi xa, a Vayuda va kunguhata ku dlaya Pawulo va tlhela va hlambanya va hlaya leswaku a va nge di ntxhumu kumbe ku nwa swa kukazri na va nga si na mu dlaya. 13 Vavanuna lava yentxiki kungu ledzro va tlhela va hlambanya a va tlula kolomu ka 40 wa vone. 14 Vavanuna lava va ye ka vaprista lavakulu ni vakulu va tlhasa va ku: “Hi yentxe xihlambanyu xa leswaku* a hi nge ti da ntxhumu nikutsrongo na hi nga si na mu dlaya Pawulo. 15 Xileswo, n’wine kun’we ni huvo ya Sanedri mi fanela ku byela muzrangeli wa yimpi leswaku a fanela ku mu buyisa halenu kwenu, mi yentxa ingiki hi loko mo djula ku kambisisa mhaka yake ha hombe. Kambe na a nga si na tlhasa hi ta va na hi lulameli ku mu dlaya.”
16 Nambitanu, a n’wana wa makwavu wa Pawulo wa xisati a dzri twile kungu dzravu, a gama a nghena bazini dzra masotxha a byela Pawulo. 17 Kutani Pawulo a vitana mun’we wa muzrangeli wa masotxha a ku: “Teka djaha ledzri u dzri yisa ka muzrangeli wa yimpi, hikusa ku ni leswi dzri djulaka ku mu byela swone.” 18 Xileswo a dzri teka a famba na dzrone ka muzrangeli wa yimpi a tlhasa a ku: “Pawulo lweyi wa xib’otxhwa a ni vitanile a tlhasa a ni byela leswaku ni buyisa djaha ledzri kwaku hikusa dzri ni swa kukazri dzri djulaka ku ku byela swone.” 19 A muzrangeli wa yimpi a dzri khoma hi voko a dzri kokela tlhelweni a dzri vutisa a ku: “I yini leswi u djulaka ku ni byela swone?” 20 A djaha dzri ku: “A Vayuda va pfumelelane ku ku kombela kuva mundzruku u yisa Pawulo a Sanedri, kambe va swi yentxa ingiki hi loko vo djula ku tiva swinyingi mayelanu ni mhaka yake. 21 Kambe u nga pfumeli va ku wonga, hikusa ku ni ku tlula 40 wa vavanuna lava mu tumbeleliki, va ve va hlambanya* leswaku a va nge di ntxhumu kumbe ku nwa xa kukazri na va nga si na mu dlaya, nakone swoswi va lulamile vo yimela leswaku u pfumela xikombelo xavu.” 22 Xileswo ntsrhaku ka loko muzrangeli wa yimpi a dzri byele a ku: “U nga byeli mhunu leswaku u ni byelile mhaka leyi”, a dzri tsrhika dzri famba.
23 Kutani a vitana vazrangeli vabidzri va masotxha a ku: “Lulamisani 200 wa masotxha, ni 70 wa vavanuna lava fambaka hi makavhalu kun’we ni 200 wa vavanuna lava nga vakhomi va matlhazri, akuva kolomu ka ma 21 wora* va ya Khezariya. 24 Nakone mi djulela Pawulo makavhalu lawa a taka famba ha wone, akuva a tlhasa na a hlayisekile ka govhernadori Felekisi.” 25 A gama a tsrala papela ledzri a dzri ku:
26 “Mine Klawudiyu Liziya, ni tsralela wene nkulukumba, Govhernadori Felekisi: Xawani! 27 Wanuna lweyi, a a khomiwe hi Vayuda nakone a va djula ku mu dlaya kambe mine ni masotxha yanga hi fambe hi ku kahlula hi tlhasa hi mu huluxa, hi kuva ni tive leswaku i Muroma. 28 Kutani hi ku djula ku tiva leswi va mu lumbetaka ha swone, ni mu yise ka huvo ya Sanedri. 29 Ni kume leswaku leswi va mu lumbetaka ha swone swi yelana ni Nawu wavu, a nga dohanga ntxhumu lowu nga yentxaka a faneliwa hi ku dlayiwa kumbe ku khomiwa a pfaleliwa djele. 30 Kambe leswi ni byeliwiki leswaku va kunguhate ku mu dlaya, ni vhela ni mu zrumela kwaku ni tlhela ni byela lava va mu lumbetaka akuva va ta swi hlaya mahlweni kwaku.”
31 Xileswo a masotxha ma teka Pawulo hi lani muzrangeli wa yimpi a ma zrumiki ha kone, ma famba na yene a wusikwini ma mu yisa ka Antipatrisi. 32 Hi mundzruku ka kone a masotxha lawa a ma famba hi makavhalu ma ye mahlweni ma famba na yene, kambe laman’wana ma tlhelela bazini dzra wone. 33 A masotxha lawa a ma famba hi makavhalu ma tlhasa Khezariya ma nyikela papela ka govhernadori ma tlhela ma mu siya na Pawulo. 34 Xileswo a dzri dondzra a gama a vutisa Pawulo leswaku i wa xifundzra xa kwini, yene a mu byela leswaku i wa le Kilikiya. 35 Govhernadori a ku: “Loko lava va ku lumbetaka va tlhasa ni ta yingiseta mhaka yaku hinkwayu.” A tlhela a zrumisa leswaku va mu pfalela ndlwini ya wuhosi ya Heroda va tsrhama na va mu vonelela.