Mintizro ya Vapostola

6 A masikwini wolawo na vadondzrisiwa va ya va yengeseleka, a Vayuda lava vulavulaka Xigriki va sungule ku holovisana ni Vayuda lava vulavulaka Xiheberu hikusa siku ni siku loko ku phakeliwa swakuda a vafelwa vavu a va nga nyikiwi ntxhumu. 2 Kutani a vapostola lava 12 va hlengeleta xitsrhungu xa vadondzrisiwa, va ku: “A hi swinene* kuva hi tsrhika zritu dzra Xikwembu Nkulukumba akuva hi yima mimenzeni hi yavela swakuda. 3 Xileswo, vamakwezru, tihlawulelani 7 wa vavanuna makazri kwenu lava nga ni ndhuma leyinene* nakone va taliki hi moya wa Xikwembu Nkulukumba ni wutlhazri, akuva hi va nyika ntizro lowu wa lisima. 4 Kambe hine hi ta tinyiketela a ku khongoteni ni le ku dondzriseni ka zritu dzra Xikwembu Nkulukumba.” 5 Leswi va swi hlayiki swi nyonxise xitsrhungu hinkwaxu, kutani xi hlawula Stefanu wanuna lweyi a a ni lipfumelo ledzrikulu nakone a a tale hi moya wa ku xwenga, kun’we na Filipi, Prokoro, Nikanori, Timoni, Parmenasi na Nikolawu, muproselita wa le Antiyokiya, 6 xi va buyisa ka vapostola. Kutani ntsrhaku ka loko vapostola va hambe xikhongoto, va va tlhanteka mavoko.

7 Leswo swi yentxe leswaku a zritu dzra Xikwembu Nkulukumba dzri ya dzri hangalaka, a nhlayu ya vadondzrisiwa yi ya yi yengeseleka ngopfu swinene a Yerusalema ni leswaku xitsrhungu xa xikulu xa vaprista xi ndzruluka vapfumeli.

8 Stefanu lweyi a a yamukeleka ka Xikwembu Nkulukumba nakone Xikwembu Nkulukumba a a mu nyike ntamu lowukulu, a a yentxa mahlolana ni swihlamaliso leswikulu a vhanwini. 9 Kambe ku te vavanuna va kukazri lava a va li va ntlawa lowu vitaniwaka Sinagoga dzra Vhanu lava Ntsrhunxiwiki, na va li xikan’we ni vhanu va kukazri lava a va huma Kirene ni le Alexandriya, kun’we ni van’wana lava a va huma Kilikiya ni le Aziya, va tela ku ta phikisana na Stefanu. 10 Nambitanu a va swi kotanga ku mu hlula hikusa a a vulavula hi wutlhazri ni hi ku pfuniwa hi moya wa ku xwenga. 11 Kutani va hlohlotela vavanuna va kukazri a xihundleni leswaku va hlaya va ku: “Hi mu yingele na a vulavula ku biha ngopfu swinene hi Moxe na Xikwembu Nkulukumba.” 12 Va hlohlotele xitsrhungu, vakulukumba kun’we ni vatsrali, kutani va mu yela na a nga swi yimelanga, va tlhasa va mu khoma hi nkanu va mu yisa Sanedri. 13 Va gama va buyisa timboni ta madzrimi leti tlhasiki ti ku: “Wanuna lweyi a nga tsrhiki ku vulavula ku biha hi tempele dzra Xikwembu Nkulukumba ni hi Nawu. 14 Hi xikombiso, hi mu yingele na a hlaya leswaku Yesu wa Munazareta a ta gilhita tempele ledzri a tlhela a txintxa milawu leyi Moxe a hi nyikiki yone.”

15 A nkama lowu hinkwavu lava a va tsrhame Sanedri va mu pondzroleliki, va vone leswaku a wuso byake a byi fana ni bya ntsrumi.