Mintizro ya Vapostola
25 Kutani ntsrhaku ka loko Fextu a tlhase xifundzreni xa Yudeya a yamukela wuhosi, a tsrhame masiku mazrazru a gama a suka Khezariya a tlhantuka a ya Yerusalema. 2 A vaprista lavakulu ni vavanuna va ndhuma va Vayuda, va mu nyika dzrungula ledzri a va lumbeta Pawulo ha dzrone. Xileswo va sungula ku kombela Fextu 3 leswaku a va komba wumbilu a zrumela Pawulo a Yerusalema. Kambe a va kunguhate kuva va tumbelela Pawulo a ndleleni va ta mu dlaya. 4 Nambitanu, Fextu a hlamule hi ku hlaya leswaku Pawulo a fanela ku tsrhama Khezariya a tlhela a hlaya leswaku na yene a kusuhi ni ku tlhelela kohala. 5 A ye mahlweni a ku: “Xileswo tsrhikani lava va mi zrangelaka va fulamela na mine, va ya hlaya leswi va nga na swone mayelanu na yene loko nakunene a ni nandzru wa kukazri.”
6 Xileswo loko a tsrhame na vone kolomu ka 8 wa masiku kumbe 10, a suka a fulamela a ya Khezariya, kutani hi mundzruku ka kone a tsrhama xitsrhan’wini xa wuyavanyisi a gama a zrumisa leswaku ku buyisiwa Pawulo. 7 Loko a nghenile, a Vayuda lava a va buye hi Yerusalema va mu tsrandzrela, va mu lumbeta mintxhumu ya yinyingi ya ku txhavisa ya ku va hluleka ni ku yi tiyisekisa.
8 Kambe Pawulo a tihlamulela a ku: “A ni tlulanga Nawu wa Vayuda nambi ku li wa tempele kumbe wa Khezari.” 9 Hi ku djula ku nyonxeliwa hi Vayuda, Fextu a hlamula Pawulo a ku: “Wa swi djula ku tlhantuka u ya Yerusalema u ya yavanyiseliwa kone a mahlweni kwanga mayelanu ni mhaka leyi?” 10 Kambe Pawulo a ku: “Ni yime mahlweni ka xitsrhamu xa wuyavanyisi xa Khezari, ku nga lani ni fanelaka ku yavanyisiwa kone. A ni va dohelanga ntxhumu Vayuda hi lani na wene u swi vonaka ha kone. 11 Loko nakunene ni li mudohi kumbe ni yentxe ntxhumu wa kukazri lowu yentxaka ni faneliwa hi lifu, a ni yali ku fa; kambe loko ku nga na wumboni bya ku twisiseka mayelanu ni leswi vavanuna lava va ni lumbetaka swone, a ku na mhunu lweyi a nga ni mfanelo ya ku ni nyikela kwavu ntsena hi ku djula ku va nyonxisa. Ni kombela ku yisiwa ka Khezari!” 12 Kutani ntsrhaku ka loko Fextu a vulavule ni tindota take,* a hlamula a ku: “Leswi u kombeliki ku yisiwa ka Khezari, u ta yisiwa ka Khezari.”
13 Ntsrhaku ka loko ku khalute masikunyana, a Khezariya ku tlhase hosi Agripa na Bereniki akuva va ta pfuxela Fextu. 14 Leswi va tsrhamiki masiku ya manyinginyana kohala, Fextu a byele hosi mhaka ya Pawulo, a ku:
“Lani ku ni wanuna lweyi a siyiwiki djele hi Felekisi, 15 nakone na ni le Yerusalema a vaprista lavakulu ni vakulu va Vayuda va ni tlhamuxele dzrungula dzra kukazri mayelanu na yene, va kombela leswaku a khatisiwa. 16 Kambe ni va hlamule ni ku: A nawu wa Varoma a wu pfumeli leswaku mhunu wa kukazri a nyikeliwa akuva ku nyonxisiwa vhanu vambeni na a nga si na kumana ni lava va mu lumbetaka akuva a ta kuma mukhandlu wa ku tihlamulela a mahlweni kwavu. 17 Xileswo loko va tlhase lani a na ha yimayimanga, kambe hi mundzruku ka kone nhe vhela ni tsrhama xitsrhan’wini xa wuyavanyisi ni zrumisa leswaku wanuna lweyo a buyisiwa. 18 Loko lava a va mu lumbeta va sekeleka, a va hlayanga mintxhumu ya ku biha leyi a ni yanakanya leswaku kumbexana a nga va na a yi yentxile. 19 Kambe ntsena ve phikisana na yene mayelanu ni wukhongoti byavu* ni hi wanuna lweyi a vitaniwaka Yesu, lweyi a a file kambe Pawulo a a tsrhamela ku hlaya leswaku awa hanya. 20 Leswi a swi ni hlula ku tlhantlha mhaka leyi, ni mu vutise leswaku awa swi djula ku yisiwa Yerusalema akuva a ya thethisiwa kone ke. 21 Kambe loko Pawulo a kombele ku tama a tsrhama djele na a yimela xiboho xa Aguxtu wa ku Sungula,* ni mu byele leswaku a a tame a tsrhama djele ku ya tlhasa loko ni mu zrumela ka Khezari.”
22 Kutani Agripa a byela Fextu a ku: “Ni navela ku mu yingela wanuna lweyo.” Fextu a ku: “U ta mu yingela mundzruku.” 23 Xileswo hi mundzruku ka kone Agripa na Bereniki va buya na va yambale timpahla ta ku phatima va tlhela va gwira, va tlhasa va nghena lani a ku ni vayingiseti na va ni vazrangeli va yimpi kun’we ni vavanuna va ndhuma va doropa; ntsrhaku ka leswo, Fextu a byela masotxha leswaku ma buyisa Pawulo, kutani a buyisiwa. 24 Fextu a gama a ku: “Hosi Agripa na n’wine hinkwenu mi nga na hine lani, wanuna lweyi, hi lweyi Vayuda hinkwavu va ni kombeliki a Yerusalema ni kola, va huwelela va hlaya leswaku a nga ha faneliwi hi ku hanya. 25 Kambe ni xiye leswaku a nga yentxanga ntxhumu ni wun’we lowu mu yentxaka a faneliwa hi ku fa. Xileswo loko yene ha wuswake a kombele ku yisiwa ka Aguxtu wa ku Sungula, ni vone swi yampswa ku mu zrumela. 26 Kambe a ni na ntxhumu lexi ni nga xi tsralelaka Hosi yanga mayelanu na yene. Xileswo ni mu buyisa mahlweni kwenu hinkwenu ngopfungopfu kwaku, Hosi Agripa, akuva ntsrhaku ka loko a thethisiwile ni ta kuma swa ku swi tsrala. 27 Hikusa a swi twali kwanga kuva ni nga zrumela xib’otxhwa na ni nga hlayanga leswaku nandzru wa xone he wini.”