Madzrungula lamanene Lama Tsraliwiki hi Marka

14 A ku sale masiku mabidzri akuva ku va ni Paxkwa ni Nkhuvu wa Mapawu lawa ma kalaka ma nga txheliwanga Fermentu.* Nakone a vaprista lavakulu ni vatsrali a va djuletela maqhinga ya kuva va mu khoma akuva va mu dlaya; 2 hikusa a va ku: “Hi nga mu khomeni hi nkama wa nkhuvu, hikusa vhanu va nga txhuka va pfuxa mpfilumpfilu.”

3 Loko Yesu a li ku deni* a Betaniya a kaya ka Simoni lweyi a a ni nhlokonho, ku te wansati lweyi a a ni xigadzrana xa alabaxta lexi a xi ni mafuzra ya ku nun’hwela, lawa a ma hambiwe hi narda dzra dzrinene, ya ku dula ngopfu swinene. Kutani a pfula xigadzrana xolexo xa alabaxta a sungula ku mu txhela nhlokweni. 4 Loko va vona leswo, van’we va byelana na va kazratekile va ku: “Ha yini ku tlangiwa hi mafuzra lawa ya ku nun’hwela? 5 Hikusa a mafuzra lawa a ma ta xavisiwa hi mali ya ku tlula 300 wa madenari kutani mali ya kone yi nyikiwa swisiwana!” Xileswo, va mu kwatela ngopfu wansati yelweyo.* 6 Kambe Yesu a ku: “Tsrhikani wansati lweyi. Mi mu kazratela yini? I swinene leswi a ni yentxeliki swone. 7 Hikusa a swisiwana mi tsrhama na swone nkama hinkwawu, nakone mi nga swi yentxela wunene nkama wun’wana ni wun’wana lowu mi wu djulaka, kambe mine a mi nge ti va na mine nkama hinkwawu. 8 A yentxe leswi a swi kotiki, a txheli mizri wanga mafuzra ya ku nun’hwela, akuva a wu lulamisela na ni nge si na lahliwa. 9 Kunene na mi byela, kun’wana ni kun’wana lomu madzrungula lamanene ma taka zrezriwa kone a misaveni hinkwayu, leswi wansati lweyi a swi yentxiki swi ta khaneliwa akuva a dzrimukiwa ha swone.”

10 Kutani Yudasi Iskariyota lweyi a a li mun’we wa lava 12, a suke a ya khanelisana ni vaprista lavakulu hi nkongometo wa ku mu wonga a mu nyikela kwavu. 11 Loko va twa leswo, va nyonxa ngopfu, kutani va mu dumbisa ku mu nyika a mali ya prata. Xileswo a sungula ku djuletela mukhandlu wa ku mu wonga.

12 Kutani hi siku dzra ku sungula dzra Nkhuvu wa Mapawu lawa ma kalaka ma nga txheliwanga Fermentu,* ledzri a va tolovela ku nyikela magandzrelo ya Paxkwa hi dzrone, a vadondzrisiwa vake va mu vutisa va ku: “U djula hi ya ku lulamiselela kwini akuva u ta dela kone Paxkwa?” 13 Xileswo, a zruma vadondzrisiwa vake vabidzri a va byela a ku: “Fambani doropeni, mi ta tlhangana ni wanuna lweyi a zrwaliki hotsro ya mati. Mu landzrani, 14 lomu a taka nghena kone, byelani n’winyi wa muti mi ku: ‘Mudondzrisi a li: “Dzri kwini a sala dzra vayeni ledzri ni nga delaka ka dzrone a Paxkwa ni vadondzrisiwa vanga?”’ 15 Kutani a ta mi komba sala dzra dzrikulu ledzri kumekaka henhla, ledzri dzri nga ni leswi vilelekaka akuva hi dzri tizrisa. Hi lulamiselelani Paxkwa kolanu.” 16 Xileswo a vadondzrisiwa va famba, va nghena doropeni va swi kumisa xileswi Yesu a va byelisiki xiswone, kutani va lulamisela Paxkwa.

17 Loko dzri pelile, a ta ni lava 12. 18 Loko va tsrhame menzeni va li ku deni, Yesu a va byela a ku: “Kunene na mi byela, mun’we wenu lweyi a daka na mine a ta ni wonga.” 19 Kutani va sungula ku kazrateka va mu vutisa ha mun’we mun’we va ku: “Xana hi mine?” 20 A va hlamula a ku: “I mun’we wenu n’wine va 12, lweyi hi petaka voko xikan’we ka tijela. 21 Hikusa a N’wana wa mhunu awa famba, hi lani swi tsraliwiki ha kone mayelanu na yene, kambe khombo ka lweyi a wongaka N’wana wa mhunu! A swi ta yampswa loko mhunu wa kone a a nga pswaliwanga.”

22 Na va ha li ku deni, a teka pawu, a khongota, a dzri khemelela a gama a va nyika a ku: “Tekani mi da; dzri yimela mizri wanga.” 23 A tlhela a teka kopo dzra vhinyu, a hamba xikhongoto xa ku tlangela a gama a va nyika, kutani hinkwavu va nwa hi dzrone. 24 A va byela a ku: “Vhinyu ledzri dzri yimela ‘ngati yanga ya xipfumelelanu’, leyi taka halatiwa akuva ku pfuneka vhanu vanyingi. 25 Kunene na mi byela, a ni nge he txhuki ni nwa vhinyu ledzri ku ya tlhasa siku ledzri ni taka nwa vhinyu ledzrimpshwa a Mfun’wini wa Xikwembu Nkulukumba.” 26 Hi wugamu, ntsrhaku ka loko va yimbelelile va dzrumisa Xikwembu Nkulukumba,* va suka va ya Nhaveni ya Minhlwazri.

27 Kutani Yesu a va byela a ku: “Hinkwenu a lipfumelo dzrenu dzri ta tsrekatsreka,* hikusa ku tsraliwe leswi: ‘Ni ta ba mubyisi, kutani a tihamba ti ta hangalaka.’ 28 Kambe loko ni ta pfuxiwa ku feni ni ta ya Galileya, mi ta ya ni kuma kone.” 29 Kambe Petro a mu byela a ku: “Nambiloko lipfumelo dzra hinkwavu dzri ngo tsrekatsreka, dzranga a dzri nge ti tsrekatsreka.” 30 Loko Yesu a twa leswo, a mu byela a ku: “Kunene na ku byela leswaku namunhla, ina, wusiku byolebyi, na nkuku wu nga si na yimba kabidzri, u ta ni landzrula kazrazru.” 31 Kambe Petro a tama a phikelela a ku: “Nambiloko swi ngo djula ni fa na wene, a ni nge ti txhuka ni ku landzrula.” Ni lavan’wana hinkwavu na vone va sungula ku hlaya leswi fanaka.

32 Hiloko va tlhasa a mbangwini lowu vitaniwaka Getsemani, a byela vadondzrisiwa vake a ku: “Tsrhamani kola na ha ya khongota.” 33 A teka Petro, Yakobe na Yohane a famba na vone, kutani a sungula ku va ni gome ledzrikulu a tlhela a kazrateka ngopfu swinene. 34 A va byela a ku: “Ni tlhaveke ngopfu swinene a mbilwini yanga lakakuva nambi ku fa ni nga fa. Salani kola mi tama mi zrindzra.” 35 Kutani a tsrhindzreka kulenyana na vone, a khinsama a sungula ku khongota leswaku loko swi koteka, a nkama wolowo wa ku kazrata wu nga mu tlhaseli. 36 A ku: “Abba,* Papayi, mintxhumu hinkwayu ya koteka kwaku, susa kopo ledzri kwanga. Kambe, ku nga yentxeki ku zrandzra kwanga, a ku yentxeki ku zrandzra kwaku.” 37 Kutani loko a tlhela, a va kuma na va khutsriyelile, a byela Petro a ku: “Simoni, u le ku yetleleni? U hluleke ku tama u zrindzra nambi ko va wora dzrin’we? 38 Tsrhamani na mi zrindzrile, mi ya mahlweni mi khongota akuva mi nga weli ndzringweni. Nakunene, a mbilu ya swi djula, kambe a mizri a wu na ntamu.” 39 A tlhela a suka a ya khongota, a hlaya mintxhumu yoleyi ya yin’we. 40 A tlhela a buya a va kuma na va khutsriyelile, hikusa a matihlo yavu a ma bindzriwa hi wuzrongo, xileswo va pfumali ni xa ku mu byela xone. 41 Kutani a tlhela a buya ka vadondzrisiwa vake hi khambi dzra wuzrazru a va byela leswi: “Mi le ku yetleleni mi wisa hi nkama wa ku fana ni lowu! Tsrhikani ku yetlela! A nkama wu tlhasile! Lavisani, a N’wana wa mhunu awa wongiwa a nyikeliwa a mavokweni ya vadohi. 42 Pfukani hi famba. Lweyi a ni wongaka a kola kusuhi.”

43 Hi ku kahlula, na a ha vulavula, Yudasi, lweyi a a li mun’we wa lava 12, a tlhasa na a ni xitsrhungu lexi a xi ni swipada ni tinhonga, lexi a xi zrumiwe hi vaprista lavakulu, vatsrali ni vakulukumba. 44 A muwongi wake a a va byele ndlela leyi a a ta va komba ha yone, a ku: “Lweyi ni taka mu n’qunta, hi yelweyo, mu khomani mi famba na yene na a voneleliwa.” 45 A kongoma Yesu a mu tsrhindzrekelela a ku: “Rabi!” a gama a mu n’qunta. 46 Xileswo va mu khoma va famba na yene. 47 Nambitanu, mun’we wa lava a va yimi kolanu a humesa xipada xake a tsrema nandzra wa muprista lwenkulu, a mu susa ndleve. 48 Kambe Yesu a va byela a ku: “Mi buya mi ta ni khoma na mi ni swipada ni tinhonga ingiki hi loko no va muyivi? 49 Siku ni siku a ni na n’wine tempeleni ni dondzrisa, kambe a mi ni khomanga. Nambitanu, leswi swi yentxeka akuva ku hetiseka matsralwa.”

50 Kutani a vadondzrisiwa hinkwavu va mu siya va tsrutsruma. 51 Kambe djaha dzra kukazri ledzri a dzri yambale xiyambalu xin’we ntsena lexi a xi hambiwe hi panu ya lisima,* dzri sungula ku mu landzrelela hi le kusuhi, kutani vhanu va dzringisa ku dzri khoma, 52 kambe dzri siya xiyambalu xa dzrone xa linyu dzri tsrutsruma na dzri nga yambalanga ntxhumu.*

53 Kutani va yisa Yesu ka muprista lwenkulu, hi loko ku hlengeletana hinkwavu vaprista lavakulu, vakulukumba kun’we ni vatsrali. 54 Kambe Petro a tama a mu landzra hi le kule ku ya tlhasa a mutini wa muprista lwenkulu; kutani a ya tsrhama ni vatizri va muti wolowo a wozra ndzrilo. 55 A vaprista lavakulu ni Sanedri hinkwadzru a va djuletela wumboni bya ku hehla Yesu akuva va mu dlaya, kambe a va nga byi kumi. 56 Nakunene, vanyingi a va nyikela wumboni bya madzrimi mayelanu na yene akuva va mu hehla, kambe a wumboni byavu a byi lwisana. 57 Futsrhi a ku ni van’wana lava a va sekeleka va nyikela wumboni bya madzrimi mayelanu na yene, va ku: 58 “Hi mu yingeli na a ku: ‘Ni ta gilhita tempele ledzri, ledzri yakiwiki hi mavoko, kutani ni ta yaka dzrin’wana hi masiku mazrazru ledzri kalaka dzri nga yakiwanga hi mavoko.’” 59 Kambe nambi ka mhaka leyi a wumboni byavu a byi lwisana.

60 Kutani a muprista lwenkulu a sekeleka a yima makazri kwavu a vutisa Yesu a ku: “A wu na xa ku xi hlaya? A wu swi twi leswi vavanuna lava va ku lumbetaka swone?” 61 Kambe Yesu a tama a miyela a nga mu hlamuli ntxhumu. A muprista lwenkulu a tlhela a mu vutisa a ku: “Xana hi wene Kriste N’wana wa Xikwembu Nkulukumba Lweyi a Xwengiki?” 62 Kutani Yesu a hlamula a ku: “Hi mine, nakone u ta vona N’wana wa mhunu na a tsrhame a vokweni dzra xinene dzra Xikwembu Nkulukumba wa Ntamu Hinkwawu* na a ta hi le matlavini ya le tilweni.” 63 Loko a twa leswo, muprista lwenkulu a handzrula mpahla yake a ku: “Ha ha ti djulela yini timboni tin’wana? 64 Mi mu yingelile loko a yeyisa Xikwembu Nkulukumba. Mi li yini hi swone?” Hinkwavu va hlaya leswaku a faneliwa hi lifu. 65 Kutani van’wana va sungula ku mu thukela mazri va tlhela va mu funeketa wuso va mu ba swibakela va ku: “Profeta ka!” Ntsrhaku ka loko vazrindzri va le tribunali va mu yamaseli timpama a wusweni, va mu teka va famba na yene.

66 Na Petro a ha tsrhame mutini, ku tlhasa mun’we wa vatizri va xisati va muprista lwenkulu. 67 Loko nandzra lweyo a vona Petro na a wozra ndzrilo, a mu lavisisisa kutani a ku: “Na wene a wu na Yesu wa Munazareta.” 68 Kambe a yala a ku: “A ni mu tivi ni ku mu tiva, nambileswi u khanelaka hi swone a ni swi twisisi”, kutani a suka a ya nyangweni. 69 Na a li nyangweni, a tlhela a voniwa hi nandzra lweyo wa xisati kutani a byela lava a va yimi kolanu a ku: “Lweyi i mun’we wa vone.” 70 A tlhela a yala. Ntsrhakunyana ka leswo, lava a va li mbangwini wolowo va tlhela va byela Petro va ku: “Nakunene u mun’we wa vone, hikusa vhela u Mugalileya.” 71 Kambe a sungula ku hlambanya a tlhela a txhikitxha a ku: “A ni mu tivi wanuna lweyi mi vulavulaka hi yene!” 72 Hi nkama wolowo a nkuku wu yimba hi khambi dzra wubidzri, kutani Petro a dzrimuka leswi Yesu a mu byeliki swone loko a ku: “Na nkuku wu nga si na yimba kabidzri, u ta ni landzrula kazrazru.” Kutani a tlhaveka ngopfu swinene a sungula ku dzrila.