Genesisi

34 Dina, ku nga n’wana wa xisati lweyi Leya a pswaleliki Yakobe, a a talisa ku huma a ya pfuxela* van’hwanyana va tiko ledzriyani. 2 Loko Sikeme n’wana Hemori lweyi wa Muhivi, ndzruna ya tiko dzroledzro, a vone Dina, a mu khomile a mu hamba nsele. 3 Sikeme a* mu zrandzre ngopfu Dina n’wana Yakobe; a a mu zrandzra lakakuva a a zama ku mu gangisa hi mazritu.* 4 Hi wugamu Sikeme a byele papayi wake Hemori a ku: “Zama tindlela ta leswaku n’hwanyana lweyi a va nkatanga.”

5 Nkama lowu Yakobe a tiviki leswaku Sikeme a a hambe nsele n’wanake wa xisati Dina, a vanake lavan’wana a va li ku byiseni ka ntlhambi wa papayi wavu. Kutani Yakobe a tsrhame ni mhaka leyi a va yimela va za va tlhela. 6 Hi ku famba ka nkama, Hemori papayi wa Sikeme, a ye vulavula na Yakobe. 7 Kambe na va ha li ku byiseni, a vana va Yakobe va tive leswi yentxekiki kutani va tekela ku muka. Va khunguvanyekile va tlhela va hlundzruka hi leswi Sikeme a a buyisele tingana Israyele hi ku yetlela ni n’wana wa n’hwanyana wa Yakobe, ku nga ntxhumu lowu a wu nga fanelanga wu yentxiwa.

8 Hemori a va byele leswi: “N’wananga Sikeme a mu zrandzre ngopfu* n’wanenu. Ni kombela mi mu nyika yene a va nkatake, 9 kutani hi ta hamba wuxaka hi mutxhatu. Hi nyikani vanenu va van’hwanyana, na n’wine mi titekela vanezru va van’hwanyana. 10 Mi nga tsrhama na hine, mi va mi yentxa xin’wana ni xin’wana lexi mi xi djulaka ka tiko ledzri. Tsrhamani ka dzrone mi hamba mabindzru, dzri va kaya dzrenu.” 11 Hiloko Sikeme a byela papayi ni vamakwavu va Dina a ku: “Ni yamukelani, ni ta mi nyika hinkwaswu leswi mi taka ni kombela swone. 12 Mi nga ni hakelisa mali ya yinyingi mi hlaya ni swihiwa leswi mi swi djulaka akuva ni lovola. Ni tiyimisele ku humesa xin’wana ni xin’wana lexi mi taka xi kombela; ntsena ni nyikani n’hwanyana a va nkatanga.”

13 A vana va Yakobe va hlamule Sikeme na Hemori papayi wake hi ndlela ya wukanganyisi, hikusa Sikeme a a hambe Dina nsele. 14 Va va hlamule va ku: “A hi nge swi yentxi leswo nikutsrongo; a hi nge nyikeli makwezru ka mhunu lweyi a kalaka a nga sokanga,* hikusa leswo i xizruku kwezru. 15 Ko va ni ndlela yin’we ntsena ya kuva hi mi nyika makwezru, hi leyi: sokisani vavanuna hinkwavu a makazri kwenu, mi fana na hine. 16 Kutani hi ta mi nyika vanezru va van’hwanyana hi va hi teka vanenu va van’hwanyana, hi ta tsrhama na n’wine hi va vhanu van’we. 17 Kambe loko mi nga hi yingiseti, mi va mi nga soki, hi ta teka n’wanezru hi famba.”

18 A mazritu yavu ma nyonxise Sikeme ni papayi wake Hemori. 19 Leswi Sikeme a a zrandzra n’wana Yakobe nakone a a li yene wa ku hloniphiwa ngopfu a kaya ka papayi wake, a nga hlwelanga ku yentxa leswi va mu kombeliki swone.

20 Xileswo Hemori ni n’wanake Sikeme va ye nyangweni ya doropa va tlhasa va byela vavanuna va doropa va ku: 21 “Vavanuna lava va djula ku tsrhama hi ku zrula na hine. A hi va tsrhikeni va tsrhama ka tiko ledzri, va hamba mabindzru ka dzrone, hikusa i dzrikulu nakone va nga yanela ka dzrone. Hi ta kota ku teka vanavu va van’hwanyana va va vasati vezru, na vone va ta kota ku teka vanezru va van’hwanyana. 22 Kambe va to pfumela ku tsrhama na hine hi va vhanu van’we ntsena loko va xinuna hinkwavu a makazri kwezru va sokisiwile, swanga hi leswi na vone va sokiki. 23 A hi pfumeleni ku yentxa leswo akuva va tsrhama na hine. Loko hi yentxa leswo, hinkwaswu leswi va nga na swone, mintlhambi ni wukosi swi ta va swezru.” 24 Vavanuna hinkwavu lava a va tsrhama doropeni ledzro va yingisete Hemori ni n’wanake Sikeme, nakone vavanuna hinkwavu va sokisiwile.

25 Nambitanu, hi siku dzra wuzrazru, loko vavanuna hinkwavu va ha twa ku vavisa nakone na vhanu va nga swi yimelanga, vana vabidzri va Yakobe ku nga Simiyoni na Levhi, vamakwavu va Dina, va teke swipada va ya dlaya vavanuna hinkwavu va doropa. 26 Va dlaye na Hemori ni n’wanake Sikeme hi xipada va gama va teka Dina a kaya ka Sikeme va famba. 27 A vana lavan’wana va Yakobe va tlhase doropeni va kuma leswaku a vavanuna va doropa ledzro va file, kutani va phanga* mintxhumu a doropeni, hikusa makwavu a a hambiwe nsele. 28 Va teke tihamba, timbongolo, tihomu ni hinkwaswu leswi a swi li doropeni ni le masin’wini. 29 Va teka swivanana hinkwaswu ni vasati va vanuna lava dlayiwiki, va phanga hinkwaswu leswi a swi li mitini.

30 Hi mhaka ya leswo, Yakobe a byele Simiyoni na Levhi a ku: “Mi ni vangele timhaka hi ku yentxa leswaku ni nyenyiwa* hi Vakanana ni Vaperezi, ku nga vahanyitiko va lomu. Hine hi vatsrongo, nakunene va ta patsrana akuva va ni hlasela, ni va ni helisiwa mine ni ndangu wanga.” 31 Kambe va mu hlamule va ku: ‘Xana hi fanela ku pfumela leswaku va yentxa makwezru nghwavana?”