Mpfuletelo Lowu Yamukeliwiki Hi Yohane

14 Kutani ni lavisa, ni vona Xihambana na xi yime a nhaveni ya Siyoni, na xi li kun’we ni 144.000 wa vhanu lava tsraliwiki vito dzra xone ni dzra Papayi wa xone a mimombyeni yavu. 2 Ni yingela mpfumawulu wa ku fana ni wa mati ya manyingi ni wa ku dzruma lokukulu ka tilo na wu pfa hi le tilweni; nakone a mpfumawulu lowu ni wu yingeliki a wu fana ni wa vayimbeleli lava yimbelelaka na va txhaya switende.* 3 A lisimu ledzri a va yimbelela dzrone a mahlweni ka xiluvelo, ka swivumbiwa swa mune leswi hanyaka, ni le ka vakulu, a dzri tikomba dzri li lisimu ledzrimpshwa nakone a lisimu dzroledzro a dzro kotiwa ntsena hi lava 144.000, lava xaviwiki a misaveni. 4 Lava hi lava va kalaka va nga tintxhimisanga hi vavasati; nakunene va basile.* Hi lava va tamaka va landzrelela Xihambana kun’wana ni kun’wana lani xi yaka kone. Va xaviwe vhanwini, nakone vone i ntsrhovelo wa ku sungula wa Xikwembu Nkulukumba ni wa Xihambana, 5 a ku kumiwanga wukanganyisi minon’wini yavu; a va na xa ku solisa.

6 Kutani ni vona ntsrumi yin’wana na yi haha mpfhukeni a xikazri ka tilo ni misava, na yi ni madzrungula lamanene lama nga helikiki akuva yi ma dzrungulela lava tsrhamaka a misaveni, va matiko hinkwawu, tinxaka hinkwatu, tindzrimi hinkwatu, ni tinhlonge hinkwatu. 7 A yi hlaya hi zritu dzra ku tlakuka yi ku: “Txhavani Xikwembu Nkulukumba mi mu dzrumisa, hikusa a nkama wa ku yavanyisa kwake wu tlhasile, xileswo gandzrelani Lweyi a hambiki matilo, misava, lwandle, ni swihlovo swa mati.”

8 Ku landzrela ntsrumi yin’wana ya wubidzri yi ku: “A wile! A wile Babilona Lwenkulu, lweyi a yentxiki leswaku a matiko hinkwawu ma nwa vhinyu dzrake, ku nga ku navela kwake lokukulu ka ku yentxa swa tingana hi tlhelo dzra tinkuku!”

9 Ku landzrela ntsrumi yin’wana ya wuzrazru, yi hlaya hi zritu dzra ku tlakuka yi ku: “Loko mhunu wa kukazri a gandzrela xihazri xa nhova ni xifaniso xa xone, a tlhela a yamukela mfungu wa xone a mombyeni wake kumbe a vokweni dzrake, 10 a ta nwa ni vhinyu dzra mahlundzru ya Xikwembu Nkulukumba, ledzri txheliwiki ka kopo dzra mahlundzru ya Xikwembu Nkulukumba na dzri nga patsriwanga ni ntxhumu nakone a ta xanisiwa hi ndzrilo ni xivavula a mahlweni ka tintsrumi leta ku xwenga ni le mahlweni ka Xihambana. 11 A ximusi xa ku xanisiwa* kwavu xi ta tama xi mpunkuka hi masiku ni masiku, nakone lava va gandzrelaka xihazri xa nhova ni xifaniso xa xone ni lava va yamukelaka mfungu wa vito dzra xone a va nge ti wisa wusiku ni nhlikanhi. 12 Hi xivangelo lexo, a vaxwengi lava yingisetaka milawu ya Xikwembu Nkulukumba va tlhela va khomelela ka lipfumelo ledzri va nga na dzrone ka* Yesu va fanela ku tiyisela.”

13 Hiloko ni yingela zritu dzri pfa hi le tilweni dzri ku: “Tsrala leswi: Va nyonxa lava ku sukela swoswi ku ya mahlweni va faka na va ni wumun’we ni Hosi. Ina, a moya wu li: A va wise ka mintizro yavu, hikusa a mintxhumu leyi va yi yentxiki a yi nge ti dzrivaliwa.”*

14 Kutani loko ni lavisa, ni vona tlavi dzra ku basa, ka tlavi dzroledzro a ku tsrhame mhunu lweyi a fanaka ni N’wana wa mhunu, na a ni hazri ya woru a nhlokweni yake nakone a a tamele sikela ledzri lotiwiki.

15 Ku humelela ntsrumi yin’wana hi le tempeleni,* yi vitana lweyi a tsrhamiki henhla ka tlavi hi zritu ledzrikulu yi ku: “Teka sikela dzraku u sungula ku tsrhovela, hikusa a nkama wa ku tsrhovela wu tlhasile, swanga hi leswi a ntsrhovelo wa misava wu wupfiki.” 16 Lweyi a a tsrhame tlavini a teka sikela dzrake a ya misaveni, kutani a tsrhovela misava.

17 Ku tlhela ku humelela ntsrumi yin’wana hi le tempeleni* ledzri nga matilweni, na yone a yi tamele sikela ledzri lotiwiki.

18 Ku tlhela ku humelela ntsrumi yin’wanyana hi le altarini, leyi a yi ni ntamu wa ku lawula ndzrilo. Kutani yi huwelela yi byela lweyi a tameliki sikela ledzri lotiwiki yi ku: “Teka sikela dzraku ledzri lotiwiki u tsrhovela mawuvha ya misava, hikusa ma wupfile.” 19 A ntsrumi yi nghenisa sikela dzra yone a misaveni yi tsrhovela mawuvha ya misava, yi gama yi ma txukumetela a xikamelweni lexikulu xa mahlundzru ya Xikwembu Nkulukumba. 20 A mawuvha ma pswanyeteliwa handle ka doropa, kutani ku huma ngati hi le xikamelweni ya ku tala yi tlhasa ni le minon’wini ya makavhalu, yi khuluka* hi mpfhuka wa ku dzringana kolomu ka 296 wa makilometru.*