Yonasi
3 Hiloko Yehovha a byela Yonasi hi khambi dzra wubidzri a ku: 2 “Famba a Ninivha, doropa ledzrikulu, u ya va byela dzrungula ledzri ni taka ku byela dzrone.”
3 Xileswo, Yonasi a yingiseta zritu dzra Yehovha a tekela ku ya Ninivha. Ninivha a ku li doropa ledzrikulu;* a swi teka masiku mazrazru ku fambafamba ndzreni ka dzrone. 4 Hiloko Yonasi a nghena doropeni, kutani a fambafamba ka dzrone mpfhuka wa ku dzringana siku dzrin’we, na a huwelela a ku: “Ke sala 40 wa masiku ntsena, Ninivha a ta helisiwa.”
5 Kutani vhanu va Ninivha, ku sukela ka lwenkulu ku ya ka lwentsrongo, va kombisa lipfumelo ka Xikwembu Nkulukumba, va byelanana leswaku va titsrona swakuda va yambala ni masaka. 6 Loko hosi ya Ninivha yi byeliwa dzrungula dzra Yonasi, yi sekeleka xitsrhan’wini xa wuhosi yi hlivila mpahla ya wuhosi yi funekela saka yi va yi tsrhama nkumeni. 7 Handle ka leswo, yi leleta leswaku a doropeni hinkwadzru dzra Ninivha ku huweleliwa leswi:
“A hosi ni vhanu va yone va xiyimu xa le henhla va leleta leswi: A ku na mhunu ni mun’we nambi xihazri, tihomu kumbe tihamba, leswi fanelaka ku da swa kukazri. A swi fanelanga swi da ntxhumu nambi ku nwa mati. 8 Vhanu hinkwavu a va tifuneketi hi masaka, va tlhela va funeketa ni swihazri; va kombela ka Xikwembu Nkulukumba hi ku hiseka va va va tsrhika tindlela tavu ta ku biha ni ku yentxa madzolonga. 9 Swi nga yentxeka Xikwembu Nkulukumba wa ntiyiso a ta txintxa xiboho xake* mayelanu ni leswi a djulaka ku swi yentxa, a va a tsrhika mahlundzru yake lamakulu, akuva hi nga helisiwi.”
10 Loko Xikwembu Nkulukumba wa ntiyiso a vona leswi va swi yentxiki, leswaku va tsrhike mahanyela yavu ya ku biha, a txintxa xiboho xake* a va a nga ha dzri tisi khombo ledzri a hlayiki leswaku a a ta va tisela dzrone.