Papela dzra wubidzri ledzri yaka ka Vatesalonika

2 Nambitanu vamakwezru, mayelanu ni ku tlhela ka Hosi yezru Yesu Kriste ni ku hlengeletiwa kwezru akuva hi va na yene, ha mi kombela 2 leswaku mi nga hantli mi pfilunganyiwa miyanakanyu nambi ku li ku txhavisiwa hi mazritu lawa ma tikombaka ingiki ma pfa ka Xikwembu Nkulukumba,* kumbe hi dzrungula, kumbe hi papela ledzri tikombaka ingiki dzri pfa kwezru, na dzri hlaya leswaku siku dzra Yehovha dzri tlhasile.

3 Mi nga tsrhiki mhunu a mi hambukisa* nambi ku li hi ndlela yini, hikusa siku ledzro a dzri nge ti tlhasa na ku nga zranganga hi ku va ni wudukwa ni kuva ku kombisiwa leswaku i mani mhunu lweyi a bihiki, ku nga n’wana wa ku helisiwa. 4 Yene i nala nakone a titlakuxa henhla ka xin’wana ni xin’wana lexi vitaniwaka xikwembu kumbe ntxhumu lowu gandzreliwaka,* lakakuva a tsrhama tempeleni dzra Xikwembu Nkulukumba na a tibyela a livaleni leswaku yene i xikwembu. 5 A mi dzrimuki leswaku na na ha li na n’wine halanu a ni mi byela mintxhumu leyi?

6 Kutani swoswi ma xi tiva lexi xi mu sivelaka, ku yentxela leswaku a ta paluxiwa hi nkama wake lowu fanelekaka. 7 Nakunene a wubihi bya mhunu lweyi, lebyi nga xihundla byi le ku tizreni, kambe byone byi ta tama byi va xihundla ku ya tlhasa loko lweyi a mu sivelaka a nga ha vi kone. 8 Kutani ku ta gama ku kombekisiwa mhunu lweyi a bihiki, lweyi Hosi Yesu a taka mu dlaya hi mazritu ya ntamu lawa ma humaka a non’wini wake, a mu helisa hi nkama wa ku tlhela kwake. 9 Kambe a mhunu lweyi a bihiki a tama a va kone hi mhaka ya Sathana; Sathana a mu nyika ntamu wa ku yentxa mahlolana manyingi, swikombiso swa madzrimi ni mintxhumu ya ku hlamalisa, 10 ni wa ku tizrisa tindlela hinkwatu leti kalaka ti nga lulamanga akuva a kanganyisa lava yaka ku helisiweni, va ta khatisiwa hi leswi va kalaka va nga wu yamukelanga ntiyiso ni ku wu zrandzra akuva va ta kota ku huluxiwa. 11 Hi leswo swi yentxaka leswaku Xikwembu Nkulukumba a pfumelela kuva va kanganyisiwa hi dondzro ya madzrimi leswaku va kholwa madzrimi, 12 ku yentxela leswaku hinkwavu va yavanyisiwa hikusa a va wu kholwanga ntiyiso kambe va nyonxisiwe hi leswi swi kalaka swi nga lulamanga.

13 Kambe swa fanela kuva minkama hinkwayu hi tlangela Xikwembu Nkulukumba hi kola kwenu, n’wine vamakwezru mi zrandzriwaka hi Yehovha, hikusa ku sukela a ku sunguleni Xikwembu Nkulukumba a mi hlawulile akuva mi huluxiwa hi ku mi xwengisa hi moya wake ni hi lipfumelo dzrenu ka ntiyiso. 14 A mi hlawule kuva mi huluxiwa hi ku tizrisa madzrungula lamanene lawa hi ma zrezraka, akuva mi ta yamukela ku phatima ka Hosi yezru Yesu Kriste. 15 Kutani ke vamakwezru, yimani mi tiya, mi khomelela ka mintxhumu leyi hi mi dondzrisiki hi nomu kumbe hi yentxiki hi ku mi tsralela hi papela. 16 Handle ka leswo, ingiki a Hosi yezru Yesu Kriste na Xikwembu Nkulukumba Papayi wezru, lweyi a hi zrandzriki a va a hi nyika ntxhavelelo lowu nga helikiki ni dumbo ledzrinene hi ku tizrisa timpswalu letikulu, 17 va nga txhavelela timbilu tenu ni ku mi yentxa mi tiya akuva minkama hinkwayu mi yentxa ni ku hlaya mintxhumu leyinene.