Papela dzra wuzrazru dzra Yohane

1 Mine wanuna lweyi a kuliki,* ni tsralela wene Gayu makwezru lweyi a zrandzrekaka, ni ku zrandzra ngopfu swinene.

2 Makwezru lweyi a zrandzrekaka, ni khongota leswaku u va ni wutomi lebyinene,* ni leswaku mintxhumu hinkwayu yi tama yi ku fambela ha hombe a wuton’wini. 3 Hikusa ni nyonxe ngopfu swinene loko vamakwezru va tlhase halenu va hlaya leswaku wa ha khome swi tiya a ntiyisweni, nakone na nyonxa hi leswi u tamaka u famba a ntiyisweni. 4 A ku na ntxhumu wa ku ni nyonxisa ngopfu* ku tlula ku twa leswaku a vananga va tama va famba a ntiyisweni.

5 Makwezru lweyi a zrandzrekaka, u kombisa ku dumbeka kwaku hi leswi u swi yentxelaka vamakwezru, nambiloko u nga va tivi. 6 Va byele bandla hi ta lizrandzru ledzri u nga na dzrone. Loko va suka halanu, yentxa hinkwaswu leswi u nga swi kotaka akuva u va pfuna hi ndlela leyi taka nyonxisa Xikwembu Nkulukumba. 7 Hikusa va yendzra hi nkongometo wa ku twalisa vito dzra Xikwembu Nkulukumba, nakone a va yimelanga ku kuma swa kukazri ka vhanu va matiko. 8 Xileswo swi djula hi va komba malwandla vhanu va ku tasu, akuva hi kota ku tizra xikan’we a ku twaliseni ka ntiyiso.

9 Ni mi tsralele swa kukazri a bandleni, kambe Diyotrefo, lweyi minkama hinkwayu a djulaka ku mi zrangela, a xi kone ni xin’we lexi pfaka kwezru lexi a xi yamukelaka hi xitxhavu. 10 Hi leswo swi taka yentxa leswaku loko ni ta halanu, ni paluxa a mintizro leyi a yi yentxaka, ya ku fana ni ku va a vulavula ku biha ha hine.* A nga yentxi leswo ntsena, a yala ni ku yamukela vamakwezru hi xitxhavu; a tlhela a zama ku sivela lava djulaka ku va yamukela, a patsra ni ku va hlongola a bandleni.

11 Makwezru lweyi a zrandzrekaka, u nga yetiseli leswi bihiki, kambe yetisela leswinene. Lweyi a yentxaka leswinene i wa* Xikwembu Nkulukumba. Lweyi a yentxaka leswi bihiki a nga si na mu tiva Xikwembu Nkulukumba. 12 Hinkwavu va vulavula ha hombe hi Demetriyo, nakone leswo swi tiyisekisiwa hi ku va a hanya hi ku fambisana ni ntiyiso. Ku hlaya ntiyiso na hine hi nyikela wumboni bya swone, nakone wa swi tiva leswaku a wumboni lebyi hi byi nyikelaka i bya ntiyiso.

13 Ni ni mintxhumu yinyingi ya ku ku byela yone, kambe a ni naveli ku yentxa hi ku yi tsrala.* 14 Nambitanu, ni yimele ku ku vona ku nga li khale, nakone hi ta vulavula na hi vonana.

Ingiki u nga va ni ku zrula.

Vamakwezru va ku dzrungula. Ni dzrungulele vamakwezru ha mun’wemun’we.