Papela dzra wubidzri dzra Petro

2 Nambitanu, ku patsre ni ku va ni vaprofeta va madzrimi a xikazri ka vhanu va Israyele, swanga hi leswi a xikazri kwenu na kone ku taka va ni vadondzrisi va madzrimi. Hi ndlela ya ku tumbela va ta vumba swintlawantlawana leswi taka hohlota lipfumelo dzrenu, va ta patsra ni ku yala lweyi a va xaviki. Hi ku va va yentxa leswo, va ta kahlula va helisiwa. 2 Handle ka leswo, vanyingi va ta yetisela mahanyela yavu ya ku biha,* nakone hi mhaka yavu ku ta vulavuliwa ku biha hi ndlela ya ntiyiso. 3 Nakone leswi va nga ni makwanga va ta mi xolola hi mazritu lama kanganyisaka. Kambe a ku yavanyisiwa kwavu loku bekisiwiki khale a ku nge ti xwela, nakone a ku helisiwa kwavu a ku le ku yetleleni.

4 Nakunene Xikwembu Nkulukumba a nga tsrhikanga ku khatisa tintsrumi leti dohiki, kambe a ti txukumetele a Tartaru,* na a ti tsrimbe hi matxhini ya* munyama lowukulu akuva ti bekiseliwa ku yavanyisiwa. 5 Nakone a nga tsrhikanga ku khatisa misava ya khale, kambe a bekise Nowa, muzrezri wa swa ku lulama, a mu huluxe kun’we ni vhanu van’wana, 7 wa vone, nkama lowu a tisiki ndhambhi henhla ka misava leyi a yi tale hi vhanu lava a va nga mu txhavi Xikwembu Nkulukumba. 6 Nakone a tlhele a khatisa madoropa ya Sodoma ni Gomora. Hi ku va a hise madoropa wolawo ma va nkuma a bekele vhanu lava kalaka va nga mu txhavi Xikwembu Nkulukumba a xikombiso xa mintxhumu leyi taka va yentxekela a nkameni lowu taka. 7 Nakone a huluxe Loti mhunu wa ku lulama, lweyi a a kazrateka ngopfu hi mhaka ya mahanyela ya ku biha* ya vhanu lava bihiki, 8 hikusa siku ni siku wanuna lweyo wa ku lulama a a kazrateka hi ku vona ni ku yingela mintxhumu ya ku biha leyi a yi yentxiwa hi vhanu lava a a tsrhama makazri kwavu. 9 Leswo swi kombisa leswaku Yehovha awa swi kota ku huluxa lava dumbekaka kwake ni ku bekisa vhanu lava kalaka va nga lulamanga akuva va helisiwa hi siku dzra wuyavanyisi, 10 ngopfungopfu lava djulaka ku ntxhimisa mizri wa van’wana, ni lava va yeyisaka wulawuli.*

Va tidumba ngopfu, va tiyele tinhloko nakone a va txhavi ku vulavula ku biha hi lava va hlawulekisiwiki hi Xikwembu Nkulukumba, 11 nakasi a tintsrumi nambileswi ti nga ni ntamu ngopfu swinene ku va tlula, a ti va zrwexi nandzru, nakone a ti va zruki hi leswi ti hloniphaka Yehovha. 12 Kambe vhanu lava, ku fana ni swihazri leswi kalaka swi nga yanakanyi, swo ko yentxa mintxhumu hi ntumbuluku, nakone swo ko pswaleliwa kuva swi phasiwa swi gama swi dlayiwa, va khanela ku biha hi mintxhumu leyi va kalaka va nga yi tivi. Va ta helisiwa hi kola ka mahanyela yavu ya ku biha, 13 va khatisiwa swanga ntsrhovelo wa mintizro yavu ya ku biha.

Va nyonxisiwa hi ku tikholisa hi ku hanya a mafuzreni, nambi nhlikanhini. Vone i mabati lama ntxhimisaka bandla, va tinyiketela ka tidondzro tavu ta wukanganyisi nkama lowu va nga minkhubyini na n’wine. 14 A matihlo yavu ma tale hi wumbuye, nakone va hluleka ku tsrhika xidoho, va patsra ni ku hlohlotela lava kalaka va nga tiyanga. A timbilu tavu ti dondzrisiwe ku va ni makwanga. Vone i vana lava zrukiwiki. 15 Va hambukile va tsrhika ndlela ya ku lulama, va landzre ndlela ya Balama n’wana wa Beyori, lweyi a yentxiki swa ku biha hi leswi a a swi djula ngopfu ku hakeliwa, 16 kambe a kawukiwile hi leswi a tluliki nawu. A mbongolo, ku nga xihazri xa ku a xi vulavuli, yi vulavulile hi zritu dzra mhunu yi sivela muprofeta ku landzra ndlela ya wuphunta.

17 Vhanu lavo va fana ni swihlovo swa ku kala mati, ni matlavi lama susumetiwaka hi xidzedze, nakone va bekiseliwe munyama lowukulu ngopfu swinene. 18 Va hlaya mintxhumu leyi tikombaka na yi nyonxisa kambe leswi va swi hlayaka a swi pfuni ntxhumu. Hi ku hetisisa ku navela kwavu ka nyama ni ku va ni mahanyela ya ku biha,* va wonga lava tsrutsrumiki vhanu lava nga ni mahanyela ya ku biha. 19 A vadondzrisi lava va madzrimi va va dumbisa ntsrhunxeko, kambe vone i swikazrawa swa xidoho; hikusa lweyi a hluliwaka hi mhunu wa kukazri a ndzruluka xikazrawa xa mhunu yelweyo.* 20 Nakunene, loko ntsrhaku ka loko va huluke ka mintxhumu ya misava leyi, leyi ntxhimisanaka, hi ku va ni wutivi bya ntiyiso mayelanu ni Hosi tlhelo Muhuluxi Yesu Kriste, va gama va tlhelela ka mintxhumu yoleyo yi va yi va hlula, a matsrhamela yavu ya wugamu ma va lama bihiki ngopfu swinene ku tlula ya le ku sunguleni. 21 A swi ta va swi yampswile kuva va nga yi tivanga ndlela ya wululami ku tlula kuva ntsrhaku ka loko va tivi nawu lowu xwengiki va hambuka. 22 Leswi swi yentxekiki kwavu swi kombisa leswaku xi tiyisile xihlayahlaya lexi liki: “A mbyana yi tlhelele mahlanteni ya yone, ni nguluve leyi hlampswiwiki yi tlhele yi ya vumbulukela ka ntsrokolo.”*