Madzrungula lamanene Lama Tsraliwiki hi Marka

2 Kambe ntsrhaku ka masikunyana a tlhelela Kapernawume, kutani vhanu va swi yingela leswaku a le kaya. 2 Ku ta vhanu va vanyingi va nghena ndlwini lakakuva ku nga ha vi na mbangu nambi nyangweni, kutani a sungula ku bulisana na vone hi zritu dzra Xikwembu Nkulukumba. 3 Va mu buyisela mhunu lweyi a womiki swizro na a tlakuliwe hi mune wa vhanu. 4 Kambe a va hluleka ku mu yisa lani Yesu a a li kone hi mhaka ya xitsrhungu; xileswo va gwavula swa ku fulela ha swone ka tlhelo ledzri Yesu a a li ka dzrone, loko va swi susile, va yehlisa lihlaka* ledzri mhunu lweyi a womiki swizro a a latiwe ka dzrone. 5 Loko Yesu a vona lipfumelo ledzri a va li na dzrone, a byela mhuna lweyi a womiki swizro a ku: “N’wananga a swidoho swaku swi dzrivaleliwile.” 6 Kutani van’we va vatsrali lava a va tsrhamile kolanu, va yanakanyisisa timbilwini tavu va ku: 7 “Ha yini wanuna lweyi a vulavula hi ndlela leyi? A yeyisa Xikwembu Nkulukumba. I mani lweyi a nga dzrivalelaka swidoho loko ku nga li Xikwembu Nkulukumba ntsena?” 8 Kambe Yesu a hantla a swi xiya leswi a va swi yanakanya timbilwini tavu, kutani a va byela a ku: “Ha yini mi yanakanya leswo timbilwini tenu? 9 I yini leswi nabyalaka, i ku byela mhunu lweyi wa ku woma swizro u ku: ‘Swidoho swaku swi dzrivaleliwile’ kumbe i ku mu byela u ku: ‘Sekeleka u teka lihlaka* dzraku u famba?’ 10 Kambe ni djula mi swi tiva leswaku a N’wana wa mhunu a nyikiwe ntamu wa ku dzrivalela swidoho a misaveni . . .”, kutani a byela wanuna lweyi a womiki swizro a ku: 11 “Na ku byela: Sekeleka, u teka lihlaka* dzraku u muka kaya.” 12 Hi ndlela yoleyo a sekeleka a tekela ku teka lihlaka* dzrake a famba na a voniwa hi vhanu hinkwavu. Kutani hinkwavu va hlamala, va sungula ku dzrumisa Xikwembu Nkulukumba, va ku: “A hi ngi sama hi swi vona swa ku fana ni leswi.”

13 Siku dzrin’wana, Yesu a tlhela a ya nkingeni wa lwandle, a xitsrhungu hinkwaxu a xi tama xi mu yela, kutani a sungula ku va dondzrisa. 14 Na a li ku fambeni, Yesu a vona Levhi n’wana wa Alifewu na a tsrhamile mbangwini lowu vhanu va hakelaka ka wone tinemba, kutani a mu byela a ku: “Vana mulandzreli wanga.” Kolanu a sekeleka a mu landzra. 15 Ntsrhakunyana, Yesu a a li ku deni* a kaya ka Levhi, nakone a vahakelisi vanyingi va tinemba ni vadohi a va da kun’we na yene ni vadondzrisiwa vake, hikusa vanyingi vavu a va sungule ku mu landzrela. 16 Kambe loko vatsrali ni Vafarisi va vona leswaku a a li ku deni kun’we ni vadohi ni vahakelisi va tinemba, va vutisa vadondzrisiwa vake va ku: “Ha yini mudondzrisi wenu a da ni vahakelisi va tinemba ni vadohi?” 17 Loko Yesu a twa leswo, a va byela leswi: “Vhanu lava kalaka va nga vabyi a va vileli dokodela, kambe lava vabyaka va mu vilela. Ni tele ku ta vitana vadohi, ku nga li vhanu lava lulamiki.”

18 A vadondzrisiwa va Yohane ni Vafarisi a va titsrona swakuda. Xileswo va mu tsrhindzrekelela va mu vutisa leswi: “Ha yini vadondzrisiwa va Yohane ni vadondzrisiwa va Vafarisi va titsrona swakuda kambe a vadondzrisiwa vaku va nga titsroni?” 19 Kutani Yesu a va byela a ku: “A vanghanu va muteki a va na xivangelo xa ku titsrona swakuda na muteki a ha li na vone, a hi swone ke? Loko muteki a ha li na vone a va nge titsroni swakuda. 20 Kambe ma ta masiku lawa a muteki a taka va a nga ha li na vone, kutani lanu ke hi kone va taka titsrona swakuda. 21 A nga kone lweyi a zrungelaka xiziva* xa nyiwana ka mpahla ya khale. Hikusa loko a ngo yentxa leswo, xiziva xa nyiwana xi ta yentxa leswaku leyi ya khale yi ya yi handzrukela. 22 Futsrhi a nga kone lweyi a txhelaka vhinyu ledzri dzra ha ka ku hambiwa ka tihotsro ta khale, hikusa loko a ngo yentxa leswo, a vhinyu dzri ta yentxa leswaku a tihotsro ti pandzreka kutani a luzekeliwa hi vhinyu ni tihotsro ta kone. Kambe a vhinyu ledzri dzra ha ka ku hambiwa dzri txheliwa ka tihotsro letimpshwa.”

23 Na a tsremakanya masimu ya trigu hi Savata, a vadondzrisiwa vake va sungula ku khayetela tinhleke ta trigu na va li ku fambeni. 24 Xileswo a Vafarisi va ku: “Lavisa! Ha yini vadondzrisiwa vaku va yentxa leswi nawu wu kalaka wu nga pfumeli kuva swi yentxiwa hi Savata?” 25 Kambe a va hlamula a ku: “Xana a mi ngi ngi sama mi dondzra leswi Davhida a swi yentxiki nkama lowu a nga heleliwa hi swakuda, loko yene ni vavanuna lava a va li na yene va twe ndlala? 26 Xana a mi dondzranga leswaku nkama lowu Abiyatari a a li muprista lwenkulu, Davhida a nghene ndlwini ya Xikwembu Nkulukumba a da mapawu* ya magandzrelo, lawa hi ku ya hi Nawu a ma fanela ku diwa ntsena hi vaprista, ni leswaku a teke man’we ya wone a nyika vavanuna lava a va li na yene?” 27 Kutani a va byela a ku: “A Savata dzri ve kone hi kola ka vhanu, a hi vhanu va viki kone hi kola ka Savata. 28 Xileswo, a N’wana wa mhunu i Hosi nambi ya Savata.”