Deuteronoma
4 “Swoswi n’wine Vaisrayele, yingisetani milawu ni swiboho swa wuyavanyisi leswi ni mi dondzrisaka ku swi landzra akuva mi hanya, mi nghena ka tiko ledzri Yehovha Xikwembu Nkulukumba wa vakokwana venu a mi nyikaka dzrone akuva mi dzri teka. 2 Mi nga yengeseli ntxhumu kumbe ku pumba ka mazritu lawa ni mi byelaka wone. Bekisani milawu ya Yehovha Xikwembu Nkulukumba wenu, leyi ni mi leletaka yone.
3 “Mi swi vonile leswi Yehovha a swi yentxiki a mhakeni ya Bali wa le Peyori; Yehovha Xikwembu Nkulukumba wenu a helise vavanuna hinkwavu a makazri kwenu lava va landzreliki Bali wa le Peyori. 4 Kambe n’wine mi namazrelaka Yehovha Xikwembu Nkulukumba wenu ma ha hanya ku ta ta tlhasa ni namunhla. 5 Lavisani, ni mi dondzrise milawu ni swiboho swa wuyavanyisi hi lani Yehovha Xikwembu Nkulukumba wanga a ni leletiki ha kone, akuva mi hanya ha swone a tikweni ledzri mi taka titekela dzrone. 6 Mi fanela ku swi landzrelelisisa ha hombe, hikusa leswo swi ta kombisa leswaku mi ni wutivi ni ku twisisa a mahlweni ka vhanu lava taka twa hi ta milawu leyo, nakone va ta ku: ‘Nakunene a tiko ledzri ledzrikulu dzri ni wutlhazri ni ku twisisa.’ 7 Hikusa he dzrini tiko ledzrikulu ledzri swikwembu swa dzrone swi nga kusuhi na dzrone, ku fana ni leswi Yehovha Xikwembu Nkulukumba wezru a nga kusuhi na hine minkama hinkwayu loko hi mu vitana? 8 Nakone he dzrini tiko ledzrikulu ledzri nga ni milawu ya ku lulama ni swiboho swa wuyavanyisi leswi fanaka ni Nawu lowu hinkwawu, lowu ni wu bekaka mahlweni kwenu namunhla?
9 “Ntsena tivonelani mi va mi zreya ndleve, akuva mi nga dzrivali mintxhumu leyi mi yi voniki ni kuva yi nga suki a timbilwini tenu wutomi byenu hinkwabyu. Handle ka leswo, yi dzrungulelani vanenu ni vatukulu venu. 10 A siku ledzri mi viki mahlweni ka Yehovha Xikwembu Nkulukumba wenu a Horebe, Yehovha a ni byele a ku: ‘Hlengeleta vhanu a mahlweni kwanga akuva va yingela mazritu yanga, leswaku va ta dondzra ku ni txhava masiku hinkwawu lawa va taka va na va hanya a misaveni, ni leswaku va ta dondzrisa vanavu.’
11 “Xileswo mi tsrhindzrekelile mi ya kusuhi ni nhava, nakone a nhava a yi pfuzra lakakuva a malangavi ma tlhasa matilweni; a ku mphume ngopfu nakone a ku ni tlavi dzra ku txhavisa. 12 Kutani Yehovha a sungule ku vulavula na n’wine na a li ndzrilweni. Mi yingele mpfumawulu wa mazritu, kambe a mi swi vonanga leswaku lweyi a a ma hlaya a a tsrhamisise kuyini, me yingela zritu ntsena. 13 Nakone a mi byele xipfumelelanu xake lexi a mi leletiki kuva mi xi landzra, ku nga 10 wa Milawu, a gama a yi tsrala ka swipepezrele swibidzri swa mazribye. 14 A nkameni lowo Yehovha a ni zrume kuva ni mi dondzrisa milawu ni swiboho swa wuyavanyisi leswi mi taka hanya ha swone a tikweni ledzri mi taka nghena akuva mi dzri teka.
15 “Swanga hi leswi mi kalaka mi nga swi vonanga leswaku Yehovha a tsrhamisise kuyini siku ledzri a khaneliki na n’wine a Horebe na a li ndzrilweni, tivonelani ngopfu swinene 16 akuva mi nga wongeki, mi tihambela xithombe xa ku vatliwa lexi nga ni xivumbeko xa ntxhumu wun’wana ni wun’wana, xi nga ha va xa ku fana ni wanuna kumbe ni wansati, 17 xi nga ha va xa ku fana ni xihazri xin’wana ni xin’wana xa la misaveni, kumbe xa ku fana ni nyanyana yin’wana ni yin’wana leyi hahaka, 18 xi nga ha va xa ku fana ni xihazri xin’wana ni xin’wana lexi fambaka hi khuzri kumbe nhlampfi yin’wana ni yin’wana leyi nga matini a hansi ka misava. 19 Nakone loko u lavisa henhla u vona khandzra hinkwadzru dzra le tilweni, ku nga dambu, n’weti ni tinyeleti, u nga wongeki nakone u nga swi khinsameli, futsrhi u nga swi tizreli. Yehovha Xikwembu Nkulukumba waku a swi nyike hinkwavu lava nga hansi ka tilo. 20 Kambe hi n’wine lava Yehovha a mi tekiki a va a mi susa xitikweni xa ku hisela ka xone tinsimbi a Egipta, akuva mi va vhanu vake lava lumbaka yene ntsena, hi lani swi nga ha kone ni namunhla.
21 “Yehovha a ni kwatelile hi mhaka yenu, a va a ni hlambanyela leswaku a ni nga ti tsremakanya nambu wa Yordani nambi ku nghena tikweni ledzrinene ledzri Yehovha Xikwembu Nkulukumba wenu a mi nyikaka dzrone swanga pfindla. 22 Phela ni ta fela kola tikweni ledzri; a ni nga ti tsremakanya nambu wa Yordani, kambe n’wine mi ta tsremakanya mi va mi titekela tiko ledzrinene. 23 Tivonelani akuva mi nga dzrivali xipfumelelanu lexi Yehovha Xikwembu Nkulukumba wenu a xi yentxiki na n’wine, nakone mi nga tivatleli swithombe swa ku fana ni mintxhumu leyi Yehovha Xikwembu Nkulukumba wenu a yi yilisaka. 24 Hikusa Yehovha Xikwembu Nkulukumba wenu i ndzrilo lowu helisaka, i Xikwembu Nkulukumba lweyi a djulaka kuva ku gandzreliwa yene ntsena.
25 “Loko mi va ni vana ni vatukulu nakone mi va na mi tsrhame nkama wa ku leha a tikweni, kutani mi doha hi ku hamba xithombe xa muxaka wun’wana ni wun’wana, mi yentxa leswi bihiki mahlweni ka Yehovha Xikwembu Nkulukumba wenu ni ku mu khunguvanyisa, 26 namunhla hinkwavu lava nga matilweni ni la misaveni i timboni ta leswaku nakunene mi ta nyamalala hi ku kahlula a tikweni ledzri mi taka dzri teka loko mi tsremakanya nambu wa Yordani. A mi nge ti tsrhama nkama wa ku leha ka dzrone, mi ta helisiwa mi nga ha vi kone. 27 Yehovha a ta mi hangalasa a matikweni man’wana nakone i vatsrongo lava va taka huluka a matikweni lawa Yehovha a taka va na a mi hangalaseli ka wone. 28 A matikweni wolawo mi ta sindzriseka ku tizrela swikwembu leswi hambiwiki hi vhanu, swa pulangu ni swa zribye, swikwembu leswi swi kalaka swi nga voni, swi nga yingeli, swi nga di nambi ku nun’hwetela.
29 “Loko na u li kohala u djuletela Yehovha Xikwembu Nkulukumba waku nakunene u ta mu kuma, loko u mu djuletela hi mbilu yaku hinkwayu ni hi wutomi byaku hinkwabyu.* 30 Hi nkama wolowo loko u lavisana ni mahlomulo lamakulu ni loko u ta va u humeleliwe hi mintxhumu leyi hinkwayu, lanu ke, u ta tlhelela ka Yehovha Xikwembu Nkulukumba waku kutani yene a ta yingela zritu dzraku. 31 Hikusa Yehovha Xikwembu Nkulukumba waku, i Xikwembu Nkulukumba lweyi a nga ni timpswalu. A nge ti ku tsrhika nambi ku ku helisa, nakone a nga ti helisa xipfumelelanu lexi a xi hambiki ni vakokwana vaku hi ku tizrisa xihlambanyu.
32 “Swoswi vutisa hi ta minkama leyi khalutiki na u nge si va kone, ku sukela nkama lowu Xikwembu Nkulukumba a tumbuluxiki mhunu ha wone a misaveni, ku sukela a wugan’wini byin’wana bya matilo ku ya tlhasa a wugan’wini byin’wana bya matilo. Xana ku sama ku yentxeka ntxhumu wa wukulu wa ku fana ni lowu? 33 Xana ku sama ku yingeliwa swa ku fana ni leswi? Xana ku ni vhanu lava samiki va yingela zritu dzra Xikwembu Nkulukumba na a vulavula makazri ka ndzrilo ku fana ni leswi wene u dzri yingeliki u va u tama u hanya? 34 Kumbexana Xikwembu Nkulukumba a same a humesa tiko dzrake a makazri ka tiko dzrimbeni hi ku tizrisa makhombo, swikombiso, mahlolana, yimpi, voko dzra ntamu ni hi mintizro leyi txhavisaka, hi lani Yehovha Xikwembu Nkulukumba waku a swi yentxiki ha kone kwenu a Egipta na mi swi vona? 35 Hi n’wine mi kombiwiki mintxhumu leyi, akuva mi ta swi tiva leswaku Yehovha hi yene Xikwembu Nkulukumba wa ntiyiso, a ku na mun’wana handle kwake. 36 A yentxe leswaku mi yingela zritu dzrake na dzri huma a tilweni akuva a mi kawuka, nakone a mi yentxe mi vona ndzrilo wake lowukulu mi va mi yingela mazritu yake a makazri ka ndzrilo.
37 “Hi yene a mi humesiki a Egipta hi ntamu wake lowukulu, hikusa a zrandzre vakokwana venu, nakone a hlawule vatukulu vavu. 38 A mahlweni kwenu a hlongole vhanu va matiko lamakulu nakone va nga ni ntamu ku mi tlula, akuva a mi nyika tiko dzravu leswaku dzri va pfindla dzrenu, hi lani swi nga ha kone namunhla. 39 Xileswo, ku sukela ka namunhla swi tivani mi tlhela mi swi beka a timbilwini leswaku Yehovha i Xikwembu Nkulukumba wa ntiyiso, a henhla matilweni ni le hansi misaveni. A ku na mun’wana. 40 Bekisani milawu yake ni swileleto swake leswi ni mi byelaka swone namunhla, akuva hinkwaswu swi mi fambela ha hombe n’wine ni vanenu, ni kuva mi ta kota ku hanya nkama wa ku leha a tikweni ledzri Yehovha Xikwembu Nkulukumba wenu a mi nyikaka dzrone.”
41 A nkameni wolowo, Moxe a hlawule madoropa mazrazru ka tlhelo ledzrin’wana dzra Yordani. 42 Loko mhunu wa kukazri o txhuka a phazama a dlaya mhunu mumbeni na ku li leswaku a a nga mu nyenyi, a fanela ku tsrutsrumela ka dzrin’we dzra madoropa lawo akuva a hanya. 43 A madoropa ya kone hi lawa: Doropa dzra Bezeri, ledzri kumekaka a mananga a mbangwini wa ku tlakuka, dzrone dzri nyikiwe lixaka dzra Rubeni; a doropa dzra Ramoti a Giliyadi, dzri nyikiwe lixaka dzra Gadi, kasi a doropa dzra Golani a Baxani, dzri nyikiwe lixaka dzra Manasi.
44 Moxe a nyikele Nawu wa Xikwembu Nkulukumba ka vhanu va Israyele. 45 Leswi i swidzrimuxo, milawu ni swiboho swa wuyavanyisi leswi Moxe a swi nyikiki Vaisrayele ntsrhaku ka loko va hume a Egipta, 46 a mugangeni wa Yordani, a nkoveni lowu nga a mahlweni ka Beti-peyori, a tikweni dzra Sihoni Hosi ya Vaamori, lweyi a a tsrhama a Hexiboni, lweyi Moxe kun’we ni Vaisrayele va mu hluliki ntsrhaku ka loko va hume a Egipta. 47 Va teke tiko dzrake ni tiko dzra Ogi Hosi ya Baxani, ku nga tihosi tibidzri ta Vaamori leti a ti fuma muganga wa le wuxeni wa Yordani, 48 ku sukela a Aroweri, ku nga muganga lowu kumekaka kusuhi ni Nkova wa Arnoni,* ku ya a Nhaveni ya Siyoni, leswi liki, a Nhaveni ya Hermoni, 49 ni tiko hinkwadzru dzra Araba, a mugangeni wa le wuxeni bya Yordani, ku ya tlhasa Lwandle dzra Araba, kusuhi ni Pisga.