Deuteronoma
32 “N’wine matilo yingelani leswi ni taka swi hlaya,
Nakone ingiki misava yi nga yingela mazritu ya nomu wanga.
2 A dondzro yanga yi ta na ku fana ni mpfula;
A mazritu yanga ma ta wa ku fana ni mbezre,
Ku fana ni mpfula leyi nswamaka a henhla ka byanyi
Ni ku fana ni mpfula leyikulu a henhla ka swimila.
3 Hikusa ni ta twalisa vito dzra Yehovha.
Tivisani wukulu bya Xikwembu Nkulukumba wezru!
4 Zribye, a mintizro yake hinkwayu yi hetisekile,
Hikusa a tindlela take hinkwatu ti lulamile.
Xikwembu Nkulukumba wa ku dumbeka, a nga yentxi leswi bihiki;
A lulamile nakone a nga na xisolo.
5 Hi vone va yentxiki swa ku biha.
A hi vanavu, a xihoxo i xavu.
I lixaka dzra ku biha ni dzra ku gombonyoka!*
6 Xana mi fanela ku khoma Yehovha hi ndlela leyi,
N’wine vhanu lava phuntiki nakone mi kalaka mi nga tlhazrihanga?
Xana a hi yene Papayi wenu lweyi a mi tumbuluxiki,
Lweyi a mi hambiki nakone a mi tiyisiki?
7 Dzrimuka minkama ya khale;
Yanakanyani hi malembe ya vhanu va khale.
Vutisa papayi waku, kutani yene a ta ku dzrungulela;
Vutisa vakulukumba lava nga makazri kwaku, vone va ta ku byela.
8 Loko Lweyi a nga Henhlahenhla a nyike tiko dzrin’wana ni dzrin’wana pfindla,
Loko a hambanise vana va Adamu,
A beke mindzrelekanu a xikazri ka vhanu,
Hi ku ya hi nhlayu ya vana va Israyele.
9 A vhanu va Yehovha va lumba yene;
Yakobe i pfindla dzrake.
10 A mu kume tikweni ledzri nga mananga
Mananga lawa ma ngeke na ntxhumu, lawa ma nga ni pongwe dzra swihazri.
A mu tsrandzrelile akuva a mu sizrelela, a mu hlayisile
A va a mu sizrelela ku fana ni ndzrololo ya tihlo* dzrake.
11 Ku fana ni leswi a gama dzri dondzrisaka vana va dzrone ku haha,
Dzri hahela henhla ka vana va dzrone,
Dzri va dzri gwimba timpapa akuva dzri va tlakula,
Dzri va zrwala a timpapeni ta dzrone,
12 I Yehovha ntsena lweyi a a kongomisa Yakobe;
A ku na xikwembu xin’wana lexi a xi li na yene.
13 A mu yentxe a famba mimbangwini ya ku tlakuka ya misava,
Lakakuva a da mihandzru ya le masin’wini,
Futsrhi a mi dise wulombe lebyi humaka a zribyeni ledzrikulu
Ni mafuzra lama humaka zribyeni,
14 Matega ya tihomu ni leiti dzra tihamba,
Ku patsra ni tihamba letinene ngopfu,*
Kun’we ni tihamba ta xinuna ta le Baxani, swiphongo,
Ni trigu ledzrinene;
Nakone u nwe vhinyu ledzri hambiwiki hi mawuvha.
15 Loko Yexuruni* a sungule ku kuluka a dukile.
Ina, u kulukile, u va ni ntamu u va u xuzra ku tlhanya ni khuzri,
Lakakuva a tsrhike Xikwembu Nkulukumba lweyi a mu tumbuluxiki;
Nakone a dzrele Zribye ledzri mu huluxaka.
16 Va mu hlundzrukisile hi ku va va gandzrela swikwembu swin’wana;
A va mu khunguvanyisa hi mintxhumu ya ku nyenyentsa.
17 A va nyikela magandzrelo ka mademona, ku nge ka Xikwembu Nkulukumba,
Ka swikwembu leswi a va nga swi tivi,
Swikwembu leswimpshwa leswi humeleliki swoswinyana,
Swikwembu leswi vakokwana vavu a va nga swi tivi.
18 U dzrivale Zribye ledzri dzri ku pswaliki,
Nakone a u mu dzrimukanga Xikwembu Nkulukumba lweyi a ku phulukiki.
19 Loko Yehovha a vone leswo a va tsrhikile,
Hikusa a vanake va xinuna ni va xisati va mu khunguvanyisile.
20 Xileswo a te: ‘Ni ta va fihlela wuso byanga;
Ni djula ku vona leswaku va ta yentxa yini.
Hikusa i lixaka ledzri bihiki,
Vana lava kalaka va nga dumbeki.
21 Va pfuxe mahlundzru yanga hi ku gandzrela swikwembu swa madzrimi,
Va ni khunguvanyisile hi swithombe swavu leswi kalaka swi nga pfuni ntxhumu,
Xileswo ni ta yentxa leswaku va va ni matsrhoho hi ku tizrisa lexi xi ngeke tiko.
Ni ta va khunguvanyisa hi ku tizrisa tiko ledzri nga pfunikiki ntxhumu.
22 Hikusa a mahlundzru yanga ma tlhavike ndzrilo
Lowu taka pfuzra ku ya tlhasa ndzrenindzreni ka Sizra,*
Wu ta helisa misava ni leswi yi swi bindzrulaka
Nakone wu ta hisa ni masungulo ya tinhava.
23 Ni ta va yengeselela makhombo,
Ni ta tizrisa minseve yanga hinkwayu akuva ni lwa na vone.
24 Va ta sika hi ndlala
Va ta diwa hi dzedzedze nakone va ta helisiwa hi ku helela.
Ni ta va zrumelela swihazri swa nhova leswi hahlulelanaka
Kun’we ni swihazri leswi swi nga ni mahlungu leswi swi kokovaka ntsrhuzrini.
25 A handle, a vanavu va ta dlayiwa hi xipada;
Kasi a ndzreni ku ta va ni ku txhava
Ka djaha ni ka n’hwanyana,*
Ka ntsrongwana ni le ka wanuna lweyi a nga ni mphahla.
26 A ni ta va ni teke xiboho xa ku va hangalasa,
Ni yentxa leswaku va nga ha dzrimukiwi a vhanwini,
27 Loko a a nga li ku txhava leswi a valala va taka swi pimisa,
Hikusa a valala va nga ha txhuka va nga swi twisisi ha hombe,
Va nga ha tibyela leswi: “Hi hlule hi ntamu wezru;
A hi Yehovha lweyi a yentxiki hinkwaswu leswi.”
28 Hikusa a Vaisrayele i vhanu va ku a va tlhazrihanga,
Nakone a ku twisisa a ku kone kwavu.
29 Ni loko a ve tlhazriha! A va ta yanakanyisisa hi mintxhumu leyi.
A va ta yanakanya hi leswi a swi ta va humelela.
30 Swi nga kotekisa kuyini ku va mun’we a hlongolisa 1.000 wa vhanu,
Nakone vabidzri va hlongolisa 10.000 wa vone?
A swi nge ti koteka loko a va nga nyikeliwanga hi Zribye dzravu
Loko Yehovha a a nga va nyikelanga ka valala vavu.
31 Hikusa a zribye dzravu a dzri fani ni Zribye dzrezru,
Nambi valala vezru va swi tiva leswo.
32 Hikusa a nsinya wavu wa mawuvha i wa le Sodoma
Ni le masin’wini ya Gomora.
A mawuvha yavu ma ni vhenene,
A switxatxa swa wone swa bava.
33 A vhinyu dzravu i mahlungu ya tinyoka,
Vhenene dzra tinyoka ledzri dlayaka.
34 Hinkwaswu leswi va swi yentxaka ni swi bekise ha hombe,
Ni swi bekisile a mbangwini wanga wa ku hlayisela ka wone mintxhumu.
35 Hi mine ni taka dzrihisela ni ku hakelisa hi nkama lowu bekisiwiki,
Lani a nkondzro waku wu taka zretemuka,
Hikusa a siku dzraku dzra khombo dzri kusuhi,
Nakone leswi swi mi yimeliki swi ta tlhasa hi ku kahlula.’
36 Yehovha a ta yavanyisa vhanu vake
Nakone a ta tsretsrelela malandzra yake
Loko a vona leswaku a ve he na ntamu,
Ni leswaku ke sala lweyi a ngeke na mupfuni ni lweyi a heliki ntamu.
37 Kutani a ta ku: ‘Swi kwini swikwembu swavu?
Zribye ledzri va djuliki wutumbelo ka dzrone,
38 Leswi a swi da fuzra dzra magandzrelo yavu*
Nakone a swi nwa vhinyu dzra magandzrelo yavu ya swa ku nwa?
A swi buyi swi ta ta mi pfuna.
A swi ve wutumbelo byenu.
39 Swoswi swi vonani leswaku mine, ina, mine ni Xikwembu Nkulukumba.
Nakone a ku na swikwembu swin’wana handle kwanga.
Mine na dlaya ni tlhela ni hanyisa.
Mine na vavisana ni tlhela ni dahana,
Futsrhi a nga kone lweyi a nga huluxaka mhunu a mavokweni yanga.
40 Hikusa ni tlakula voko dzranga,
Ni va ni funga ni ku: “Swanga hi leswi ni hanyaka hi lani ku nga helikiki,”
41 Loko ni ta lota xipada xanga xa ku phatima
Ni va ni lulamela ku yavanyisa,
Ni ta tidzrihisela ka valala vanga
Ni va ni hakelisa lava ni nyenyaka.
42 Ni ta popswisa minseve yanga hi ngati,
Ni xipada xanga xi ta da nyama,
Ngati ya lava dlayiwiki ni ya lava yisiwiki wukazraweni
Tinhloko ta vazrangeli va valala.’
43 Nyonxani n’wine matiko kun’we ni vhanu vake,
Hikusa a ta dzrihisela ngati ya malandzra yake,
A ta tidzrihisela ka valala vake,
Nakone a ta basisa tiko dzra malandzra yake.”
44 Kutani Moxe a tlhasa a hlaya mazritu hinkwawu ya lisimu ledzri, a mahlweni ka vhanu, na a na Hoxeya* n’wana wa Nuni. 45 Loko Moxe a hete ku byela Vaisrayele hinkwavu mazritu lawa hinkwawu, 46 a te: “Yanakanyisisani hi mazritu lawa hinkwawu ya xibasopiso lawa ni mi byelaka wone namunhla, akuva mi ta kota ku byela vanenu leswaku va hetisisa mazritu hinkwawu ya Nawu lowu. 47 Hikusa a hi mazritu lawa ma nga pfunikiki ntxhumu kwenu, kambe mazritu lawa i wutomi byenu, nakone hi kola ka wone mi ta kota ku hanya nkama wa ku leha a tikweni ledzri mi taka dzri teka loko mi ta tsremakanya nambu wa Yordani.”
48 Hi siku dzroledzro Yehovha a byela Moxe a ku: 49 “Tlhantukela a nhaveni leyi ya muganga wa Abarimi, ku nga Nhava ya Nebo, leyi kumekaka a tikweni dzra Mowabu a mahlweni ka Yeriko, u ta vona tiko dzra Kanana ledzri ni dzri nyikaka Vaisrayele akuva dzri va pfindla dzravu. 50 Kutani u ta ya fela a nhaveni leyi u taka tlhantukela ka yone, u va u tlhanganisiwa ni vakokwana vaku* hi lani swi viki ha kone ka makwenu Aroni, lweyi a fiki a Nhaveni ya Hori a va a tlhanganisiwa ni vhanu vake, 51 hikusa a mi dumbekanga kwanga a makazri ka Vaisrayele na mi li a matini ya Meriba a Kadexi, a mananga ya Zini; a mi ni xwengisanga a mahlweni ka Vaisrayele. 52 U ta vona tiko na u yime hi le kule, kambe a u nge ti nghena a tikweni ledzri ni dzri nyikaka Vaisrayele.”