Papela dzra ku sungula dzra Yohane
4 Vazrandzriwa, mi nga kholwi mazritu hinkwawu lawa ku hlayiwaka leswaku ma pfa ka Xikwembu Nkulukumba,* kambe zrangani hi ku ma kambela akuva mi vona loko nakunene ma pfa hi ka Xikwembu Nkulukumba, hikusa swoswi ku ni vaprofeta vanyingi va madzrimi a misaveni.
2 A mazritu lama pfaka hi ka Xikwembu Nkulukumba mi ta ma tivisa xileswi: A mazritu hinkwawu lama pfaka hi ka Xikwembu Nkulukumba ma pfumela leswaku Yesu Kriste a te misaveni swanga mhunu wa nyama. 3 Kambe a mazritu hinkwawu lawa ku hlayiwaka leswaku ma pfa hi ka Xikwembu Nkulukumba na ma nga pfumeli leswaku Yesu a te misaveni swanga mhunu wa nyama, a ma pfi hi ka Xikwembu Nkulukumba. Handle ka leswo, lawa i mazritu ya lweyi a lwisanaka na Kriste,* lawa mi yingeliki leswaku a a ta ma hlaya, nakone swoswi ku vulavuliwa ha wone a misaveni.
4 Vatsrongwana vanga, n’wine mi vana va Xikwembu Nkulukumba nakone mi va hlulile vaprofeta va madzrimi, hikusa Xikwembu Nkulukumba awa mi seketela nakone i mukulu ku tlula Diyavulosi lweyi a seketelaka misava. 5 Vone i va misava; hi leswo swi yentxaka leswaku va vulavula mintxhumu leyi fambisanaka ni misava nakone a misava ya va yingiseta. 6 Hine hi vana va* Xikwembu Nkulukumba. Mun’wana ni mun’wana lweyi a tivaka Xikwembu Nkulukumba awa hi yingiseta, lweyi a kalaka a nga li n’wana wa Xikwembu Nkulukumba a nga hi yingiseti. Hi ndlela leyi, hi kota ku hambanisa mazritu lawa ku hlayiwaka leswaku ma pfa hi ka* Xikwembu Nkulukumba lawa ma nga ya ntiyiso, ni lawa ku hlayiwaka leswaku ma pfa hi ka Xikwembu Nkulukumba nakasi a hi ntiyiso.
7 Vazrandzriwa, a hi tameni hi zrandzrana, hikusa a lizrandzru dzri pfa hi ka Xikwembu Nkulukumba, nakone mun’wana ni mun’wana lweyi a nga ni lizrandzru i n’wana wa* Xikwembu Nkulukumba, futsrhi awa mu tiva Xikwembu Nkulukumba. 8 Lweyi a kalaka a nga na lizrandzru a nga mu tivi Xikwembu Nkulukumba, hikusa Xikwembu Nkulukumba i lizrandzru. 9 A lizrandzru dzra Xikwembu Nkulukumba hi kombiwe dzrone hi ndlela leyi: Xikwembu Nkulukumba a zrumele N’wanake a misaveni, lweyi a pswaliwiki na a li wuswake, akuva hi kota ku kuma wutomi hi ku tizrisa yene. 10 A lizrandzru ledzro dzri hi ndlela leyi: A hi leswaku hi hine hi zrandzriki Xikwembu Nkulukumba, kambe Xikwembu Nkulukumba hi yene a hi zrandzriki a va a zrumela N’wanake swanga gandzrelo dzra ku funeketa swidoho swezru.*
11 Vazrandzriwa, leswi Xikwembu Nkulukumba a hi zrandzriki hi ndlela leyi, na hine hi fanela ku zrandzrana. 12 A ku na mhunu lweyi a samiki a vona Xikwembu Nkulukumba. Loko hi tama hi zrandzrana, Xikwembu Nkulukumba a tama a va na hine nakone a lizrandzru dzrake dzri va ledzri heleliki* kwezru. 13 Hi kola ka leswi, ha swi tiva leswaku hi tama hi va ni wumun’we na yene, na yene a va ni wumun’we na hine, hikusa a hi nyike moya wake. 14 Handle ka leswo, hine ha wuswezru hi swi vonile nakone hi nyikela wumboni bya leswaku Papayi a zrumele N’wanake swanga muhuluxi wa misava. 15 Lweyi a pfumelaka leswaku Yesu i N’wana wa Xikwembu Nkulukumba, Xikwembu Nkulukumba a tama a va ni wumun’we na yene, na yene mhunu yelweyo a tama a va ni wumun’we na Xikwembu Nkulukumba. 16 Nakone ha swi tiva hi tlhela hi swi kholwa leswaku Xikwembu Nkulukumba awa hi zrandzra.
Xikwembu Nkulukumba i lizrandzru, lweyi a kombisaka lizrandzru minkama hinkwayu, a tama a va ni wumun’we na Xikwembu Nkulukumba, na yene Xikwembu Nkulukumba a tama a va ni wumun’we na yene. 17 Hi ndlela leyi, a lizrandzru dzri ve ledzri hetisekiki kwezru, akuva hi kota ku vulavula na hi ntsrhunxekile* hi siku dzra wuyavanyisi, hikusa leswi Yesu Kriste a nga xiswone, na hine hi tsrhamisise xiswoswo a misaveni leyi. 18 A lizrandzru a dzri txhavi, kambe a lizrandzru ledzri heleliki* dzri hlongola* ku txhava, hikusa a ku txhava ku hi sivela ku yentxa mintxhumu yinyingi. Nakunene lweyi a txhavaka, a lizrandzru dzrake a dzri helelanga.* 19 Hine hi ni lizrandzru hi leswi yene a zrangiki a hi zrandzra.
20 Loko mhunu a ku: “Na mu zrandzra Xikwembu Nkulukumba”, nakasi a nyenya makwavu, i muhembi. Hikusa lweyi a kalaka a nga mu zrandzri makwavu lweyi a mu vonaka, a nge mu zrandzri Xikwembu Nkulukumba lweyi a kalaka a nga mu voni. 21 Nakone a hi nyike nawu wa leswaku lweyi a zrandzraka Xikwembu Nkulukumba a fanela ku zrandzra ni makwavu.