Levhitika

25 Yehovha a ya mahlweni a vulavula na Moxe a Nhaveni ya Sinayi, a ku: 2 “Byela Vaisrayele u ku: ‘Loko hi wugamu mi nghena tikweni ledzri ni mi nyikaka dzrone, a tiko dzri ta bekisa savata dzra Yehovha. 3 Ku dzringana 6 wa malembe mi fanela ku byala a masin’wini kwenu, mi khakhata* minsinya yenu ya mawuvha mi va mi tsrhovela. 4 Kambe a lembe dzra wu 7 dzri ta va savata dzra leswaku misava yi wisa hi lani ku heleliki, savata dzra Yehovha. A mi fanelanga mi byala a masin’wini kwenu nambi ku khakhata minsinya yenu ya mawuvha. 5 A mi fanelanga mi tsrhovela leswi nga ti milela ka tinhleke leti weteteliki ka ntsrhovelo wa wugamu nambi ku khaya mawuvha ka minsinya yenu ya mawuvha leyi kalaka yi nga khakhatiwanga. A masimu ma fanela ku va ni lembe dzra kuva ma wisisiwa hi lani ku heleliki. 6 Kambe n’wine, malandzra yenu ya xinuna ni ya xisati, vatizri lava mi nga va thola, kun’we ni valuveli lava tsrhamaka na n’wine, mi nga da leswi misava yi taka swi bindzrula hi savata. 7 A swifuyu ni swihazri swa nhova leswi nga kone a tikweni na swone swi nga da, mi nga da hinkwaswu leswi a misava yi taka swi bindzrula.

8 “‘U ta konta 7 wa malembe ya masavata u ma phindha ka 7, kutani a nhlayu ya wone hinkwawu yi ta va 49 wa malembe. 9 Hi siku dzra wu 10 ka hweti ya wu 7, ku nga Siku dzra ku Kombela ku Dzrivaleliwa, mi ta txhaya mpfumawulu wa nanga wu twala ngopfu swinene, mi fanela ku wu txhaya wu twiwa a tikweni dzrenu hinkwadzru. 10 Xwengisani lembe dzra wu 50, ku nga lembe dzra ku huweleliwa ka ntsrhunxeko ka vahanyi hinkwavu va le tikweni ledzro. Lembe ledzro dzri ta va Jubilewu* kwenu xileswo mun’wana ni mun’wana a fanela ku tlhelela ka mintxhumu yake, nakone a fanela ku tlhelela a maxakeni yake. 11 A lembe dzra wu 50 dzri ta va Jubilewu kwenu. A mi nge ti byala, nakone mi nge ti tsrhovela leswi swi ti mileliki ka tinhleke leti wiki, nambi ku hlengeleta mawuvha ya le minsinyeni ya mawuvha leyi kalaka yi nga khakhatiwanga. 12 Hikusa i Jubilewu. Dzri fanela ku va ledzri xwengiki kwenu. Mi nga da ntsena leswi swo ko yentxa hi ku timilela a tikweni.

13 “‘Hi lembe dzra Jubilewu, mun’wana ni mun’wana a fanela ku tlhelela ka mintxhumu yake. 14 Loko mi xavisela mhunu mun’wana ntxhumu wa kukazri kumbe mi xava ntxhumu wa kukazri kwake, mi nga xololani. 15 Loko u xava ntxhumu wa kukazri ka mun’wana u fanela ku konta malembe lawa ma khalutiki ntsrhaku ka Jubilewu; ni loko a ku xavisela nsimu a fanela ku ku xavisela hi ku ya hi malembe lawa ma ha saliki akuva ku tsrhoveliwa. 16 Loko ka ha sale malembe ya manyingi a nga ha yengesela mali, kambe loko ke sala malembenyana a fanela ku pumba, hikusa a va na a mu xavisela tinhleke leti ta ha taka bindzrula. 17 Ku nga vi na mhunu kwenu lweyi a xololaka mhunu mun’wana; mi fanela ku txhava Xikwembu Nkulukumba wenu, hikusa hi mine Yehovha Xikwembu Nkulukumba wenu. 18 Loko mi bekisa milawu yanga ni swiboho swanga swa wuyavanyisi, mi ta tsrhama na mi sizrelelekile a tikweni ledzro. 19 A tiko dzri ta humesa mihandzru ya dzrone, nakone mi ta da mi xuzra mi va mi hanya ka dzrone na mi sizrelelekile.

20 “kambe loko mi ku: “Hi ta da yini hi lembe dzra wu 7, swanga hi leswi hi kalaka hi nga fanelanga ku byala nambi ku tsrhovela?”, 21 mi nga vileli, hikusa hi lembe dzra wu 6 ni ta mi tovokisa, lakakuva misava yi bindzrula leswi yanelaka malembe mazrazru. 22 Xileswo mi ta byala hi lembe dzra wu 8, na mi tama mi da ntsrhovelo wa lembe dzra wu 6 ku ya tlhasa ka lembe dzra wu 9. Mi ta da ntsrhovelo lowo ku za ku tlhasa ntsrhovelo lowu landzrelaka.

23 “‘A mi fanelanga mi xavisela mhunu wa kukazri mbangu wa tiko ledzro akuva wu va wake hi lani ku nga heleliki hikusa a tiko i dzranga. Futsrhi hi ku ya hi vonela dzranga n’wine mi valuveli. 24 A mimbangu hinkwayu leyi yi mi lumbaka ya tiko ledzro swi fanela ku tlhela swi koteka kuva yi tlhelisiwa.*

25 “‘Loko makwenu o ndzruluka xisiwana lakakuva a xavisa xiyenge xa mbangu wake, a mutizruli, lweyi a nga xaka dzrake dzra le kusuhi, a fanela ku ta ta xava* mbangu lowu a wu xavisiki. 26 Loko mhunu wa kukazri a nga na xaka dzra le kusuhi ledzri nga xavaka mbangu lowu a wu xavisiki, kambe yene a hluvuka, a va ni makotela ya ku tizrula mbangu wake, 27 a fanela ku kontela leswaku ku khalute malembe mangani ntsrhaku ka loko a wu xavisile, kutani a hakela mali ya malembe lawa ma ha saliki akuva ku tlhasa Jubilewu. Hi ndlela leyo, a mbangu wu nga tlhelela ka n’winyi wa wone.

28 “‘Kambe loko a nga na makotela ya ku tizrula leswi a swi xavisiki, swi ta tama swi va swa muxavi ku za ku tlhasa lembe dzra Jubilewu; kutani hi Jubilewu a mbangu wolowo wu ta tlheliseliwa ka n’winyi wa wone wa ku sungula, wu va wu lumba yene.

29 “‘Loko wanuna wa kukazri a xavisa yindlu a doropeni ledzri nga ni muru, a mfanelo yake ya ku tizrula yindlu leyo yi ta tizra ku ya tlhasa loko a tlhanganisa lembe na a xavise yindlu leyo; a mfanelo yake ya ku tlhela a xava* yindlu leyo yo tizrela lembe dzrin’we ntsena. 30 Kambe loko a nga yi xavi ku za ku hela lembe, a yindlu leyi nga doropeni ledzri biyeliwiki hi muru yi ta lumba lweyi a yi xaviki hi lani ku nga helikiki, a tinxakeni take hinkwatu. A nga fanelanga a yi tlhelisa hi Jubilewu. 31 Nambitasu, a tiyindlu leti nga mimbangwini leyi kalaka yi nga biyeleliwanga hi muru ti fanela ku voniwa na ti li xiyenge xa masimu ya tiko. A mfanelo ya ku va ti tlhela ti xaviwa hi vinyi va tone va ku sungula yi fanela ku tama yi tizra, nakone hi Jubilewu a tiyindlu leto ti fanela ku tlhelisiwa.

32 “‘Mayelanu ni tiyindlu ta Valevhi leti nga madoropeni yavu, a Valevhi va ni mfanelo ya hi lani ku nga helikiki ya ku tlhela va ti xava. 33 Kambe loko Mulevhi wa kukazri a nga tlheli a yi xava yindlu leyi a yi xavisiki, a yindlu leyo leyi nga doropeni, leyi lumbaka Valevhi yi fanela ku tlhelisiwa hi lembe dzra Jubilewu, hikusa a tiyindlu leti nga madoropeni ya Valevhi i pfindla dzravu a makazri ka Vaisrayele. 34 Handle ka leswo, a mimbangu ya ku byisela ka yone leyi nga matlhelweni ka madoropa yavu a yi fanelanga yi xavisiwa, hikusa i pfindla dzravu dzra hi lani ku nga helikiki.

35 “‘Loko makwenu lweyi a hanyaka na n’wine a va xisiwana, a nga swi koti ku kuma swa ku tihanyisa, u fanela ku mu pfuna hi lani a wu ta mu pfuna ha kone mhunu lweyi a nga muluveli, akuva a tama a hanya. 36 U nga mu voleki ntxhumu na u yimela kuva a ku tlhelisela na swi li swinyingi. Txhava Xikwembu Nkulukumba waku, kutani a makwenu a ta tama a hanya. 37 U nga mu voleki mali kutani u yimela kuva a ku tlhelisela na yi li yinyingi kumbe u mu nyika swakuda na u yimela leswaku a ku tlhelisela na swi li swinyingi. 38 Hi mine Yehovha Xikwembu Nkulukumba wenu, lweyi a mi humesiki tikweni dzra Egipta akuva a mi nyika tiko dzra Kanana leswaku ni tiyisekisa leswaku ni Xikwembu Nkulukumba wenu.

39 “‘Loko makwenu lweyi a hanyaka na n’wine a va xisiwana lakakuva a tixavisa kwaku, u nga mu sindzrisi ku yentxa mintizro ya wukazrawa. 40 Hanyisana na yene swanga mutizri lweyi u mu tholiki kumbe muluveli. A fanela ku ku tizrela ku ya tlhasa ka lembe dzra Jubilewu. 41 Ntsrhaku ka leswo, a ta timukela kun’we ni vanake, a tlhelela ndangwini wake. A fanela ku tlhelela pfindleni dzra vakokwana vake. 42 Hikusa vone i swikazrawa swanga, leswi ni swi humesiki a tikweni dzra Egipta. A va fanelanga va tixavisa hi ndlela leyi swikazrawa swi xavisiwaka ha yone. 43 Mi nga va yentxeli tihanyi; txhavani Xikwembu Nkulukumba wenu. 44 Lava va nga yentxiwaka swikazrawa swenu swa xinuna ni swa xisati, va fanela ku pfa hi ka matiko ya le kusuhi na n’wine. Mi nga tixavela xikazrawa xa xinuna kumbe xa xisati ka matiko wolawo. 45 Nakone mi nga ha xava swikazrawa ka vana va valuveli lava tsrhamaka na n’wine, kumbe ka mindangu ya vana lava pswaleliwiki vone, lava tsrhamaka a tikweni dzrenu. Hi ndlela leyo va ta va pfindla dzrenu. 46 A vhanu lavo va nga va pfindla ledzri mi nga dzri nyikaka vanenu, pfindla dzra hi lani ku nga helikiki. Mi nga va tizrisa swanga vatizri, kambe loko ku li vamakwenu lava nga Vaisrayele mi nga va hambeli nsele.

47 “‘Kambe loko mhunu lweyi a nga muluveli kwenu a hluvuka, a makwenu lweyi a nga Muisrayele lweyi a hanyaka na wene a va xisiwana lakakuva swi djula a tinyikela ka muluveli lweyo kumbe ka xaka dzra muluveli yelweyo, 48 a ta tama a va ni mfanelo ya ku tizruliwa ntsrhaku ka loko a tixavisile. Mun’we ka vamakwavu a nga ha mu tizrula, 49 kumbe a nga ha tizruliwa hi malume wake, hi n’wana malume wake, hi xaka dzrake dzra le kusuhi kumbe hi xizro xa kukazri xa ndangu wake.

“‘Loko yene kutani a hluvukile, a nga ha titizrula ha wuswake. 50 Yene kun’we ni lweyi a mu xaviki va fanela ku konta ku sukela ka lembe ledzri a tixavisiki kwake ha dzrone ku ya tlhasa ka lembe dzra Jubilewu, kutani a mali ya ku xavisiwa kwake yi ta ya hi nhlayu ya malembe. A mali ya masiku lawa a ma tizriki yi ta fana ni ya muholo wa mutizri lweyi e ke tholiwa. 51 Loko ka ha kiyela malembe manyingi, a fanela ku hakela mali ya ku tizruliwa kwake ya malembe lawa ma ha saliki. 52 Kambe loko ke sala malembenyana akuva ku tlhasa lembe dzra Jubilewu, a fanela ku tihambela tikonta a va a hakela mali ya xitizrulo xake ya malembe lama ha saliki. 53 Lembe dzrin’wana ni dzrin’wana a fanela ku tizrela lweyi a mu xaviki, na a tizra ku fana ni mutizri lweyi a tholiwiki nakone u nga pfumeleli kuva lweyi a mu xaviki a mu hambela nsele. 54 Kambe loko a nga na makotela ya ku titizrula hi tindlela leti, yene kun’we ni vanake va fanela ku ntsrhunxiwa hi lembe dzra Jubilewu.

55 “‘Hikusa a Vaisrayele i swikazrawa swanga. I swikazrawa swanga leswi ni swi humesiki a tikweni dzra Egipta. Hi mine Yehovha, Xikwembu Nkulukumba wenu.