Vayavanyisi

13 A Vaisrayele va tlhela va yentxa leswi bihiki a mahlweni ka Yehovha, kutani Yehovha a va nyikela mavokweni ya Vafilista ku dzringana 40 wa malembe.

2 A nkameni lowo a ku ni wanuna wa kukazri wa le Zora, wa lixaka dzra Dani. A vito dzrake a a li Manowa. A nsati wake a a nga pswali* nakone a a nga na vana. 3 Siku dzrin’wana a ntsrumi ya Yehovha yi humelele ka nsati wake yi va yi ku: “Wene a u pswali nakone a u na n’wana kambe u ta va ni nyimba u va u pswala n’wana wa djaha. 4 U nga txhuki u nwa vhinyu kumbe byala byimbeni, nakone u nga txhuki u da ntxhumu ni wun’we lowu wu kalaka wu nga basanga. 5 U ta va ni nyimba u va u pswala n’wana wa djaha. A misisi yake a yi fanelanga yi tsremetiwa hikusa a n’wana lweyo a ta va Munaziri wa Xikwembu Nkulukumba ku sukela a ku pswaliweni kwake,* nakone a ta huluxa Vaisrayele a mavokweni ya Vafilista.”

6 Hiloko lwe wansati a ya dzrungulela nuna wake a ku: “Ni teliwe hi wanuna wa kukazri lweyi a pfaka hi le ka Xikwembu Nkulukumba. A a voneka swanga ntsrumi ya Xikwembu Nkulukumba, nakone a wuso byake a byi phatima ngopfu. A ni mu vutisanga leswaku a pfa kwini, nambi ku li vito dzrake. 7 Kambe a ni byele leswi: ‘U ta va ni nyimba nakone u ta pswala n’wana wa djaha. U nga nwi vhinyu kumbe byala byimbeni, nakone u nga di ntxhumu lowu wu kalaka wu nga basanga, hikusa n’wana lweyi u taka mu pswala a ta va Munaziri wa Xikwembu Nkulukumba, ku sukela a ku pswaliweni kwake* ku ya tlhasa siku ledzri a taka fa ha dzrone.’”

8 Kutani Manowa a kombela hi mbilu hinkwayu ka Yehovha a ku: “Ni dzrivaleli Yehovha, ni kombela kuva a wanuna lweyi a lumbaka wene Xikwembu Nkulukumba wa ntiyiso, lweyi wa ha ka ku mu zruma, a tlhela a buya akuva a hi dondzrisa leswi hi fanelaka ku swi yentxa hi n’wana lweyi a taka pswaliwa.” 9 Hiloko Xikwembu Nkulukumba wa ntiyiso a yingela xikombelo xa Manowa, kutani a ntsrumi ya Xikwembu Nkulukumba wa ntiyiso yi tlhela yi tela nsati wa Manowa na a tsrhame masin’wini; kambe a a nga li xikan’we ni nkatake Manowa. 10 Lwe wansati a tsrutsruma a yela nuna a tlhasa a ku: “Lavisa! A wanuna lweyi a nga ni tela siku ledzriyani a tlhele a buya.”

11 Hiloko Manowa a sekeleka a famba ni nsati. A tlhasa a vutisa lwe wanuna a ku: “Hi wene u nga sama u vulavula ni nkatanga?” A mu hlamula a ku: “Ina, hi mine.” 12 Kutani Manowa a ku: “Ingiki leswi u swi hlayiki swi nga hetiseka! Hi fanela ku mu wundlisa kuyini n’wana, nakone i yini leswi a taka swi yentxa loko a kula?” 13 A ntsrumi ya Yehovha yi byela Manowa yi ku: “A nkataku a fanela ku yentxa hinkwaswu leswi ni mu byeliki swone. 14 A nga fanelanga a da ntxhumu ni wun’we lowu pfaka hi ka nsinya wa mawuvha, a nga fanelanga ku nwa vhinyu kumbe byala byimbeni, nakone a nga fanelanga a da ntxhumu lowu wu kalaka wu nga basanga. A fanela ku yentxa hinkwaswu leswi ni mu byeliki swone.”

15 Hiloko Manowa a byela ntsrumi ya Yehovha a ku: “Hi kombela u yimanyana hi ku dlayela ximbutana.” 16 Kambe a ntsrumi ya Yehovha yi byela Manowa yi ku: “Nambiloko ni ngo yimanyana a ni nge ti da swakuda swaku; kambe loko u swi nyonxela u nga hambela Yehovha gandzrelo dzra ku hisiwa.” Manowa a a nga swi tivi swaku wanuna lwiyani a a li ntsrumi ya Yehovha. 17 Manowa a byela ntsrumi ya Yehovha a ku: “Hi wene mani vito dzraku akuva hi ta ku dzrumisa loko leswi u swi hlayiki swi hetiseka?” 18 Kambe ntsrumi ya Yehovha yi byela Manowa yi ku: “Ha yini u djula ku tiva vito dzranga, nakasi dzra hlamalisa?”

19 Hiloko Manowa a teka mbuti ni gandzrelo dzra tinhleke a swi nyikela ka Yehovha a henhla ka zribye. Kutani ntsrumi yi hamba ntxhumu wa ku hlamalisa na Manowa ni nsati va swi vona. 20 A nkama lowu a malangavi ma tlhantukaka ma ya matilweni, Manowa ni nsati wake va vona ntsrumi ya Yehovha na yi tlhantukela matilweni na yi li malangavini lawa a ma pfuzra a altarini. Hi ku kahlula va khinsama va kozramisa tinhloko. 21 A ntsrumi ya Yehovha a ya ha tlhelanga yi humelela ka Manowa ni le ka nsati wake. Hiloko Manowa a xiya leswaku a ku li ntsrumi ya Yehovha. 22 Kutani Manowa a byela nsati wake a ku: “Nakunene hi ta fa hikusa hi vone Xikwembu Nkulukumba.” 23 Kambe a nsati wake a ku: “Loko Yehovha a o djula ku hi dlaya a a ta va a nga a dzri yamukelanga gandzrelo dzra ku hisiwa ni gandzrelo dzra tinhleke leswi hi swi nyikeliki, futsrhi a a ta va a nga hi kombanga mintxhumu hinkwayu leyi a hi kombiki yone nakone a a ta va a nga hi byelanga leswi a hi byeliki.”

24 Hi ku famba ka nkama, lwe wansati a pswala n’wana wa djaha a va a mu txhula vito dzra ku Samsoni; a xidjahatana a xi tama xi kula nakone Yehovha a a tama a xi tovokisa. 25 Hi ku famba ka nkama a moya wa ku xwenga wa Yehovha wu sungula ku tizra ka Samsoni na a li Mahene-dani lani ku kumekaka xikazri ka Zora ni Extawoli.