Vayavanyisi
20 Hiloko Vaisrayele hinkwavu, ku sukela a Dani ku ya tlhasa a Berxeba ni tiko hinkwadzru dzra Giliyadi, va hlengeletana hi nkongometo wun’we* a mahlweni ka Yehovha a Mizpa. 2 Xileswo a vazrangeli va tiko, ku nga vazrangeli va tinxaka hinkwatu ta Israyele, va yime mahlweni ka nhlengeletanu ya vhanu va Xikwembu Nkulukumba; a ku ni 400.000 wa masotxha* lawa a ma ni swipada.
3 A va ka Benjamini va twa leswaku a vavanuna va le Israyele va tlhantukile va ya a Mizpa.
Hiloko vavanuna va le Israyele va vutisa va ku: “Hi nga hi byelani, kasi byi yentxekise kuyini wubihi lebyi?” 4 Xileswo a Mulevhi, ku nga nuna wa wansati lweyi a dlayiwiki, a hlamula a ku: “Mine ni nkatanga hi tlhase a Gibeya ka va ka Benjamini akuva hi yetlela kone. 5 Hiloko vahanyi* va le Gibeya va ni pfukela va va va tsrandzrela yindlu a wusikwini. A va djula ku ni dlaya, kambe a matsrhan’wini ya leswo va pfinye nkatanga a va a fa. 6 Kutani ni teke ntsrumbu wa nkatanga ni wu tsremelela hi swiyenge ni va ni zrumela xiyenge ha xin’we ka muganga wun’wana ni wun’wana wa Israyele, hikusa va yentxe ntxhumu lowu nga ni tingana ni lowu txhavisaka a Israyele. 7 Kutani swoswi, n’wine vhanu va le Israyele, hlayani vonela dzrenu mi va mi teka xiboho.”
8 Kutani hi wumun’we* a vhanu hinkwavu va ku: “A nga kone ni mun’we wezru lweyi a taka muka kaya kwake. 9 Swoswi a hi yentxeni leswi ka vahanyi va Gibeya: A hi hambeni wuhlolotwana* hi hlawula lava va taka ya lwa na vone. 10 Ka tinxaka hinkwatu ta Israyele hi ta hlawula 10 wa vavanuna ka 100 wa vone, 100 wa vone ka 1.000, ni 1.000 wa vone ka 10.000, akuva va hlengeleta swakuda swa masotxha lawa ma taka ya lwa ni Gibeya wa Benjamini, hi mhaka ya leswi va yentxiki ntxhumu lowu danisaka a Israyele.” 11 Xileswo vavanuna hinkwavu va le Israyele va hlengeletanile akuva va hlasela doropa ledzro.
12 Hiloko a tinxaka ta Israyele ti zrumela vavanuna ka vavanuna hinkwavu va lixaka dzra Benjamini akuva va ya va byela leswi: “Ha yini mi yentxe wubihi bya ku fana ni lebyi? 13 Swoswi nyikelani vavanuna va le Gibeya, lava va kalaka va nga pheli, akuva hi va dlaya hi helisa wubihi lebyi a Israyele.” Kambe a va ka Benjamini va yala ku yingiseta vamakwavu, ku nga tinxaka letin’wana ta Israyele.
14 Kutani a va ka Benjamini va huma a madoropeni va ya tlhangana a Gibeya hi nkongometo wa ku lwa ni vavanuna va le Israyele. 15 Hi siku ledzro, a va ka Benjamini va hlengelete 26.000 wa vavanuna a madoropeni yavu lava nga ni swipada, na ku nga kontiwi 700 wa tinhenha letikulu ta Gibeya. 16 Ka khandzra ledzro a ku ni 700 wa tinhenha letikulu leti a ti tizrisa voko dzra ximatsri. Nhenha ha yin’we a yi kota ku txopa zribye hi xibalakatsra yi nga phukwi nambi nsisi.
17 A vavanuna va le Israyele, na ku nga kontiwi va ka Benjamini, va hlengelete 400.000 wa vavanuna lava va nga ni swipada, nakone hinkwavu a va li tinhenha ta yimpi. 18 Va tlhantuke va ya Betele akuva va ya vutisa Xikwembu Nkulukumba. A Vaisrayele va vutisa va ku: “I mani kwezru lweyi a taka hi zrangela akuva hi ya lwa ni va ka Benjamini?” Yehovha a hlamula a ku: “Mi ta zrangeliwa ha Yuda.”
19 Hi mundzruku ka kone, a Vaisrayele va suka va ya dzima mintxhatxha akuva va lwa ni Gibeya.
20 Kutani a vavanuna va le Israyele va huma akuva va ya lwa ni va ka Benjamini kusuhi ni Gibeya. 21 Hiloko a va ka Benjamini va huma hi Gibeya va va va ya dlaya 22.000 wa masotxha ya Israyele hi siku ledzro. 22 Kambe a vavanuna va le Israyele va ve ni xixixi, kutani va tlhela va tilulamiselela ku lwa a mbangwini lowu a va li ka wone hi siku dzra ku sungula. 23 Hiloko Vaisrayele va tlhantuka va ya dzrilela Yehovha dzri za dzri pela va va va vutisa Yehovha va ku: “Xana hi fanela ku tlhela hi ya lwa ni vamakwezru, ku nga va ka Benjamini?” Yehovha a va hlamula a ku: “Tlhantukani mi ya lwa navu.”
24 Xileswo hi siku dzra wubidzri a Vaisrayele va tlhele va ya lwa ni va ka Benjamini. 25 Kutani a va ka Benjamini va huma hi le Gibeya va ya tlhangana ni Vaisrayele hi siku dzra wubidzri va tlhela va dlaya 18.000 wa masotxha ya Israyele lawa hinkwawu ka wone a ma ni swipada. 26 Hi kola ka leswo, a vavanuna hinkwavu va le Israyele va tlhantuka va ya Betele. Va dzrila va va va tsrhama kolanu a mahlweni ka Yehovha, nakone hi siku ledzro va titsrone swakuda dzri za dzri pela, va nyikela magandzrelo ya ku hisiwa ni magandzrelo ya ku kombela ku zrula a mahlweni ka Yehovha. 27 Ntsrhaku ka leswo, a vavanuna va le Israyele va vutisa Yehovha, hikusa a masikwini wolawo a Areka dzra xipfumelelanu dzra Xikwembu Nkulukumba wa ntiyiso a dzri li kohala. 28 (Feniyasi n’wana wa Eliyazari, n’wana wa Aroni, hi yene a a tizra swanga muprista a masikwini wolawo.) Va vutisa va ku: “Hi fanela ku tlhela hi famba hi ya lwa ni vamakwezru, ku nga vavanuna va ka Benjamini, kumbe hi fanela ku swi tsrhikisa xiswoswi?” Yehovha a va hlamula a ku: “Tlhantukani, hikusa mundzruku ni ta va nyikela mavokweni yenu.” 29 Hiloko Vaisrayele va beka vavanuna va tumbela a matlhelweni hinkwawu ya doropa dzra Gibeya.
30 Hi siku dzra wuzrazru, a Vaisrayele va tlhantukile akuva va ya lwa ni va ka Benjamini. Hiloko va tilulamisela ku lwa ni Gibeya hi lani va yentxiki ha kone ka makhambi lawa mambeni. 31 Loko va ka Benjamini va humile akuva va ya tlhangana ni khandzra dzra Vaisrayele, va wongeke va ya kule ni doropa. Kutani ku fana ni makhambi laman’wana, va sungule ku hlasela ni ku dlaya van’we ka vavanuna va le Israyele a switaratwini; xitaratu xin’we a xi tlhantuka xi ya Betele, lexin’wana a xi ya Gibeya. Va dlaye kolomu ka 30 wa vavanuna va le Israyele a switaratwini. 32 Lakakuva va ka Benjamini va tibyela leswi: “Hi le ku va hluleni ku fana ni makhambi laman’wana.” Kambe a Vaisrayele va ku: “A hi ntlhentlheni akuva hi va yisa switaratwini, va ta wongeka va ya kule ni doropa.” 33 Hiloko vavanuna hinkwavu va le Israyele va suka lomu a va yime kone, va tilulamisela ku lwa a Bali-tamari, kasi a Vaisrayele lava a va tumbele matlhelweni ya Gibeya, va huma lomu a va tumbele kone va ya hlasela doropa. 34 Hi ndlela leyo, 10.000 wa tinhenha letikulu ta kone ta tiko hinkwadzru dzra Israyele ti tlhasa a Gibeya, kutani a yimpi yi hisa ngopfu swinene. Kambe a va ka Benjamini a va nga swi tivi leswaku a va li kusuhi ni ku weliwa hi khombo.
35 Yehovha a hlula va ka Benjamini a mahlweni ka Vaisrayele nakone hi siku ledzro a Vaisrayele va dlaye 25.100 wa vavanuna va ka Benjamini lava hinkwavu a va ni swipada.
36 A nkama lowu Vaisrayele va nga tlhentlha loko va vona va ka Benjamini, a va ka Benjamini va yanakanye leswaku a va ta hlula Vaisrayele, kambe a Vaisrayele a va tlhentlha hi leswi a va dumba vavanuna lava a va tumbele a matlhelweni ya doropa dzra Gibeya akuva va dzri hlasela. 37 A vavanuna lava a va tumbelile, hi ku kahlula va huma va ya hlasela doropa dzra Gibeya. Va hangalaka ni doropa va va va dlaya vhanu hinkwavu hi xipada.
38 A masotxha ya Israyele a ma twanane ni vavanuna lava a va tumbelile leswaku a va ta tuvikisa ximusi swanga xikombiso xa leswaku va nghenile doropeni.
39 Loko masotxha ya Vaisrayele ma tlhentlha, a vavanuna va Benjamini va sungule ku va hlasela va va va dlaya 30 wa vavanuna va le Israyele. A va ku: “Nakunene hi le ku va hluleni hi lani hi yentxiki ha kone ka makhambi laman’wana.” 40 Hiloko ku sungula ku voneka xikombiso, ku nga musi lowu a wu tlhantuka swanga tlavi a doropeni. Loko vavanuna va ka Benjamini va ndzruluka ntsrhaku, va vona doropa hinkwadzru na dzri pfuzra. 41 Hiloko vavanuna va le Israyele va djikela vavanuna va ka Benjamini kutani va hela ntamu, hikusa va vone leswaku a va weliwe hi khombo. 42 Xileswo va tsrutsrume vavanuna va le Israyele va kongoma a mananga, kambe a va hulukanga, hikusa a va hlaseliwa ni hi vavanuna lava a va buya hi le madoropeni. 43 Va sivela va ka Benjamini hi matlhelo hinkwawu kutani va va dlayetela a mahlweni ka Gibeya, hi tlhelo dzra le wuxeni dzra doropa. 44 Hi wugamu ku dlayiwe 18.000 wa vavanuna va ka Benjamini; vavanuna hinkwavu lava, a va li tinhenha.
45 Vavanuna va ka Benjamini va djika va tsrutsruma va ya mananga, a zribyeni dzra Rimoni, a Vaisrayele va dlaya 5.000 wa vone a switaratwini. Va tama va va hlongolisa ku ya tlhasa Gidomu; xileswo va tlhele va dlaya 2.000 wa vavanuna. 46 A vavanuna hinkwavu va ka Benjamini lava va dlayiwiki hi siku ledzro ku ve 25.000 wa vone lava a va ni swipada, nakone hinkwavu a va li tinhenha. 47 Kambe 600 wa vone va kote ku tsrutsruma va ya a mananga, a zribyeni dzra Rimoni, nakone va tsrhame kolanu ku dzringana mune wa tihweti.
48 Kutani vavanuna va le Israyele va yela va ka Benjamini va tlhasa va dlayetela hinkwavu lava a va tsrhama madoropeni, hi xipada, ku patsra ni swihazri, leswi liki, hinkwaswu leswi a swi salile. Va tlhele va hisa madoropa hinkwawu lawa va khalutiki hi ka wone.