Nehemiya
5 Nambitanu a vavanuna ni vasati vavu va sungule ku dzrila hi kola ka vamakwavu, ku nga Vayuda. 2 Van’we a va ku: “Hine ni vanezru va xinuna ni va xisati hi vanyingi, hi vilela swakuda akuva hi da leswaku hi tama hi hanya.” 3 Van’wana a va ku: “Hi nyikela masimu yezru ya trigu ni ya mawuvha ni tiyindlu tezru swanga xitiyisekiso akuva hi kuma swakuda hi kola ka ku pfumaleka ka swakuda.” 4 Kasi van’wana a va ku: “Hi txeneke mali akuva hi hakela tinemba ta hosi, hi nyikela masimu yezru ya trigu ni ya mawuvha swanga xitiyisekiso. 5 Phela hine ni vamakwezru hi pswaliwe hi mhunu mun’we nakone a ku na ku hambana a xikazri ka vanezru ni vanavu, nambitanu, hi sindzriseka ku nyikela vanezru va xinuna ni va xisati swanga swikazrawa, futsrhi van’we ka vanezru va xisati kutani i swikazrawa. Nakone a hi nge yentxi ntxhumu akuva hi swi sivela leswo, hikusa a masimu yezru ya trigu ni ya mawuvha kutani ma lumba van’wana.”
6 Loko ni twe xidzrilo xavu ni mazritu lawa, ni hlundzruke ngopfu swinene. 7 Hiloko ni yanakanyisisa ha hombe hi mhaka leyi ni va ni sungula ku bulisana ni vhanu va xiyimu xa le henhla ni vapfunisi va govhernadori ni ku: “Hinkwenu mi koxa majuru ka* vamakwenu.”
Handle ka leswo, ni hambe ntlhanganu wa wukulu hi mhaka yavu. 8 Ni va byela ni ku: “Hi yentxe hinkwaswu leswi hi nga swi kota akuva hi huluxa vamakwezru, ku nga Vayuda lava a va xavisiwile ka matiko man’wana, kambe swoswi mi ta xavisa vamakwenu akuva hi tlhela hi va huluxa?” Loko va twe leswo va miyela, hi kuva va nga swi tivi leswaku va ta hlaya swa kuyini. 9 Hiloko ni ku: “Leswi mi swi yentxaka a hi swinene. Xana a mi nga fanelanga mi txhava Xikwembu Nkulukumba wezru akuva vhanu vamatiko, ku nga valala vezru, va nga hi poyili? 10 Na mine, vamakwezru ni vapfunisi vanga, hi va txeneke mali ni swakuda. Na kombela, a hi tsrhikeni ku va txeneka hi majuru. 11 Na kombela, va tlheliselani namunhla masimu yavu ya trigu, ya mawuvha, ya minhlwazri ni tiyindlu tavu ku patsra ni majuru ya* mali, swakuda, vhinyu ledzrimpshwa ni mafuzra, leswi mi va tekeliki swone.”
12 Xileswo va hlamula va ku: “Hi ta va tlhelisela mintxhumu yavu nakone a hi nge he ti va koxa ntxhumu. Hi ta yentxisa xileswi u hi byelisiki xiswone.” Kutani ni vitana vaprista ni va ni yentxa leswaku vavanuna lavayani va funga leswaku a va ta swi hetisisa leswi va swi dumbisiki. 13 Ntsrhaku ka leswo ni hlakahla mpahla yanga ni va ni ku: “Hi ndlela leyi fanaka, Xikwembu Nkulukumba a a va hlakahli a makaya kwavu ni le ka mintxhumu yavu, hinkwavu lava kalaka va nga landzri xidumbiso lexi, nakone hi ndlela leyi a va hlakahliwi va sala na va nge ha na ntxhumu.” Hiloko nhlengeletanu yi ku: “Amen!” Va dzrumisa Yehovha, kutani a vhanu va yentxa leswi va swi dumbisiki.
14 Handle ka leswo, ku sukela hi siku ledzri hosi yi ni bekiki leswaku ni va govhernadori wa le Yuda, ku sukela hi lembe dzra wu 20 ku ya ka lembe dzra wu 32 dzra ku fuma ka hosi Artaxerxi, leswi liki, ku dzringana 12 wa malembe, mine ni vamakwezru a hi koxanga swakuda leswi hi mfanelo a swi nyikiwa govhernadori. 15 Kambe vagovhernadori lava viki kone na mine ni nga si va govhernadori, siku ni siku a va koxa vhanu 456 wa magrama* ya prata akuva va xava swakuda ni vhinyu. Nambi vapfunisi vavu a va xanisa vhanu. Kambe mine a ni zanga ni swi yentxa leswo hikusa a ni txhava Xikwembu Nkulukumba.
16 Handle ka leswo, ni patsreke ka ntizro wa ku yaka muru, nakone a hi xavanga masimu, a vapfunisi vanga hinkwavu a va li ku yakeni. 17 A ku ni 150 wa Vayuda ni vapfunisi va govhernadori lava a va da menzeni wanga, na ku nga hlayiwi vhanu va matiko lawa hi vundzramaniki na wone, lava a va ta akuva va ta hi vona. 18 Siku ni siku a va ni lulamisela homu yin’we, 6 wa tihamba leta ku nona ta kone ni tihuku, nakone ntsrhaku ka 10 wa masiku man’wana ni man’wana a hi ni mixaka hinkwayu ya vhinyu hi ntalu, nambitanu a ni koxanga leswi hi mfanelo a swi nyikiwa govhernadori, hikusa vhanu a va ni ntizro wa wunyingi. 19 U nga ni dzrivali nakone ni tovokisi, We Xikwembu Nkulukumba wanga, hi kola ka mintxhumu hinkwayu leyi ni yi yentxeliki vhanu lava.