Papela ledzri yaka ka Vakolosa

3 Nambitanu, loko mi pfuxiwe kun’we na Kriste, yanani mahlweni mi djuletela mintxhumu ya le henhla, ku nga lani Kriste a tsrhamiki kone a vokweni dzra xinene dzra Xikwembu Nkulukumba. 2 Bekani miyanakanyu yenu ka mintxhumu ya le henhla, ku nga li ka mintxhumu ya le misaveni. 3 Hikusa n’wine mi file nakone a wutomi byenu byi fihliwe kun’we na Kriste hi ku ya hi ku zrandzra ka Xikwembu Nkulukumba. 4 Loko Kriste lweyi a nyikaka wutomi a kombisa ntamu, na n’wine mi ta kombisa ntamu kun’we na yene mi tlhela mi hlengela a ku phatimeni kwake.

5 Xileswo, dlayani ku navela ka swizro swa mizri wenu mayelanu ni swiyentxo swa tingana hi tlhelo dzra tinkuku,* nsila, ku navela ka swa tinkuku loku kalaka ku nga lawuleki, ku navela loku vavisaka ni makwanga, ku nga ku gandzrela swithombe. 6 A mahlundzru ya Xikwembu Nkulukumba ma ta wela vhanu lava yentxaka mintxhumu leyi. 7 Hi leswo na n’wine a mi hanyisa* xiswone khale. 8 Kambe swoswi, n’wine mi fanela ku txukumeta mintxhumu leyi hinkwayu: Ku leva, mahlundzru, wubihi, nhlambha ni mavulavulela ya nsila. 9 Mi nga hembelanani. Hlivilani wumhunu bya* khale kun’we ni mintizro ya byone, 10 mi yambala wumhunu lebyimpshwa lebyi yentxiwaka lebyimpshwa hi wutivi bya ntiyiso hi ku ya hi xifaniso xa lweyi a byi tumbuluxiki, 11 ka byone a ku na Mugriki kumbe Muyuda, mhunu lweyi a sokiki kumbe lweyi a kalaka a nga sokanga, mhunu lweyi a pfaka tikweni dzrin’wana, mhunu lweyi a pfaka hi le ntlhaveni,* xikazrawa kumbe mhunu lweyi a ntsrhunxekiki; kambe Kriste i hinkwaswu ka vhanu hinkwavu.

12 Xileswo, swanga vahlawuliwa va Xikwembu Nkulukumba, vaxwengi ni lava zrandzrekaka, yambalani timpswalu ni lizrandzru, wunene, ku titsrongahata,* ku zrula ni ku lehisa mbilu. 13 Yanani mahlweni mi byatsrhanana nakone mi dzrivalelana hi ku ntsrhunxeka nambiloko mhunu a ni xa ku sola mun’wana ha xone. Ku fana ni leswi Yehovha a mi dzrivaleliki hi ku ntsrhunxeka, na n’wine mi fanela ku yentxisa xiswoswo. 14 Kambe ku yengesela ka leswo hinkwaswu, yambalani lizrandzru hikusa a lizrandzru dzri yentxa leswaku vhanu hinkwavu va twanana hi ku helela.

15 Nakone pfumelelani ku zrula ka Kriste ku fuma timbilwini tenu,* hikusa mi vitaneliwe ko ku zrula koloko akuva mi va swizro swa mizri wun’we. Kutani minkama hinkwayu tlangelani. 16 Pfumelelani zritu dzra Kriste dzri tata timbilu tenu hi ku helela, hi ndlela leyo mi ta tlhazriha. Yanani mahlweni mi dondzrisana ni ku kutxanana* hi mapsalma, mi dzrumisa Xikwembu Nkulukumba hi tinsimu ta ku dzrumisa ni tinsimu ta ku tlangela Yehovha hi timbilu tenu. 17 Xin’wana ni xin’wana lexi mi xi hlayaka kumbe ku xi yentxa, yentxani hinkwaswu hi vito dzra Hosi Yesu, mi tlangela Xikwembu Nkulukumba tlhelo Papayi hi ku tizrisa yene.*

18 N’wine vasati, tibekani hansi ka vanuna venu, ku nga leswi fanelaka a Hosini. 19 N’wine vanuna, tamani mi zrandzra vasati venu nakone mi nga va hlundzrukeli ku tlula mpimu.* 20 N’wine vana, yingisetani vapswele venu ka hinkwaswu, hikusa hi swoleswo swi nyonxisaka Hosi. 21 N’wine vapapayi, mi nga hlundzrukiseni vanenu, akuva va nga heli mbilu.* 22 N’wine vatizri, yingisetani vatholi venu ka hinkwaswu, mi nga swi yentxi ntsena hi loko va mi vona, hi ku djula ku nyonxisa vhanu, kambe ku hambana ni leswo, va yingisetani hi timbilu tenu hinkwatu ni hi ku txhava Yehovha. 23 Xin’wana ni xin’wana lexi mi xi yentxaka, xi yentxani hi mbilu hinkwayu* ingiki hi loko mi xi yentxela Yehovha ku nga li vhanu, 24 hikusa ma swi tiva leswaku Yehovha a ta mi nyika pfindla dzri va hakelo dzrenu. Tizrelani mutholi wenu, ku nga Kriste. 25 Nakunene lweyi a yentxaka leswi bihiki a ta hakeliwa hi leswi bihiki hi kola ka leswi a swi yentxiki, hikusa Xikwembu Nkulukumba a nga na xihlawuhlawu.