Mpfuletelo Lowu Yamukeliwiki Hi Yohane

15 Kutani ni vona xiyentxakalu xin’wana* a tilweni, xa xikulu xi tlhela xi hlamalisa, xa 7 wa tintsrumi na ti tamele 7 wa makhombo. Lawa i makhombo ya wugamu, hikusa loko ma hela na wo mahlundzru ya Xikwembu Nkulukumba ma ta va ma helile.

2 Ni vona ntxhumu wa ku fana ni lwandle dzra vhidru, lowu a wu patsriwe ni ndzrilo nakone lava hluliki xihazri xa nhova ni xithombe xa xone kun’we ni nhlayu ya vito dzra xone, a va yime kusuhi ni lwandle dzroledzro dzra vhidru, na va tamele switende* swa Xikwembu Nkulukumba. 3 A va yimbelela lisimu dzra Moxe nandzra wa Xikwembu Nkulukumba ni lisimu dzra Xihambana, va ku:

“I yikulu nakone ya hlamalisa mintizro yaku, Yehovha Xikwembu Nkulukumba wa Ntamu Hinkwawu. A tindlela taku ti lulamile nakone i ta ntiyiso, wene Hosi ya hi lani ku nga helikiki. 4 Leswi ku nga wene ntsena lweyi a dumbekaka Yehovha, i mani lweyi nakunene a taka kala a nga ku txhavi ni ku dzrumisa vito dzraku? A matiko hinkwawu ma ta ta mahlweni kwaku ma ku gandzrela, hikusa ma swi vona leswaku u yavanyisa hi ndlela ya ku lulama.”

5 Ntsrhaku ka leswo ni lavisa, kutani ni vona leswaku a mbangu wa ku xwenga* wa tende dzra wumboni* a wu pfulekile a tilweni, 6 ku gama ku huma 7 wa tintsrumi na ti ni 7 wa makhombo hi le mbangwini wolowo wa ku xwenga, na ti yambale mpahla ya ku basa yi tlhela yi phatima, ti tsrimba ni mabandhi ya woru a swifuveni swa tone. 7 Xin’we xa swivumbiwa leswa mune leswi hanyaka xi nyika tintsrumi toleto ta 7, 7 wa swibya swa woru leswi taliki hi mahlundzru ya Xikwembu Nkulukumba lweyi a hanyaka hi masiku ni masiku. 8 Kutani a Mbangu wa ku Xwengisisa wa le tempeleni wu tala hi ximusi hi mhaka ya ku phatima ka Xikwembu Nkulukumba ni hi mhaka ya ntamu wake, nakone a ku na mhunu lweyi a kotiki ku nghena mbangwini wolowo ku ya tlhasa loko ku hela 7 wa makhombo ya 7 wa tintsrumi.