Deuteronoma

6 “Leswi i swileleto, milawu ni swiboho swa wuyavanyisi leswi Yehovha Xikwembu Nkulukumba wenu a ni leletiki kuva ni mi dondzrisa, leswaku mi ta swi landzra loko mi tsremakanya tiko ledzri mi taka dzri teka akuva dzri va dzrenu. 2 A yentxe leswo akuva u txhava Yehovha Xikwembu Nkulukumba waku, u va a wuton’wini byaku hinkwabyu u bekisa swileleto hinkwaswu ni milawu leyi ni ku byelaka yone, akuva u hanya nkama wa ku leha, wene, vanaku ni vatukulu vaku. 3 Yingela Wene Israyele, u va u swi landzrelelisisa ha hombe akuva swi ku fambela ha hombe ni leswaku mi yandzra a tikweni ledzri taliki ngopfu swinene hi leiti ni wulombe, hi lani Yehovha Xikwembu Nkulukumba wa vakokwana venu a mi dumbisiki ha kone.

4 “Yingela Wene Israyele, Yehovha Xikwembu Nkulukumba wezru i Yehovha mun’we. 5 U fanela ku zrandzra Yehovha Xikwembu Nkulukumba waku hi mbilu yaku hinkwayu, hi wutomi byaku hinkwabyu* ni hi ntamu waku hinkwawu.* 6 A mazritu lawa ni ku byelaka wone namunhla ma fanela ku va mbilwini yaku, 7 nakone u fanela ku ma dondzrisa* vanaku u va u vulavula ha wone loko u tsrhamile kaya kwaku, loko u famba a ndleleni, loko u yetlela ni loko u pfuka. 8 Ma tsrimbe a vokweni dzraku akuva ma ta va xidzrimuxo nakone ma fanela ku va mfungu a mombyeni waku.* 9 Ma tsrali a matlhelweni ka swipfalu swa yindlu yaku* ni le swipfalwini swa tinyangwa ta doropa dzraku.

10 “Loko Yehovha Xikwembu Nkulukumba waku a ku yentxa u nghena a tikweni ledzri a hlambanyeliki vakokwana vaku, ku nga Abrahamu, Izaki na Yakobe, leswaku a ta ku nyika dzrone, ku nga tiko ledzri nga ni madoropa lamakulu ni lamanene lawa u kalaka u nga ma yakanga, 11 ledzri nga ni tiyindlu leti taliki hi mintxhumu leyinene ya mixaka hinkwayu, leyi u kalaka u nga yi tizrelanga, ledzri nga ni swihlovo leswi u kalaka u nga swi kelanga nakone dzri nga ni minsinya ya mawuvha ni minhlwazri leswi u kalaka u nga swi byalanga, kutani u da u va u xuzra, 12 tivoneli akuva u nga mu dzrivali Yehovha lweyi a ku humesiki tikweni dzra Egipta, tiko dzra wukazrawa.* 13 U fanela ku txhava Yehovha Xikwembu Nkulukumba waku, u va u gandzrela yene ntsena, nakone u fanela ku hlambanya hi vito dzrake. 14 U nga txhuki u landzra swikwembu swin’wana, swikwembu swa matiko lawa ma ku tsrandzreliki, 15 hikusa Yehovha Xikwembu Nkulukumba waku, lweyi a nga makazri kwaku, i Xikwembu Nkulukumba lweyi a djulaka leswaku ku gandzreliwa yene ntsena, hikusa loko wo landzra swikwembu swimbeni, Yehovha Xikwembu Nkulukumba waku a ta ku hlundzrukela a va a ku helisa a misaveni.

16 “Mi nga txhuki mi dzringa Yehovha Xikwembu Nkulukumba wenu, hi lani mi mu dzringiki ha kone a Masa. 17 Mi fanela ku yi yingiseta ha hombe milawu ya Yehovha Xikwembu Nkulukumba wenu, swilayu swake* ni swileleto swake leswi a mi zrumiki kuva mi swi landzra. 18 Yentxa leswinene ni leswi lulamiki mahlweni ka Yehovha, akuva swi ku fambela ha hombe u va u nghena a tikweni ledzrinene ledzri Yehovha a dzri hlambanyeliki vakokwana vaku, u titekela dzrone, 19 u hlongola valala vaku hinkwavu, hi lani Yehovha a ku dumbisiki ha kone.

20 “Loko a nkameni lowu taka n’wanaku a ku vutisa leswi: ‘Swi tlhamuxela yini swidzrimuxo, milawu ni swiboho swa wuyavanyisi leswi Yehovha Xikwembu Nkulukumba wezru a mi leletiki swone?’ 21 U ta mu hlamula u ku: ‘Hi ve swikazrawa swa Faro a Egipta, kambe Yehovha a hi humese a Egipta hi voko dzra ntamu. 22 Yehovha a hambe mintxhumu ya ku hlamalisa ni mahlolana lamakulu akuva a hlasela tiko dzra Egipta, Faro ni hinkwavu va muti wake, na hi swi vona. 23 A hi suse tikweni dzra Egipta a hi buyisa halenu akuva a hi nyika tiko ledzri a dzri hlambanyeliki vakokwana vezru. 24 Kutani Yehovha a lelete leswaku hi landzra swileleto leswi hinkwaswu hi va hi txhava Yehovha Xikwembu Nkulukumba wezru, akuva swi hi fambela ha hombe hi lani ku nga helikiki ni kuva hi tama hi hanya hi lani swi nga ha kone namunhla. 25 Kutani hi ta hlayiwa lava lulamiki loko hi landzra swileleto hinkwaswu leswi, hi kombisa leswaku hi yingiseta Yehovha Xikwembu Nkulukumba wezru hi lani a hi leletiki ha kone.’