Deuteronoma
29 Lawa i mazritu ya xipfumelelanu lexi Yehovha a zrumiki Moxe leswaku a xi hamba ni Vaisrayele a tikweni dzra Mowabu, handle ka xipfumelelanu lexi a a xi hambe na vone a Horebe.
2 Kutani Moxe a vitana Vaisrayele hinkwavu a va byela a ku: “Mi swi vonile hinkwaswu leswi Yehovha a swi yentxiki a mahlweni kwenu a tikweni dzra Egipta, ka Faro, ka malandzra yake hinkwawu ni le tikweni dzrake hinkwadzru, 3 wuyavanyisi lebyikulu* lebyi u byi voniki hi matihlo yaku, swikombiso leswiyani leswikulu ni mahlolana. 4 Kambe Yehovha a nga mi nyikanga mbilu ya ku swi twisisa, matihlo ya ku swi vona nambi tindleve ta ku swi yingela ku ta ta tlhasa namunhla. 5 ‘A nkama lowu a ni mi kongomisa ku dzringana 40 wa malembe a mananga, a mpahla yenu leyi a mi yi yambala a yi hahlukelanga ni masandaliya yenu a ma hlakalanga milengeni yenu. 6 A mi danga pawu, a mi nwanga vhinyu nambi byala byin’wana akuva mi ta swi tiva leswaku hi mine Yehovha Xikwembu Nkulukumba wenu.’ 7 Hi wugamu mi tlhase a mbangwini lowu, kutani Sihoni hosi ya Hexiboni na Ogi hosi ya Baxani va hi telile akuva va ta lwa na hine kambe hi va hlulile. 8 Hi game hi teka tiko dzravu hi dzri nyika vana va Rubeni, vana va Gadi ni hamfu ya lixaka dzra vana va Manasi, hi va nyika dzrone swanga pfindla. 9 Xileswo, bekisani mazritu ya xipfumelelanu lexi mi va mi ma landzra akuva hinkwaswu leswi mi taka swi yentxa swi famba ha hombe.
10 “Namunhla hinkwenu mi le mahlweni ka Yehovha Xikwembu Nkulukumba wenu: Vazrangeli va tinxaka tenu, vakulukumba venu, vavanuna lava va nyikiwiki wulawuli, vavanuna hinkwavu va Israyele, 11 vatsrongwana venu, vasati venu ni muluveli lweyi a nga mintxhatxheni yenu, ku sukela ka lweyi a mi djulelaka tihunyi ku ya tlhasa ka lweyi a mi kelaka mati. 12 Namunhla mi lani akuva mi hamba xipfumelelanu na Yehovha Xikwembu Nkulukumba wenu ni kuva mi hamba xihlambanyu na Yehovha Xikwembu Nkulukumba wenu, 13 akuva namunhla a mi yentxa tiko dzrake ni leswaku yene a va Xikwembu Nkulukumba wenu hi lani a mi dumbisiki ha kone ni hi lani a hlambanyeliki vakokwana venu ha kone, ku nga Abrahamu, Izaki na Yakobe.
14 “A xipfumelelanu lexi ni xihlambanyu lexi, a ni swi hambi na n’wine ntsena, 15 kambe ni swi hamba ni lava va nga na hine lani namunhla a mahlweni ka Yehovha Xikwembu Nkulukumba wezru, kun’we ni lava va ngeke na hine lani namunhla. 16 (Hikusa mi swi tiva ha hombe leswi a wutomi byezru a byi li xiswone nkama lowu a hi tsrhama a tikweni dzra Egipta ni leswaku swi ve hi ndlela yini ku tsremakanya matiko ya ku siyanasiyana a liyendzrweni dzrezru. 17 Nakone a matikweni lawo mi vone mintxhumu ni swikwembu swa ku nyenyentsa,* swithombe swa ku vatliwa, swa ku hambiwa hi zribye, hi prata ni hi woru.) 18 Xileswo tivonelani akuva namunhla, a makazri kwenu ku nga txhuki ku va ni wanuna, wansati, ndangu kumbe lixaka, lava a mbilu yavu yi hambukaka ka Yehovha Xikwembu Nkulukumba wezru va ya tizrela swikwembu swa matiko wolawo, ni leswaku a makazri kwenu ku nga vi ni limitsru ledzri bindzrulaka nsinya lowu nga ni vhenene ni lowu bavaka ngopfu.
19 “Loko mhunu o yingela mazritu ya xihlambanyu lexi, kambe a tibyela a mbilwini yake a ku: ‘Ni ta va ni ku zrula nambiloko no tama ni famba tindleleni ta mbilu yanga’, kutani a honetela hinkwaswu leswi nga mahlweni kwake, 20 Yehovha a nge ti mu dzrivalela, a matsrhan’wini ya leswo, a mahlundzru lamakulu ya Yehovha ma ta mu pfuzrela, nakone a swizruku hinkwaswu leswi tsraliwiki bukwini ledzri nakunene swi ta va henhla kwake, futsrhi Yehovha a ta tima vito dzra mhunu lweyo a hansi ka matilo. 21 Kutani Yehovha a ta mu tsravukanisa ni tinxaka hinkwatu ta Israyele akuva a xaniseka, hi ku fambisana ni swizruku hinkwaswu swa xipfumelelanu lexi tsraliwiki bukwini ledzri dzra Nawu.
22 “Loko a vatukulu va vana venu ni muluveli wa le tikweni dzra le kule va vona makhombo ya tiko ledzri ni mavabyi lawa Yehovha a taka va na a ma tisile ka dzrone, 23 leswi liki, va vona xivavula, munyu ni ndzrilo lowu honetelaka, lakakuva a tikweni dzraku hinkwadzru ku nga byaleki, ku nga mili ntxhumu nambi byanyi byinene, hi lani swi viki ha kone loko ku helisiwa Sodoma ni Gomora, Adima ni Zeboyimi, ku nga mimbangu leyi Yehovha a yi helisiki hi leswi a a kwatile a tlhela a a hlundzruka, 24 vone kun’we ni matiko hinkwawu va ta ku: ‘Ha yini Yehovha a dzri yentxe leswi tiko ledzri? I yini leswi yentxiki mahlundzru yake ma pfuzra hi ndlela leyi leyikulu?’ 25 Kutani a vhanu va ta hlamula va ku: ‘Hi mhaka ya leswi va tsrhikiki xipfumelelanu lexi Yehovha Xikwembu Nkulukumba wa vakokwana vavu a xi hambiki na vone nkama lowu a va humesiki a tikweni dzra Egipta, 26 va ya tizrela ni ku khinsamela swikwembu swin’wana, swikwembu leswi a va nga swi tivi nakone Xikwembu Nkulukumba a va tsimbisiki ku swi gandzrela. 27 Kutani a mahlundzru ya Yehovha ma pfuzrele tiko ledzri, ma tisa swizruku hinkwaswu leswi tsraliwiki bukwini ledzri. 28 Xileswo, leswi Yehovha a kwatiki a tlhela a khunguvanyeka ngopfu a va suse tikweni dzravu a va yisa tikweni dzrin’wana, lani va nga kone namunhla.’
29 “A mintxhumu leyi yi nga xihundla yi lumba Yehovha Xikwembu Nkulukumba wezru, kambe a mintxhumu leyi yi bekiwiki livaleni yi lumba hine ni vatukulu vezru hi lani ku nga helikiki, akuva hi hetisisa mazritu hinkwawu ya Nawu lowu.