Papela dzra wubidzri ledzri yaka ka Vatesalonika
3 Xa wugamu vamakwezru, yanani mahlweni mi hi khongotelela leswaku a zritu dzra Yehovha dzri ya mahlweni dzri hangalaka hi ku kahlula dzri tlhela dzri yamukeliwa hi xitxhavu, hi lani swi viki ha kone kwenu, 2 ni leswaku hi huluxiwa ka vhanu lava vavisaka vhanu van’wana ni le ka vhanu lava bihiki, hikusa a hi vhanu hinkwavu va nga ni lipfumelo. 3 Kambe a Hosi ya dumbeka, yi ta mi tiyisa yi tlhela yi mi sizrelela ka Diyavulosi. 4 Handle ka leswo, swanga hi leswi hi nga valandzreli va Hosi ha kholwiseka leswaku ma swi landzra swileleto leswi hi mi nyikiki swone, nakone mi ta ya mahlweni mi swi landzra. 5 Ingiki a Hosi yi nga ya mahlweni yi mi pfuna kuva mi zrandzra Xikwembu Nkulukumba ni leswaku mi va ni ku tiyisela loku vilelekaka akuva mi ya mahlweni mi landzrela Kriste.
6 Vamakwezru, swoswi hi mi nyika swileleto hi vito dzra Hosi yezru Yesu Kriste, leswaku mi titsravuxa ni makwezru mun’wana ni mun’wana lweyi a kalaka a nga yingiseti nakone a kalaka a nga swi landzri swileleto leswi mi* swi kumiki kwezru. 7 Ma yi tiva ndlela leyi mi fanelaka ku hi yetisela ha yone, hikusa a nkama lowu a hi li na n’wine halanu a hi zanga hi va lava kalaka va nga yingiseti, 8 nambi ku da swakuda swa mhunu hi mahala.* Ku hambana ni leswo, hi tizre ngopfu swinene, wusiku ni nhlikanhi, akuva hi nga bindzriseli ni mun’we wenu. 9 A hi leswaku ho kala hi nga na mfanelo ya ku va mi hi nyika mintxhumu, kambe ho djula ku va xikombiso xa kuva mi xi yetisela. 10 Nakunene a nkama lowu a hi li na n’wine a hi talisa ku mi byela leswi: “Mhunu lweyi a kalaka a nga djuli ku tizra, a nga fanelanga a da.” 11 Hikusa hi twa leswaku van’we venu a va yingiseti, a va tizri nikutsrongo, kambe va tinghenisa ka mintxhumu leyi kalaka yi nga va lumbi. 12 Vhanu va ku tsrhamisa xileswo ha va leleta hi tlhela hi va tsratsriya hi vito dzra Hosi Yesu Kriste leswaku va fanela ku tizra na va zrulile, va nga tinghenisi ka timhaka ta van’wana, va tlhela va da swakuda swa nyuku wavu.
13 Kambe n’wine vamakwezru, mi nga tsrhiki ku yentxa leswinene. 14 Kambe loko mhunu wa kukazri a nga ma yingiseti mazritu yezru lawa ma nga ka papela ledzri, mu lavisisani mhunu lweyo mi va mi tsrhika ku titlhanganisa na yene, akuva a ta va ni tingana. 15 Nambitanu, mi nga mu voni swanga nala, kambe yanani mahlweni mi mu dzrimuxa hikusa i makwenu.
16 Kutani ingiki a Hosi ya ku zrula yi nga mi nyika ku zrula minkama hinkwayu hi tindlela hinkwatu. Ingiki a Hosi yi nga va na n’wine hinkwenu.
17 Mine Pawulo ni mi tsralela madzrungula lawa hi voko dzranga, leyi hi yo ndlela leyi ni ma tiyisekisaka hi yone mapapela yanga hinkwawu.
18 A timpswalu letikulu ta Hosi yezru Yesu Kriste a ti ve na n’wine hinkwenu.