Mpfuletelo Lowu Yamukeliwiki Hi Yohane

16 Kutani ni twa zritu na dzri huma hi le tempeleni* dzri huwelela dzri byela tintsrumi leta 7, dzri ku: “Fambani mi ya txhulula mahlundzru ya Xikwembu Nkulukumba a misaveni lama nga ka swibya leswa 7.”

2 A ntsrumi ya ku sungula yi famba yi ya txhulula leswi a swi li ka xibya xa yone a misaveni. Kutani lava a va ni mfungu wa xihazri xa nhova nakone a va gandzrela xithombe xa xone, va va ni swilondzra swa ku vavisa ngopfu swinene leswi swi kalaka swi nga daheki.

3 A ntsrumi ya wubidzri yi txhulula leswi a swi li ka xibya xa yone a lwandle. A lwandle dzri txintxa dzri fana ni ngati ya mhunu lweyi a dlayiwiki, kutani a swivumbiwa hinkwaswu leswi hanyaka* swa le lwandle swi fa.

4 A ntsrumi ya wuzrazru yi txhulula leswi a swi li ka xibya xa yone ka milambu ni le ka swihlovo swa mati. Kutani swi txintxa swi va ngati. 5 Ni twa ntsrumi leyi nga ni ntamu wa ku lawula mati yi ku: “Wene Lweyi a nga kone nakone u viki kone, futsrhi U dumbekaka, u lulamile, hi leswi u tisiki wuyavanyisi lebyi, 6 hikusa va halate ngati ya vaxwengi ni vaprofeta, hi xivangelo lexo swa va fanela ku va u va nwise ngati.” 7 Ni twa zritu na dzri huma hi le altarini dzri ku: “Ina, Yehovha Xikwembu Nkulukumba wa Ntamu hinkwawu, a wuyavanyisi byaku* i bya ntiyiso nakone byi lulamile.”

8 A ntsrumi ya wumune yi txhulula leswi a swi li ka xibya xa yone ka dambu, kutani a dambu dzri nyikiwa mpfumelelo wa ku hisa vhanu hi ndzrilo. 9 A vhanu va pshwa hi ku hisa lokukulu, kambe a va tisolanga, va zruke Xikwembu Nkulukumba, futsrhi a va mu dzrumisanga Xikwembu Nkulukumba lweyi a nga ni ntamu wa ku lawula makhombo wolawo.

10 A ntsrumi ya wuntlhanu yi txhulula leswi a swi li ka xibya xa yone ka xiluvelo xa xihazri xa nhova. Kutani a mfumu wa xone wu va munyama, a vhanu va sungula ku tiluma lidzrimi hi mhaka ya ku vavisa loku a va ku twa, 11 kambe a va tisolanga ka mintizro yavu ya ku biha, va zruketele Xikwembu Nkulukumba wa le tilweni hi mhaka ya ku twa ku vavisa ni hi mhaka ya swilondzra leswi a va li na swone.

12 A ntsrumi ya wu 6 yi txhulula leswi a swi li ka xibya xa yone ka nambu lowukulu wa Ewufrata, kutani wu pshwa mati akuva tihosi ta le wuxeni* ti lulamiseleliwa ndlela.

13 Kutani ni vona mazritu mazrazru lama kalaka ma nga basanga,* lawa a ma fana ni makhele, na ma huma hi le non’wini wa dragona, wa xihazri xa nhova, ni hi le non’wini wa muprofeta wa madzrimi. 14 Nakunene lawa i mazritu lama huhuteliwiki hi mademona, nakone a tihosi ta misava hinkwayu ta ma yingela. A mazritu lawo ma yentxa mahlolana akuva ma hlengeleta tihosi leswaku ti ta lwa yimpi ya siku ledzrikulu dzra Xikwembu Nkulukumba wa Ntamu Hinkwawu.

15 “Lavisani! Ni ta swanga muyivi. Awa nyonxa lweyi a tsrhamaka na a pfukile nakone a yambale mpahla yake,* akuva a nga fambi na a nga yambalanga kutani vhanu va vona tingana take.”

16 Kutani a mazritu lama huhuteliwiki ma hlengeletela tihosi a mbangwini lowu hi Xiheberu wu vitaniwaka Armagedoni.*

17 A ntsrumi ya wu 7 yi txhulula leswi a swi li ka xibya xa yone a moyeni. Kutani ku twala zritu dzri huwelela na dzri sukela xiluvelweni lexi nga tempeleni,* dzri ku: “Swi helile!” 18 Ku gama ku va ni lihati, ku twala mazritu, swingwalangwandzra, ku tlhela ku va ni ku tsrekatsreka lokukulu ka misava ka ku a ku ngi ngi sama ku va kone ku sukela loko mhunu a tumbuluxiwile a misaveni, kunene ku ve ku tsrekatsreka ka misava ka kukulu ngopfu swinene. 19 A doropa ledzrikulu dzri yavane hi swiyenge swizrazru, a madoropa ya matiko ma hohloka; kutani Xikwembu Nkulukumba a dzrimuka Babilona Lwenkulu, a va a mu nyika kopo dzra vhinyu dzra mahlundzru ya ku kwata kwake. 20 Handle ka leswo, a swihlale hinkwaswu swi tsrutsrumile, ni tinhava ti nyamalala. 21 Kutani ku wa mazralana ya makulu hi le tilweni ma wela* vhanu, zralana ha dzrin’we a dzri bindzra kolomu ka 20 wa makilu,* a vhanu va gama va zruka Xikwembu Nkulukumba hi mhaka ya khombo ledzriyani dzra mazralana, hikusa a khombo ledzro dzri honetele ngopfu swinene.