Papela dzra wubidzri dzra Yohane
1 Mine wanuna lweyi a kuliki,* ni tsralela wansati lweyi a hlawuliwiki, ni tlhela ni tsralela ni vanake, lava ni va zrandzraka, a va zrandzriwi hi mine ntsena kambe ni hi hinkwavu lava tivaka ntiyiso. 2 Hi mi zrandzra hi mhaka ya ntiyiso lowu nga kone ndzreni kwezru nakone wu taka va na hine hi lani ku nga helikiki. 3 A timpswalu letikulu, ntwelawusiwana, ku zrula loku pfaka ka Xikwembu Nkulukumba tlhelo Papayi ni ka N’wanake Yesu Kriste, kun’we ni ntiyiso ni lizrandzru, swi ta va na hine.
4 Ni nyonxe ngopfu swinene, hikusa ni tive leswaku van’we ka vanaku va famba a ntiyisweni, hi lani Papayi a hi leletiki ha kone. 5 Kutani swoswi wansati, ni ku tsralela akuva ni ku kombela leswaku u landzra nawu lowu hi nga na wone ku sukela a ku sunguleni, wa leswaku hi zrandzrana. 6 Nakone a lizrandzru dzri tlhamuxela ku va hi tama hi hanya hi milawu yake. Hi lani mi swi yingeliki ha kone ku sukela a ku sunguleni, a nawu wake i wa leswaku mi fanela ku tama mi kombisa lizrandzru. 7 Hikusa a misaveni ku humelele vakanganyisi vanyingi, lava yalaka leswaku Yesu Kriste a te swanga mhunu wa nyama. A mhunu lweyi a yalaka leswo i mukanganyisi nakone i antikriste.
8 Tivonelani, akuva mi nga lahlekeliwi hi mabindzru ya ku tikazrata kwezru a makazri kwenu, hi ndlela leyo, mi ta kuma matovoko hinkwawu lawa Xikwembu Nkulukumba a mi bekiseliki wone. 9 Mun’wana ni mun’wana lweyi a kalaka a nga landzreli tidondzro ta Kriste nakone a dondzrisaka swin’wana, a nga yamukeliwi hi Xikwembu Nkulukumba. Kambe mun’wana ni mun’wana lweyi a tamaka a landzrela tidondzro ta Kriste, awa yamukeliwa hi Papayi ni hi N’wana. 10 Loko mhunu wa kukazri a mi tela na a nga tisi dondzro leyi, mi nga mu yamukeli a makaya kwenu kumbe ku mu losa. 11 Hikusa lweyi a mu yamukelaka a seketela mintizro yake ya ku biha.
12 Nambileswi ni nga ni mintxhumu yinyingi ya ku mi byela yone, a ni djuli ku yentxa hi ku yi tsrala,* kambe ni lavisele ku va ni yentxa hi ku mi tela akuva ni ta vulavula na n’wine na hi vonana, ku yentxela leswaku mi nyonxa ngopfu swinene.*
13 A vana va makwenu wa xisati, lweyi a nga muhlawuliwa, va ku dzrungula.