Mpfuletelo Lowu Yamukeliwiki Hi Yohane

22 Kutani a ntsrumi yi ni komba nambu wa mati ya wutomi, ya ku basa ku fana ni Krixtali, na wu huma hi le xiluvelweni xa Xikwembu Nkulukumba ni xa Xihambana 2 wu fulamela hi le xikazri ka ndlela leyikulu ya doropa. Ka matlhelo ha mabidzri ya nambu a ku ni minsinya ya wutomi leyi a yi pswala ka 12 hi lembe, na hweti yin’wana ni yin’wana yi pswala kan’we. A makamba ya minsinya yoleyo a ma tizrela ku daha matiko.

3 A doropa ledzri, a dzri nge he ti txhuka dzri zrukiwa. Kambe a xiluvelo xa Xikwembu Nkulukumba ni xa Xihambana swi ta va ka dzrone nakone a malandzra ya Xikwembu Nkulukumba ma ta mu yentxela ntizro wa ku xwenga; 4 ma ta vona wuso byake, ni vito dzrake dzri ta va a mimombyeni ya wone. 5 Handle ka leswo, a ku nge he ti va ni wusiku nakone a ma nge he ti vilela motsre kumbe livaningu dzra dambu, hikusa Yehovha Xikwembu Nkulukumba a ta ma vaningela, nakone ma ta fuma hi masiku ni masiku.

6 A ntsrumi yi ni byela yi ku: “A mazritu lawa ma dumbeka* nakone i ya ntiyiso; ina, Yehovha Xikwembu Nkulukumba lweyi a huhuteliki vaprofeta, a zrumele ntsrumi yake akuva yi komba malandzra yake a mintxhumu leyi fanelaka ku yentxeka ku nga li khale. 7 Lavisa! Na ta hi ku kahlula. Awa nyonxa lweyi a yingisetaka mazritu ya wuprofeta bya buku ledzri.”

8 Mine Yohane, hi mine ni yingeliki ni ku vona mintxhumu leyi. A nkama ni nga yi yingela ni ku yi vona, ni khinsame hansi akuva ni gandzrela ntsrumi leyi yi ni kombiki mintxhumu leyi. 9 Kambe yi ni byela yi ku: “Tivoneli! U nga yentxi leswo! Mine no va nandzra ntsena ku fana na wene ni vamakwenu lava va nga vaprofeta kun’we ni lava va yingisetaka mazritu ya buku ledzri. Gandzrela Xikwembu Nkulukumba.”

10 Yi tlhela yi ni byela yi ku: “A mazritu ya wuprofeta bya buku ledzri u nga ma lemi, hikusa a nkama lowu bekisiwiki wu le kusuhi. 11 Lweyi a yentxaka mintxhumu leyi yi kalaka yi nga lulamanga, a a tame a yentxa mintxhumu leyi yi kalaka yi nga lulamanga, lweyi a yentxaka mintxhumu ya ku nyenyentsa, a a tame a yentxa mintxhumu ya ku nyenyentsa; kambe lweyi a lulamiki, a a tame a yentxa mintxhumu leyi lulamiki, ni lweyi a xwengiki a a tame a va lweyi a xwengiki.

12 “‘Lavisa! Na ta hi ku kahlula, nakone a hakelo ledzri ni dzri nyikelaka dzri na mine, akuva ni hakela mun’wana ni mun’wana hi ku ya hi mintizro yake. 13 Hi mine Alfa na Omega,* wa ku sungula ni wa wugamu, masungulo ni magamu. 14 Va nyonxa lava va hlampswaka timpahla tavu ta ku leha akuva va ta va ni mfanelo ya ku ya ka minsinya ya wutomi, ni leswaku va ta kota ku nghena doropeni hi le tinyangweni ta dzrone. 15 A handle ka doropa ku ni timbyana,* vangoma, lava yentxaka swa tingana hi tlhelo dzra tinkuku,* vadlayi, vagandzreli va swithombe, ni hinkwavu lava zrandzraka madzrimi va va va hemba.’

16 “‘Mine Yesu, ni zrume ntsrumi yanga akuva yi nyikela wumboni kwenu mayelanu ni mintxhumu leyi leswaku ku pfuneka mabandla. Ni limitsru dzra Davhida, ni wa lixaka dzrake, nakone ni nyeleti ya mixo leyi phatimaka.’”

17 A moya ni mutekiwa va tama va hlaya va ku: “Tana!” Nakone mun’wana ni mun’wana lweyi a swi yingelaka a a hlayi a ku: “Tana!” Lweyi a nga ni tozra a a ti, nakone lweyi a swi djulaka a a teki mati ya wutomi hi mahala.

18 “Ni nyikela wumboni ka mun’wana ni mun’wana lweyi a yingelaka mazritu ya wuprofeta bya buku ledzri: Loko mhunu wa kukazri o yengesela xa kukazri ka mintxhumu leyi, Xikwembu Nkulukumba a ta mu yengeselela makhombo lama tsraliwiki ka buku ledzri; 19 nakone loko mhunu wa kukazri o susa xa kukazri ka mazritu ya wuprofeta bya buku ledzri, Xikwembu Nkulukumba a nge ti mu pfumelela ku yamukela mintxhumu leyinene leyi tsraliwiki ka buku ledzri, leswi liki Xikwembu Nkulukumba a nge ti mu pfumelela kuva a da mihandzru ya minsinya ya wutomi nakone a nge ti mu pfumelela ku nghena doropeni dzra ku xwenga.

20 “Lweyi a nyikelaka wumboni bya mintxhumu leyi a li: ‘Ina, na ta hi ku kahlula.’”

“Amen! Tana Hosi Yesu.”

21 Ingiki a vaxwengi va nga va ni timpswalu letikulu ta Hosi Yesu.