Papela dzra ku sungula ledzri yaka ka Timotewu

5 U nga holoveli wanuna lweyi a kuliki hi ntanga. Ku hambana ni leswo, vulavula na yene hi ndlela leyinene ku fana ni loko u vulavula ni papayi waku, vavanuna lava va ha liki vampshwa va voni swanga vamakwenu, 2 vavasati lava kuliki hi ntanga va voni swanga vamamana, lava va ha liki van’hwanyana va voni swanga vamakwenu, hanyisana na vone hi ndlela leyi fanelekaka.*

3 Vavasati lava feliwiki hi vanuna* nakone va kalaka va nga na mhunu wa ku va hlayisa,* va hloniphi u tlhela u zron’weka ha vone. 4 Kambe loko wansati wa kukazri lweyi a feliwiki hi nuna a ni vana kumbe vatukulu, va fanela ku zranga va kombisa ku tinyiketela kwavu ka Xikwembu Nkulukumba hi ku hlayisa mindangu yavu, va fanela ku nyika vapswele vavu ni vavhovho vavu leswi swi va fanelaka, hikusa leswo swa yamukeleka a mahlweni ka Xikwembu Nkulukumba. 5 Wansati lweyi a feliwiki hi nuna, lweyi nakunene a kalaka a nga na wa ku mu hlayisa nakone a nga wusiwanini, a dumbela ka Xikwembu Nkulukumba, nakone a tsrhamela ku yentxa swikombelo ni swikhongoto wusiku ni nhlikanhi. 6 Kambe lweyi a hanyelaka ku tinyonxisa ntsena,* a file nambiloko a ha hanya. 7 Xileswo yana mahlweni u va nyika swileleto leswi, akuva va va lava kalaka va nga na xa ku solisa. 8 Nakunene lweyi a kalaka a nga va wundli lava va nga ka wutiyanguleli byake, ngopfungopfu vandangu wake, a landzrule lipfumelo nakone a bihe ngopfu swinene ku tlula mhunu lweyi a kalaka a nga na lipfumelo.

9 Wansati lweyi a feliwiki hi nuna a vito dzrake dzri fanela ku tsraliwa ntsena loko a ni 60 wa malembe kumbe ku tlula, loko a ve nsati wa nuna mun’we, 10 a ni ndhuma ya leswaku a yentxa mintizro leyinene, a wundle vana hi ndlela leyinene, a kombise malwandla, a hlampswe minkondzro ya vaxwengi, a pfune lava vilelaka, ni loko a li leswaku a tinyiketelile ka mintizro hinkwayu leyinene.

11 Kambe mi nga tsrali mavito ya vavasati lava va ha liki vampshwa lava feliwiki hi vanuna, hikusa loko ku navela kwavu ka swa tinkuku ku ndzruluka xihinga a ntizrweni wavu wa wukriste, va ta djula ku txhata. 12 Kutani va ta tivitanela yavanyiso hikusa va tsrhike xidumbiso lexi va xi yentxiki a ku sunguleni.* 13 Hi nkama wu li wun’we va dondzra ku lolohwa, va yingayinga hi mimiti, ina, a vo lolohwa ntsena kambe va tlhela va hleva ni ku tinghenisa ka timhaka ta van’wana, va vulavula mintxhumu ya ku a va nga fanelanga va vulavula ha yone. 14 Xileswo, ni navela leswaku vavasati lava va ha liki vampshwa lava feliwiki hi vanuna va txhata, va va ni vana, va hlayisa muti, akuva va nga nyiki nala mukhandlu wa kuva a zruka. 15 Ku hlaya ntiyiso van’we kutani va hambukisiwile va landzrela Sathana. 16 Loko wansati wa kukazri lweyi a nga mupfumeli a ni maxaka ya xisati lawa ma feliwiki hi vanuna, a a ma hlayisi yene, akuva bandla dzri nga bindzreliwi. Xileswo dzri ta kota ku hlayisa lava feliwiki hi vanuna nakone va kalaka va nga na mhunu wa ku va hlayisa.

17 A vakulu lava zrangelaka hi ndlela leyinene a va kombisiwi xitxhavu lexikulu ngopfu swinene,* ngopfungopfu lava va tikazrataka ka ku vulavula hi zritu dzra Xikwembu Nkulukumba ni le ku dondzriseni. 18 Hikusa a tsralwa dzri li: “U nga pfali nomu wa homu loko yi li ku huleni ka mavele”, dzri tlhela dzri ku: “A mutizri a faneliwa hi hakelo dzrake.” 19 U nga yentxi ntxhumu loko mhunu wa kukazri a lumbeta nkulu, handle ka loko mhaka leyo yi tiyisekisiwa hi timboni tibidzri kumbe tizrazru. 20 Lava va hanyaka hi xidoho va kawuki a mahlweni ka vhanu hinkwavu,* akuva swi ta va xibasopiso ka lavan’wana. 21 Ni ku byela leswi a mahlweni ka Xikwembu Nkulukumba, ka Kriste Yesu kun’we ni ka tintsrumi leti hlawuliwiki, leswaku u landzrelelisisa swileleto leswi, na u nga na xihlawuhlawu kumbe ku zrandzra mun’we ku tlula mun’wana.

22 U nga txhuki u kahlulela ku tlhanteka mhunu mavoko; nakone u nga hlengeli ka swidoho swa van’wana; yana mahlweni u va ni mahanyela lama basiki.

23 U nga ha nwi mati, kambe nwana vhinyu dzritsrongo hi mhaka ya ndzreni kwaku ni hi leswi u tsrhamelaka ku vabya.

24 A swidoho swa vhanu van’wana swa voniwa a va mhunu wa kone a tekela ku yavanyisiwa, kambe swa van’wana swi teka nkama akuva swi voniwa. 25 Hi lani ku fanaka, a mintizro leyinene ya tiviwa, nakone nambiloko yi nga tekeli ku tiviwa a yi nge tsrhami na yi fihlekile.