Papela dzra ku sungula ledzri yaka ka Timotewu
1 Mine Pawulo, mupostola wa Kriste Yesu lweyi a bekiwiki ha Xikwembu Nkulukumba Muhuluxi wezru, ni hi Kriste Yesu lweyi hi nga ni dumbo kwake, 2 ni tsralela Timotewu* n’wananga wa kakunene a ntizrweni wa Hosi:
Ingiki Xikwembu Nkulukumba tlhelo Papayi wezru, na Kriste Yesu Hosi yezru, va nga ku nyika timpswalu letikulu ni ku zrula.
3 Ku fana ni leswi loko ni djule ku ya a Makedoniya ni ku kutxiki leswaku u tsrhama a Efesa, swoswi ni ku kombela leswaku u nyika vhanu va kukazri xilayu akuva va nga hangalasi tidondzro ta madzrimi, 4 nambi ku yingiseta swihitana swa madzrimi kumbe ku landzrelela matimu ya tinxaka ta vakokwana. Mintxhumu leyo a yi pfuni ntxhumu kambe yo yentxa vhanu va vulavula leswi kalaka swi nga pfuni ntxhumu a matsrhan’wini ya ku vulavula hi mintxhumu leyi pfaka ka Xikwembu Nkulukumba leyi tiyisanaka lipfumelo. 5 Nakunene, a nkongometo wa xileleto lexi i kuva vhanu hinkwavu va kombisa lizrandzru hi ku susumetiwa hi mbilu leyi basiki, lipfalu ledzrinene, ni hi lipfumelo ledzri kalaka dzri nga na wukanganyisi. 6 Van’we va tsrhike mintxhumu leyi va ya tipeta ka mabulu lawa ma kalaka ma nga pfuni ntxhumu. 7 Va djula ku va vadondzrisi va nawu, kambe nambi mintxhumu leyi va yi hlayaka kumbe ku yi dondzrisa na va tiye ngopfu swinene a va yi twisisi.
8 Ha swi tiva leswaku a Nawu i wunene loko mhunu a wu tizrisa hi ndlela ya kone,* 9 loko hi dzrimuka leswaku a Nawu a wu yentxeliwanga vhanu va ku lulama kambe wu yentxeliwe vhanu lava va kalaka va nga na Nawu, lava kalaka va nga yingiseti, lava kalaka va nga mu hloniphi Xikwembu Nkulukumba, vadohi, lava kalaka va nga dumbeki,* lava dzrelaka leswi xwengiki, lava dlayaka papayi wavu, mamana wavu, kumbe vhanu van’wana, 10 vhanu lava yentxaka swa tingana hi tlhelo dzra tinkuku,* vavanuna lava yetlelaka ni vavanunakulobye,* lava yivaka vhanu, vahembi, lava hlambanyaka swa madzrimi, ni lava yentxaka hinkwaswu leswi lwisanaka ni dondzro leyinene* 11 leyi seketeliwiki ka madzrungula lamanene lama phatimaka ya Xikwembu Nkulukumba lweyi a nyonxiki, lawa ni tamelisiwiki wone.
12 Na mu tlangela Kriste Yesu Hosi yezru lweyi a ni nyikiki ntamu, hikusa a ni nyike ntizro kuva ni wu yentxa hi leswi a ni voniki ni li lweyi a dumbekaka, 13 nambileswi khale a ni li muzruketeli, muxanisi ni mhunu lweyi a kalaka a nge na xitxhavu. Nambitanu, ni kombiwe timpswalu hikusa a ni swi yentxa hi ku pfumala wutivi nakone a ni nge na lipfumelo. 14 Kambe a Hosi yezru yi ni kombe timpswalu letikulu ngopfu swinene nakone ni yamukele lipfumelo ni lizrandzru leswi pfaka ka Kriste Yesu. 15 A mazritu lawa ma liki: Kriste Yesu a te misaveni akuva a ta huluxa vadohi, ma dumbeka nakone ma fanela ku yamukeliwa hi ku helela. Mine ni mudohi lwenkulu ku tlula hinkwavu. 16 Nambitanu, ni kombiwe timpswalu akuva hi ku tizrisa mine mudohi lwenkulu ku tlula hinkwavu, Kriste Yesu a ta kombisa ku lehisa mbilu kwake hinkwaku, hi ku ni yentxa xikombiso ka lava va taka va ni lipfumelo kwake akuva va kuma wutomi lebyi nga helikiki.
17 A Hosi ya hi lani ku nga helikiki, leyi kalaka yi nga fi nakone yi kalaka yi nga voniwi, ku nga yone Xikwembu Nkulukumba ntsena, a yi hloniphiwi yi tlhela yi dzrumisiwa hi masiku ni masiku. Amen.
18 A xileleto lexi ni xi nyika wene n’wananga Timotewu, xi fambisana ni wuprofeta lebyi hlayiwiki mayelanu na wene, akuva hi kola ka byone u ta kota ku ya mahlweni u lwa yimpi leyinene, 19 na u khomelela lipfumelweni u tlhela u va ni lipfalu ledzrinene, ledzri van’wana va dzri tsrhikiki, leswi yentxiki leswaku a lipfumelo dzravu dzri hahluka ku fana ni boti ledzri tsrhovekiki. 20 Van’we vavu i Himinewu na Alexandri, nakone ni va nyikele ka Sathana akuva a xikhatiso xi va dondzrisa ku kala va nga yeyisi Xikwembu Nkulukumba.