Papela ledzri yaka ka Tito
1 Mine Pawulo, nandzra wa Xikwembu Nkulukumba tlhelo mupostola wa Yesu Kriste, mine ni nga ni lipfumelo ledzri fanaka ni dzra vahlawuliwa va Xikwembu Nkulukumba ni wutivi lebyi nga byone bya ntiyiso lebyi fambisanaka ni ku tinyiketela ka Xikwembu Nkulukumba, 2 nakone byi tiseketeliki ka dumbo dzra wutomi lebyi nga helikiki, lebyi Xikwembu Nkulukumba lweyi a kalaka a nga na ku hemba a byi dumbisiki khale swinene; 3 kambe hi nkama lowu a wu bekisiki, a yentxe leswaku zritu dzrake dzri tiviwa hi ku tizrisa ntizro wa ku zrezra lowu ni nyikiwiki wone hi ku landzra xileleto xa Xikwembu Nkulukumba, Muhuluxi wezru; 4 ni tsralela Tito, lweyi a nga n’wananga a lipfumelweni:
Ingiki u nga va ni timpswalu letikulu ni ku zrula leswi pfaka ka Xikwembu Nkulukumba Papayi wezru ni le ka Kriste Yesu Muhuluxi wezru.
5 Ni ku siye Kreta akuva u lulamisa mintxhumu leyi honekiki ni kuva u beka vakulu ka doropa dzrin’wana ni dzrin’wana, hi ku landzra leswi ni ku dondzrisiki swone, swaku: 6 a nkulu wa bandla a fanela ku pfumala xihehlo,* a va nuna wa nsati mun’we, a va ni vana lava nga vapfumeli lava kalaka va nga lumbetiwi leswaku va ni mahanyela ya ku biha* kumbe leswaku a va yingiseti. 7 Hikusa leswi a nga nandzra wa Xikwembu Nkulukumba, a nkulu a fanela ku pfumala xihehlo, a nga vi mhunu wa nkanu, a nga kahluli ku kwata, a nga vi mpopswi, a nga vi wa madzolonga, a nga djuli ku ganya hi ndlela ya wukanganyisi, 8 kambe a va ni malwandla, a zrandzra wunene, a va ni mayanakanyela lamanene,* a va lweyi a lulamiki, lweyi a dumbekaka, a tiva ku tikhoma, 9 a dzri landzrelelisisa ha hombe zritu dzra ku dumbeka* loko a dondzrisa, leswaku a ta kota ku tiyisa* hi ku tizrisa dondzro leyinene* ni kuva a ta kota ku kawuka lava kanetaka.
10 Hikusa ku ni vhanu vanyingi lava kalaka va nga yingiseti, lava vulavulaka mintxhumu ya ku kala yi nga pfuni ntxhumu, ni vakanganyisi, ngopfungopfu lava hlayaka leswaku swo boha ku soka. 11 Va pfali minomu vhanu lavo, hikusa va tsrhamela ku hohlota lipfumelo dzra mindangu hi ku dondzrisa mintxhumu leyi hoxekiki hi leswi va djulaka ku ganya hi ndlela ya wukanganyisi. 12 Mun’we wavu, lweyi a nga muprofeta wavu, a te: “A Vakreta va tsrhamela ku hemba, i swihazri swa ku leva, va ni magolo va tlhela va va ni wulolo.”
13 A wumboni lebyo i bya ntiyiso. Hi xivangelo lexo, yana mahlweni u va kawuka ngopfu swinene akuva va va ni lipfumelo ledzri tiyiki, 14 va nga yingiseti minkaringana ya Vayuda ni milawu ya vhanu lava tsrhikaka ntiyiso. 15 A mintxhumu hinkwayu yi basile ka vhanu lava basiki; kambe ka lava ntxhimiki nakone va kalaka va nga na lipfumelo, a ku na lexi basiki hikusa miyanakanyu yavu kun’we ni mapfalu yavu swi ntxhimile. 16 Va li va mu tiva Xikwembu Nkulukumba, kambe va mu landzrula hi mintizro yavu, hikusa va nyenyentsa, a va yingiseti nakone a ku na ntizro ni wun’we lowunene lowu wu va fanelaka.