Mintizro ya Vapostola
18 Ntsrhaku ka leswo a suka hi Atena a ya Korinte. 2 Kutani a kuma Muyuda lweyi a vitaniwaka Akila, lweyi a pswaliwiki Ponto nakone a ha ku zruzra a suka Italiya yene ni nkatake Prisila, hikusa Klawudiyu a a hlaye leswaku Vayuda hinkwavu va fanela ku suka a Roma. Xileswo Pawulo a va yendzrela, 3 nakone leswi a va ni ntizro lowu fanaka, a tsrhame kaya kwavu a tizra na vone, hikusa a va li vahambi va matende. 4 Hi masavata hinkwawu a a beka wukaneli* a sinagogeni nakone a a kholwisa Vayuda ni Vagriki.
5 Loko ku tlhasa Silasi na Timotewu lava a va pfa Makedoniya, Pawulo a sungula ku khomeka ngopfu swinene hi zritu dzra Xikwembu Nkulukumba, a zrezrela Vayuda akuva a va kholwisa leswaku Yesu i Kriste. 6 Kambe loko va tame va mu phikisa ni ku vulavula hi ndlela ya xiyeyiso, a gubuta mpahla yake a va byela a ku: “A ngati yenu a yi weli tinhlokweni tenu. A ni na nandzru wa ngati ya mhunu. Ku sukela swoswi ni ta ya ka vhanu va matiko.” 7 Xileswo a suka kolanu* a ya kaya ka wanuna wa kukazri lweyi a vitaniwaka Titosi Yuxtu, lweyi a a li mugandzreli wa Xikwembu Nkulukumba, nakone muti wake a wu vundzramane ni sinagoga. 8 Kambe Krixpo, lweyi a a li muzrangeli wa sinagoga, yene kun’we ni ndangu wake hinkwawu va pfumela ka Hosi. Nakone Vakorinte vanyingi lava yingeliki madzrungula lamanene va ndzruluke vapfumeli va va va babatisiwa. 9 Handle ka leswo, a Hosi yi byele Pawulo a xivonisweni* ni wusiku yi ku: “U nga txhavi kambe yana mahlweni u vulavula, u nga tsrhiki, 10 hikusa ni na wene a nga kone lweyi a taka ku dumela akuva a ku vavisa; hikusa ni ni vhanu vanyingi a doropeni ledzri.” 11 Xileswo a tsrhame kohala ku dzringana lembe ni hamfu, na a va dondzrisa zritu dzra Xikwembu Nkulukumba.
12 Na Galiyu a li govhernadori wa Akaya, hi wumun’we a Vayuda va hlasele Pawulo va gama va mu yisa a tribunali, 13 va ku: “Wanuna lweyi a hlohlotela vhanu kuva va gandzrela Xikwembu Nkulukumba hi ndlela leyi hambaniki ni leswi nawu wu hlayaka swone.” 14 Kambe na Pawulo a djula ku vulavula, Galiyu a byela Vayuda a ku: “Loko wanuna lweyi a e yentxa ntxhumu wa ku biha kumbe ku tlula nawu, a swi ta va swinene kuva ni mi yingiseta ha hombe. 15 Kambe leswi ku nga ku hambana ka mavulavulela, mavito ni nawu wenu, swi lulamisani ha wuswenu. A ni djuli ku yavanyisa leswo.” 16 Xileswo a va hlongola tribunali. 17 Kutani hinkwavu va khoma Soxtene muzrangeli wa sinagoga, va mu ba mahlweni ka tribunali. Kambe Galiyu a nga ti nghenelanga timhaka leti nikutsrongo.
18 Nambitanu, ntsrhaku ka loko a tsrhame masikunyana, Pawulo a lelele vamakwavu a gama a wela a ya Siriya, na a na Prisila na Akila. A Kenkereya a tsremete misisi yake yi goma hikusa a a yentxe xihlambanyu. 19 Loko va tlhasa Efesa, a va siya doropeni dzroledzro a nghena sinagogeni a bulisana ni Vayuda a va pfuna kuva va twisisa Matsralwa. 20 Nambileswi a va tama va mu kombela leswaku a heta nkama wunyingi na vone, a nga pfumelanga 21 kambe a va lelele a ku: “Loko Yehovha a swi zrandzra ni ta tlhela ni buya.” A va a vhela a wela a suka Efesa 22 a fulamela a ya Khezariya. A ntlhantuka* a ya losa bandla a gama a fulamela a ya Antiyokiya.
23 Ntsrhaku ka loko a hete nkamanyana kolanu, a suka a yendzrela mimbangu ya ku siyanasiyana a mugangeni wa Galatiya ni wa Frigiya, a tiyisa vadondzrisiwa hinkwavu.
24 Kutani Muyuda wa kukazri lweyi a vitaniwaka Apolosi, lweyi a pswaliwiki a Alexandriya, a tlhasa Efesa; wanuna lweyi, a a ni nyiko ka ku vulavula nakone a a ma tiva ha hombe Matsralwa. 25 A a dondzrisiwe hi* ndlela ya Yehovha, nakone a a hiseka ngopfu hi ku pfuniwa hi moya wa Xikwembu Nkulukumba,* a a vulavula ni ku dondzrisa mintxhumu hi ndlela leyi nga yone mayelanu na Yesu, kambe a o tiva ntsena a babatiso dzra Yohane. 26 A a vulavula sinagogeni na a nga txhavi ntxhumu, kutani loko Prisila na Akila va tlhasa va mu yingela, va mu teka va famba na yene va mu tlhamuxela ndlela ya Xikwembu Nkulukumba ha hombe. 27 Handle ka leswo, leswi a a djula ku tsremakanya a ya Akaya, vamakwezru va tsralele vadondzrisiwa, va va tsratsriya leswaku va mu yamukela hi ndlela leyinene. Loko a tlhase kohala, a va pfune ngopfu lava hi kola ka timpswalu letikulu ta Xikwembu Nkulukumba va viki vapfumeli; 28 hikusa a livaleni ni hi ku tiyimisela lokukulu a a tiyisekisa Vayuda hi ku helela leswaku va phazama, hi ku va komba Matsralweni leswaku Yesu i Kriste.