Madzrungula Lamanene Lama Tsraliwiki hi Luka

5 Siku dzrin’wana, na Yesu a yimile a nkingeni wa tiva dzra Genezareta,* a xitsrhungu a xi kamanyetana akuva xi tsrhindzrekela kusuhi na yene leswaku xi yingiseta zritu dzra Xikwembu Nkulukumba. 2 Kutani Yesu a vona maboti na ma tsrimbiwile a hlalukweni dzra tiva, kambe a vaphasi va tihlampfi a va li handle ka wone va hlampswa minkukutu yavu. 3 Kutani a nghena ka dzrin’we dzra maboti wolawo, ledzri a dzri li dzra Simoni, a mu kombela leswaku a dzri weta dzri nghenanyana matini. Kutani a tsrhamisa a sungula ku dondzrisa switsrhungu na a li matini. 4 Loko a gamile ku khanela, a byela Simoni a ku: “Dzri weti dzri ya nsingeni,* kutani mi peta minkukutu yenu akuva mi phasa.” 5 Kambe Simoni a hlamula a ku: “Mudondzrisi, hi tizre wusiku hinkwabyu kambe a hi phasanga ntxhumu, nambitanu ni ta yi peta minkukutu hi lani u hlayiki ha kone.” 6 Kutani loko va yentxi leswo, va phase* tihlampfi ta tinyingi ngopfu swinene lakakuva a minkukutu yavu yi sungula ku handzruka. 7 Xileswo, va kombela vaphasikulobye lava a va li ka boti dzrimbeni akuva va va pfuna, kutani va buya va tata maboti ha mabidzri lakakuva ma sungula ni ku mbombomela. 8 Loko Simoni Petro a vona leswo, a khinsama mahlweni ka Yesu a ku: “Tsrhindzreka kule na mine, Hosi, hikusa ni mudohi.” 9 A hlaye leswo hikusa yene kun’we ni lava a va li na yene a va hlamalisiwa ngopfu hi ku tala ka tihlampfi leti va ti phasiki, 10 swi ve hi ndlela leyi fanaka hi Yakobe na Yohane vana va Zebedewu, lava a va li vaphasikulobye na Simoni. Kambe Yesu a byela Simoni a ku: “U nga txhavi. Ku sukela ka swoswi u ta va muphasi wa vhanu.” 11 Xileswo va tlhelisa maboti yavu a hlalukweni, kutani va tsrhika hinkwaswu va sungula ku mu landzrela.

12 Khambi dzrin’wana na a li doropeni dzra kukazri, ku humeleli wanuna lweyi a a ni nhlokonho ya ku txhavisa! Loko a vona Yesu a khinsama a mu kombela a ku: “Hosi, loko u swi djula, u nga ni hanyisa.”* 13 Xileswo, Yesu a nalavuta voko a mu khumba a ku: “Na swi djula! Hanyisiwa.”* Kolanu a nhlokonho yake yi nyamalala. 14 A gama a byela wanuna yelweyo leswaku a nga byeli mhunu leswi yentxekiki, a tlhela a ku: “Kambe famba u ya tikombekisa ka muprista kutani u nyikela nyiko leyi Moxe a hlayiki leswaku yi fanela ku humesiwa hi mhunu lweyi a hanyisiwiki mavabyi ya nhlokonho, leswaku a vaprista va ta tiyiseka leswaku u hanyisiwile.” 15 Kambe a madzrungula lamanene mayelanu na yene a ma ya ma hangalaka, nakone a switsrhungu leswikulu a swi hlengeletana akuva swi mu yingiseta ni ku hanyisiwa mavabyi. 16 Nambitanu, a a talisa ku ya mimbangwini leyi zruliki akuva a ya khongota.

17 Siku dzrin’wana na a li ku dondzriseni, a Vafarisi ni vadondzrisi va Nawu lava a va pfa ka swidoropana hinkwaswu swa le Galileya, Yudeya ni le Yerusalema a va tsrhamile kolanu; nakone Yehovha a a mu nyike ntamu wa leswaku a hanyisa vhanu. 18 Kutani ku tlhase vavanuna lava a va tlakule wanuna wa kukazri hi lihlaka,* lweyi a a wome swizro, nakone a va zama ku mu nghenisa a ndlwini akuva va mu beka mahlweni ka Yesu. 19 Kambe leswi a va hluleka ku mu nghenisa a ndlwini hi mhaka ya xitsrhungu, va khweli henhla ka yindlu, va gwavula swa ku fulela hi swone kutani va mu yehlisa na a li ka lihlaka, va mu beka xikazri ka lava a va li mahlweni ka Yesu. 20 Loko a vona lipfumelo ledzri a va li na dzrone, Yesu a ku: “Wanuna, a swidoho swaku swi dzrivaleliwile.” 21 Kutani a vatsrali ni Vafarisi va sungula ku bulisana hi xivone va ku: “I mani lweyi, wa ku yeyisa Xikwembu Nkulukumba? I mani lweyi a nga dzrivalelaka swidoho loko ku nga li Xikwembu Nkulukumba ntsena?” 22 Kambe Yesu hi ku xiya leswi a va swi yanakanya, a va hlamula a ku: “Ha yini mi yanakanya hi ndlela leyo? 23 I yini leswi nabyalaka, i ku hlaya u ku: ‘Swidoho swaku swi dzrivaleliwile’, kumbe i ku hlaya u ku: ‘Sekeleka u famba’? 24 Kambe akuva mi swi tiva leswaku a N’wana wa mhunu a nyikiwe ntamu wa ku dzrivalela swidoho a misaveni . . .” a byela wanuna lweyi a womiki swizro a ku: “Na ku byela, sekeleka, u teka lihlaka dzraku u muka kaya.” 25 Xileswo a sekeleka a yima mahlweni kwavu, a teka lihlaka dzrake a muka kaya kwake na a dzrumisa Xikwembu Nkulukumba. 26 Kutani hinkwavu va hlamala, va sungula ku dzrumisa Xikwembu Nkulukumba, va tlhela va tala hi ku txhava va ku: “Namunhla hi vone mintxhumu ya ku hlamalisa!”

27 Ntsrhaku ka leswo a suka a famba, kutani a vona muhakelisi wa tinemba lweyi a vitaniwaka Levhi na a tsrhamile a mbangwini lowu vhanu va hakelaka ka wone tinemba, kutani a mu byela a ku: “Vana mulandzreli wanga.” 28 Xileswo, Levhi a sekeleka a tsrhika mintxhumu hinkwayu a mu landzrela. 29 Kutani Levhi a hambela Yesu nkhuvu wa wukulu a kaya kwake, nakone ka nkhuvu wolowo a ku ni vahakelisi vanyingi va tinemba ni vhanu van’wana lava a va da na vone.* 30 Xileswo, a Vafarisi ni vatsrali va sungula ku ngurangurela vadondzrisiwa vake, va ku: “Ha yini mi da mi tlhela mi nwa ni vahakelisi va tinemba ni vadohi?” 31 Yesu a va hlamula a ku: “Vhanu lava kalaka va nga vabyi a va vileli dokodela, kambe lava vabyaka va mu vilela. 32 A ni telanga ku ta vitana vhanu lava lulamiki, kambe ni tele ku ta vitana vadohi akuva va tisola.”

33 Va mu byela va ku: “A vadondzrisiwa va Yohane va tsrhamela ku titsrona swakuda va tlhela va khongota hi ku hiseka, ni vadondzrisiwa va Vafarisi va yentxa leswi fanaka, kambe a vadondzrisiwa vaku va da va tlhela va nwa.” 34 Yesu a va byela a ku: “Xana mi nga sindzrisa vanghanu va muteki leswaku va titsrona swakuda na muteki a ha li na vone? 35 Kambe ma ta masiku lawa nakunene a muteki a taka va na a nga ha li na vone; kutani va ta titsrona swakuda hi masiku wolawo.”

36 A tlhela a va byela xifaniso a ku: “A nga kone lweyi a tsremaka xiziva* ka mpahla ya nyiwana a xi zrungela ka mpahla ya khale. Hikusa loko a ngo yentxa leswo, a xiziva xa nyiwana xi ta yentxa leswaku a mpahla ya khale yi ya yi handzrukela, nakone a xi nge yelani ni mpahla ya khale. 37 Futsrhi a nga kone lweyi a txhelaka vhinyu ledzri dzra ha ka ku hambiwa ka tihotsro ta khale. Hikusa loko a ngo yentxa leswo, a vhinyu ledzri dzra ha ka ku hambiwa dzri ta yentxa leswaku a tihotsro ti pandzreka dzri va dzri halaka nakone a tihotsro a ti nge he londzrovoteki. 38 Kambe a vhinyu ledzri dzra ha ka ku hambiwa dzri fanela ku txheliwa ka tihotsro letimpshwa. 39 A nga kone lweyi ntsrhaku ka loko a nwe vhinyu dzra khale, a djulaka ledzra ha ka ku hambiwa, hikusa a li: ‘Ku nandzrika ledzra khale.’”