Papela dzra ku sungula dzra Yohane

1 Hi mi tsralela mayelanu ni zritu dzra wutomi, ledzri a dzri li kone ku sukela a ku sunguleni, ledzri hi dzri twiki, ledzri hi dzri voniki hi matihlo yezru nakone hi xiyisisiki leswi dzri swi yentxiki hi va hi dzri khumba, 2 (ina, a wutomi lebyi nga helikiki hi kombiwe byone hi va hi byi vona, futsrhi hi nyikela wumboni mayelanu na byone hi va hi mi zrezrela byone. A wutomi lebyi, lebyi nga helikiki, byi pfa ka Papayi nakone hi kombiwe byone). 3 Hi mi byele leswi hi swi voniki ni ku swi yingela akuva na n’wine mi va ni wuxaka* na hine swanga hi leswi hine hi nga ni wuxaka na Papayi kun’we ni N’wanake Yesu Kriste. 4 Kutani hi mi tsralela mintxhumu leyi akuva a ku nyonxa kwezru ku va loku heleliki.

5 A dzrungula ledzri hi dzri yingeliki kwake nakone hi mi byelaka dzrone hi ledzri: Xikwembu Nkulukumba i livaningu, nakone kwake a ku na munyama nikutsrongo. 6 Loko hi ku: “Hi ni wuxaka na yene”, nambitanu hi tama hi famba a munyameni, hi va na ho hemba nakone hi va na hi nga hanyi hi ku fambisana ni ntiyiso. 7 Kambe loko hi famba a livaningwini ku fana ni leswi yene a nga a livaningweni, hi ni wuxaka, nakone a ngati ya N’wanake Yesu yi hi basisa swidoho hinkwaswu.

8 Loko hi ku: “A hi na xidoho”, hi va na ho tikanganyisa nakone a hi na ntiyiso. 9 Xikwembu Nkulukumba awa dumbeka nakone a lulamile, lakakuva loko hi hlaya swidoho swezru a ta hi dzrivalela a tlhela a hi basisa ka mintizro hinkwayu ya ku biha. 10 Loko hi ku: “A hi ngi ngi sama hi doha”, hi va na hi mu yentxa muhembi nakone hi va na hi nga ma dumbi mazritu yake.