Deuteronoma
33 Leswi hi leswi Moxe mhunu wa Xikwembu Nkulukumba a swi hlayiki loko a tovokisa Vaisrayele na a nge si fa. 2 A te:
“Yehovha a buye hi le Sinayi,
A va a phatima kwavu na a li Seyiri.
A vaningile ku sukela mugangeni wa tinhava wa le Parani,
Na a ni tintsrumi ta ntsrandzravahlayi,
A tlhelweni dzrake dzra xinene a a ni tinhenha take.
3 A zrandzre vhanu vake;
A vaxwengi vavu hinkwavu va le vokweni dzraku.
A va tsrhame minkondzrweni yaku;
Va sungula ku yingiseta mazritu yaku.
4 (Moxe a hi nyike xileleto, ku nga nawu,
Swanga pfindla dzra vana va Yakobe.)
5 A ve hosi ya Yexuruni,*
Loko tinhloko ta tiko ti tlhanganile,
Kun’we ni tinxaka hinkwatu ta Israyele.
6 Ingiki Rubeni a nga hanya a nga fi,
Ingiki a vavanuna va lixaka dzrake va ngo ya va yandzra.”
7 A tovokise Yuda a ku:
“We Yehovha, ni kombela u yingela zritu dzra Yuda,
Nakone ingiki u nga mu tlhelisela a tikweni dzrake,
A mavoko yake ma lwele leswi mu lumbaka,
Nakone ingiki u nga mu pfuna ku lwa ni valala vake.”
8 Mayelanu na Levhi a hlaye leswi:
“A Tumimi dzraku ni Urimi dzraku swi lumba wanuna lweyi a dumbekaka kwaku,
Lweyi u mu dzringiki a Masa.
U sungule ku holovisana na yene a matini ya Meriba,
9 Ni wanuna lweyi a hlayiki leswi mayelanu ni papayi wake ni mamana wake: ‘A ni va hlayeli ntxhumu.’
Nambi vamakwavu a nga na mhaka na vone,
A fulazrele ni vana lava e ke va pswala.
Hi leswi va bekisiki zritu dzraku,
Va va va landzra xipfumelelanu xaku.
10 Ingiki va nga dondzrisa Yakobe a swiboho swaku swa wuyavanyisi
Va dondzrisa na Israyele a Nawu waku.
Ingiki va nga nyikela muzri wa ku nun’hwela swanga nun’hwelo lowu nyonxisaka kwaku*
Ni gandzrelo ledzri heleliki a altarini dzraku.
11 We Yehovha, mu tovokisi hi ku mu nyika ntamu,
Nakone ingiki u nga nyonxela ntizro wa mavoko yake.
Tsrhova milenge* ya lava sekelekaka akuva va lwa na yene,
Akuva lava mu nyenyaka va nga ha tlheli va sekeleka.”
12 Mayelanu na Benjamini a hlaye leswi:
“Ingiki lweyi a zrandzriwaka ha Yehovha a nga tsrhama na a sizrelelekile kun’we na yene;
Nkama lowu a mu sizrelelaka siku hinkwadzru,
A ta tsrhama naye na a mu xingazrile.”
13 Mayelanu na Yosefa a hlaye leswi:
“Ingiki tiko dzraku dzri nga tovokisiwa ha Yehovha
Hi mintxhumu leyinene ya le tilweni,
Hi mbezre ni hi mati ya swihlovo leswi nga hansi ka misava,
14 Hi mintxhumu leyinene leyi kulisiwaka hi dambu
Ni hi ntsrhovelo lowunene hweti ni hweti,
15 Hi mintxhumu leyinene ngopfu leyi pfaka hi le tinhaveni ta khale,
Ni hi mintxhumu leyinene ya tinhava leti ti nga kone hi lani ku nga helikiki,
16 Hi mintxhumu leyinene ni leyi tatiki misava,
Ni hi kuva a yamukeleka ka Lweyi a humeleliki ka xinsinyana xa mitwa.
Ingiki hinkwaswu leswi swi nga va nhlokweni ya Yosefa
A henhla ka nhloko ya lweyi a hlawuliwiki xikazri ka vamakwavu.
17 A ku phatima kwake ku fana ni ka homu ya xinuna ya mativula,
Nakone a timhondzro take i timhondzro ta homu ya nhova.
A ta susumeta* matiko ha tone
A ta ma susumeta hinkwawu ku ya tlhasa wugan’wini bya misava.
Tone i madzanadzana ya Efrayimi,
Ni makume ya madzana ya Manasi.”
18 Mayelanu na Zebuloni a te:
“Nyonxa We Zebuloni, a mintizrweni yaku,*
Na wene Isakari, a mintxhatxheni yaku.
19 Va ta hlengeleta matiko a nhaveni.
Kolanu va ta nyikela magandzrelo hi ku lulama.
Hikusa va ta humesa wukosi byinyingi a malwandle
Ni mintxhumu ya lisima leyi fihlekiki a misaveni.”
20 Mayelanu na Gadi a hlaye leswi:
“A tovokile lweyi a yengeselaka mbangu wa Gadi.
A yetlela ku fana ni nghonyama leyi lulameliki ku phatlulela voko,
Ina, ku phatlulela nhloko ya lexi yi xi khomiki.
21 A ta tihlawulela xiyenge xa ku sungula,
Hikusa kolanu ku bekisiwa xiyenge xa lweyi a nga mubeki wa nawu.
A vazrangeli va tiko va ta tlhangana,
A ta hetisisa a wululami bya Yehovha
Ni swiboho swake swa wuyavanyisi a Israyele.”
22 Mayelanu na Dani a hlaye leswi:
“Dani i xinghonyamana,
A ta tlula ku sukela a Baxani.”
23 Mayelanu na Naftali a hlaye leswi:
“Naftali a nyonxile hi leswi a yamukelekaka ka Yehovha
Nakone a taliki hi matovoko
Titekele a mpeladambu ni nyingitimu.”
24 Mayelanu na Axere a hlaye leswi:
“Axere a tovokisiwa hi ku nyikiwa vana.
Ingiki a nga yamukeleka ka vamakwavu,
Nakone ingiki a nga tsrakamisa* minkondzro yake hi mafuzra.
25 Leswi u khiyaka hi swone swipfalu swaku swi hambiwe hi nsimbi ni kobri,
Nakone u ta tsrhama na u sizrelelekile masiku yaku hinkwawu.
26 A nga kone lweyi a fanaka na Xikwembu Nkulukumba* wa Yexuruni,
Lweyi a tsremakanyaka matilo akuva a ku pfuna
Nakone a taka hi le matlavini hi wukulukumba byake.
27 Xikwembu Nkulukumba i wutumbelo ku sukela khale swinene,
I wa hi lani ku nga helikiki, minkama hinkwayu a ta ku pfuna a va a ku sizrelela.
A ta hlongola valala mahlweni kwaku,
A va a ku: ‘Va helisi!’
28 Israyele a ta tsrhama na a sizrelelekile,
Nakone a nhlovo ya Yakobe yi ta tipfelisela mati
A tikweni dzra mavele ni vhinyu ledzrimpshwa,
Lani a matilo ma taka wisa mbezre.
29 U nyonxile, We Israyele!
I mani lweyi a fanaka na wene,
Tiko ledzri huluxiwaka ha Yehovha,
Xitlhangu xaku lexi ku sizrelelaka
Ni xipada xaku lexikulu ngopfu?
A valala vaku va ta woma hi ku ku txhava,
Nakone wene u ta kandzretela minhlana yavu.”*