Yonasi
4 Kambe leswo a swi mu nyonxisanga Yonasi nikutsrongo, a va a hlundzruka ngopfu swinene. 2 Hiloko Yonasi a khongota ka Yehovha a ku: “We Yehovha, xana leswi a hi swone leswi a swi ni vilelisa loko na ha li tikweni dzranga? Hi swoswo swi yentxiki leswaku ka khambi dzra ku sungula ni zama ku tsrutsruma ni ya Taraxixi, hikusa a ni swi tiva leswaku wene u Xikwembu Nkulukumba lweyi a nga ni wunene ni timpswalu, lweyi a lehisaka mbilu* nakone a taliki hi lizrandzru dzra ku dumbeka, futsrhi a vavisekaka ngopfu swinene hi kola ka khombo. 3 We Yehovha, na ku kombela, ni dlayi, hikusa swa yampswa ni fa ku tlula ku hanya.”
4 Yehovha a mu vutisa a ku: “U vona na swi twala kuva u hlundzruka ngopfu?”
5 Kutani Yonasi a huma doropeni a va a ya tsrhama ka tlhelo dzra le wuxeni dzra doropa. Kolahayani, a tihambela ntsrhuti leswaku a tsrhama hansi ka wone akuva a vona leswi a swi ta yentxekela doropa. 6 Hiloko Yehovha Xikwembu Nkulukumba a yentxa leswaku ku mila xinsinyana xa kukazri* akuva xi hambela Yonasi ntsrhuti leswaku a wisa ku hlupheka. Kutani Yonasi a nyonxa ngopfu swinene hi kola ka xinsinyana lexo.
7 Kambe loko byi xa hi siku ledzri landzrelaka, Xikwembu Nkulukumba wa ntiyiso a zrumela xipungwana xi da xinsinyana lexo, kutani xi woma. 8 Loko dambu dzri sungula ku tlhava, Xikwembu Nkulukumba a yentxa ni leswaku ku ba moya wa ku hisa lowu pfaka hi le wuxeni, kutani dambu dzri hisa nhloko ya Yonasi lakakuva a va kusuhi ni ku titivala. A kombela ku fa,* a va a ku: “Swa yampswa ni fa ku tlula ku hanya.”
9 Xikwembu Nkulukumba a vutisa Yonasi a ku: “U vona na swi twala kuva u hlundzruka ngopfu hi mhaka ya xinsinyana lexi?”
Yonasi a mu hlamula a ku: “Ni ni xivangelo xa kuva ni hlundzruka, ni hlundzruka ngopfu lakakuva ni djula ni ku fa.” 10 Kambe Yehovha a ku: “U xi twele wusiwana xinsinyana, xa ku a hi wene u xi byaliki nambi ku xi kulisa; xi kule hi wusiku byin’we xi va xi fa hi wusiku byin’we. 11 Xana a ni nga fanelanga ni twela wusiwana Ninivha, doropa ledzrikulu, ledzri nga ni ku tlula 120.000 wa vhanu lava nga tivikiki ku hambana xikazri ka leswinene ni leswi bihiki,* na ni nga hlayi swifuyu swavu leswinyingi?”