Eksoda
15 Hi nkama wolowo Moxe ni Vaisrayele va yimbelelela Yehovha lisimu ledzri, va ku:
“Na ha yimbelelela Yehovha hikusa a tlakuke ngopfu swinene.
A kavhalu ni lweyi a fambaka hi dzrone* a swi txukumetele lwandle.
2 Ku tiya kwanga ni ntamu wanga i Yah,* hikusa a ve muhuluxi wanga.
Lweyi i Xikwembu Nkulukumba wanga nakone ni ta mu dzrumisa; Xikwembu Nkulukumba wa vakokwana vanga, ni ta mu tlakuxa.
3 Yehovha i mulwi lwenkulu. Yehovha i vito dzrake.
4 A tin’qolo ta Faro ni masotxha yake a swi txukumete lwandle,
Nakone a masotxha yake lawa ya ku hlawuleka ma mbombomele Lwandle dzra ku Pshwuka.
5 A mavimbi ya lwandle ma va funeketile; va mbombomele nsingeni* ku fana ni zribye.
6 Awee Yehovha, voko dzraku dzra xinene dzri ni ntamu lowukulu;
Awee Yehovha, voko dzraku dzra xinene dzri nga helisa valala.
7 Hi wukulu bya ntamu waku u nga txukumetela hansi lava ku pfukelaka;
U zrumela mahlundzru yaku lama pfuzraka ma va hisa ku fana ni byanyi.
8 Hi ku hefemula loku humaka tinhompfini taku, mati ma hlengeletiwile;
A mati ma yime ku fana ni khumbi;
A mavimbi ma yime ma tiya a makazri ka lwandle.
9 A valala vezru va te: ‘Hi ta va hlongolisa! Hi va hi va kuma!
Hi ta yavelana mintxhumu yavu hi za hi yaneliseka!
Hi ta hlomula xipada! Hi ta va dlaya hi mavoko yezru!’
10 U hungise moya waku a lwandle dzri va funeketa;
Va mbombomele lwandle ledzrikulu ku fana ni nsimbi ya ku bindzra.
11 Awee Yehovha, i mani lweyi a fanaka na wene a makazri ka swikwembu?
I mani a fanaka na wene, a kombisaka wuxwengi lebyikulu?
Lweyi a faneliwaka hi ku txhaviwa ni ku dzrumisiwa hi tinsimu, Lweyi a yentxaka swihlamaliso.
12 U tlakuxe voko dzraku dzra xinene, kutani misava yi va minta.
13 Hi lizrandzru dzraku dzra ku dumbeka u kongomise vhanu lava u va tizruliki;
Hi ntamu waku u ta va kongomisa ka mbangu waku wa ku xwenga lowu u tsrhamaka ka wone.
14 A vhanu va fanela ku twa mayelanu ni mintxhumu leyi; va zruzrumela; a
vayaki va Filistiya va ta vaviseka* ngopfu swinene.
15 Hi nkama wolowo a vazrangeli va Edomu va ta txhava,
nakone a vafumi va Mowabu lava nga ni ntamu va ta zruzrumela.
A vayaki hinkwavu va le Kanana va ta hela ntamu.
16 Va ta txhava ni ku kazrateka.
Hi kola ka ntamu waku lowukulu va ta yima ku fana ni zribye
Va za vhanu vaku va khaluta, Awee Yehovha,
Va za vhanu lava u va vumbiki va khaluta.
17 U ta va buyisa u va simeka a nhaveni ya pfindla dzraku
U ta va simeka ka mbangu lowu u wu lulamiseliki akuva u tsrhama ka wone, Awee Yehovha,
Mbangu wa ku xwenga, lowu mavoko yaku ma wu simekiki, Awee Yehovha.
18 Yehovha a ta fuma hi masiku ni masiku.
19 Loko makavhalu ya Faro, tin’qolo take ta yimpi, ni lava fambaka hi makavhalu va nghene lwandle,
Yehovha a tlhelisele mati ya lwandle a henhla kwavu,
Kambe a vanhu va Israyele va fambe ka misava ya ku woma a makazri ka lwandle.”
20 Hiloko Miriyamu lweyi wa muprofeta, makwavu wa xisati wa Aroni, a teka dandana*, nakone vavasati hinkwavu va teka madandana va mu landzrela na va kina. 21 Miriyamu a hlamula vavanuna ka lisimu a ku:
“Yimbelelelani Yehovha hikusa a tlakuxiwe ngopfu swinene.
A kavhalu ni lweyi a fambaka ha dzrone va txukumeteliwe ndzreni ka lwandle.”
22 Ntsrhaku ka leswo, Moxe a zrangela Vaisrayele va suka a Lwandle dzra ku Pshwuka va ya mananga ya Xuri nakone va hete masiku mazrazru na va famba mananga, kambe a va kumanga mati. 23 Va ye tlhasa Mara,* kambe a va swi kotanga ku nwa mati ya le Mara hikusa a ma bava. Hi leswi swi yentxiki va txhula mbangu wolowo vito dzra ku Mara. 24 Xileswo a vhanu va sungula ku ngurangurela Moxe, va ku: “Hi ta nwa yini?” 25 Moxe a ya kombela mpfunu ka Yehovha, kutani Yehovha a mu komba xinsinyana. Loko Moxe a xi txukumetele matini, a mati ma va lama nandzrikaka.
Kolahayani, Xikwembu Nkulukumba a va bekela nawu, a tlhela a va byela leswi faneliki ku va susumetela ku yavanyisa, nakone kolahayani Xikwembu Nkulukumba a djule ku tiva leswaku va mu yingiseta kumbe im-him. 26 A va byela a ku: “Loko mi yingiseta zritu dzra Yehovha Xikwembu Nkulukumba wenu, mi yentxa leswi lulamiki kwake, mi zreyelisisa ndleve ka milawu yake, mi va mi landzra minkongomiso yake hinkwayu, a ni nge ti mi buyisela mavabyi ni man’we lawa ni ma buyiseliki Vaegipta, hikusa mine Yehovha ni ta mi hanyisa.”
27 Ntsrhaku ka leswo va tlhase a Elimi, lomu a ku ni 12 wa swihlovo ni 70 wa minsinya ya minkindzru, kutani va dzima mintsronga kusuhi ni mati.