Hagayi

2 Hi siku dzra wu 21 ka hweti ya wu 7, a zritu dzra Yehovha dzri tlhasela muprofeta Hagayi dzri ku: 2 “Ni kombela u vutisa Zerubabele govhernadori wa Yuda, n’wana wa Salatiyele, na muprista lwenkulu Yoxuwa n’wana wa Yehozadaki ni xitsrhungu hinkwaxu u ku: 3 ‘I mani kwenu lweyi a voniki ndlela leyi yindlu* leyi a yi phatimisa xiswone ku sunguleni? Mi yi vonisa kuyini swoswi? A swi hambi ingiki a hi ya ntxhumu loko yi fananisiwa ni leyi ya khale?’

4 “‘Kambe swoswi, tiya wene Zerubabele’, ku hlaya Yehovha, ‘nakone tiya wene Yoxuwa muprista lwenkulu n’wana wa Yehozadaki’.

“‘Tiyani n’wine hinkwenu vhanu va tiko ledzri’, ‘mi tizra’, ku hlaya Yehovha.

“‘Hikusa ni na n’wine’, ku hlaya Yehovha wa makhandzra. 5 ‘Dzrimukani leswi ni mi dumbisiki swone nkama lowu na mi huma a tikweni dzra Egipta ni leswaku a moya wanga wa ha tama wu va na n’wine.* Mi nga txhavi.’”

6 “Hikusa Yehovha wa makhandzra a li: ‘Ku nga li khale ni ta tlhela ni tsrekatsrekisa matilo, misava, lwandle ni misava leyi womiki.’

7 “‘Ni ta tsrekatsrekisa matiko hinkwawu, kutani a mintxhumu ya lisima* ya matiko hinkwawu yi ta nghena ka yindlu leyi, nakone ni ta yi tata hi ku phatima’, ku hlaya Yehovha wa makhandzra.

8 “‘A prata i dzranga ni woru i dzranga’, ku hlaya Yehovha wa makhandzra.

9 “‘A ku phatima ka yindlu leyi ku ta tlula ka le ku sunguleni’, ku hlaya Yehovha wa makhandzra.

“‘Nakone ni ta yentxa leswaku ku va ni ku zrula a mbangwini lowu’, ku hlaya Yehovha wa makhandzra.”

10 Hi lembe dzra wubidzri dzra ku fuma ka Dariyosi, hi siku dzra wu 24 ka hweti ya wu 9, a zritu dzra Yehovha dzri tlhasa ka muprofeta Hagayi dzri ku: 11 “Yehovha wa makhandzra a li: ‘Ni kombela u vutisa vaprista mayelanu ni nawu, u ku: 12 “Loko mhunu wa kukazri a tlakula nyama leyi xwengiki hi mpahla yake kutani a mpahla yoleyo yi khumba pawu, muzru, vhinyu, mafuzra kumbe muxaka wun’wana ni wun’wana wa swakuda, xana swi ta va leswi xwengiki?”’”

A Vaprista va hlamula va ku: “Im-him!”

13 Hiloko Hagayi a vutisa a ku: “Loko mhunu wa kukazri lweyi a nyamiki hi ku va a khumbe ntsrumbu,* a khumba wun’we wa mintxhumu leyi, xana wu ta va lowu nyamiki?”

A vaprista va hlamula va ku: “Wu ta va lowu nyamiki.”

14 Xileswo Hagayi a ku: “‘A xitsrhungu lexi xi tsrhamisise xiswoswo, ni tiko ledzri dzri tsrhamisise xiswoswo a mahlweni kwanga’, ku hlaya Yehovha, ‘ni ntizro hinkwawu wa mavoko yavu wu tsrhamisise xiswoswo; hinkwaswu leswi va swi nyikelaka swi nyamile’.

15 “‘Kambe ku sukela ka namunhla ni kombela mi yanakanyisisa hi leswi: A ku yentxeka yini nkama lowu na ku nge si na tlhantekiwa zribye a henhla ka zribye dzrin’wana a tempeleni dzra Yehovha? 16 Loko mhunu a ya lani ku nga ni nhulu ya tinhleke na a yimela ku kuma 20 wa mimpimu a a kuma ntsena 10 wa yone; loko mhunu a ya mbangwini wa ku pfuvela ka wone vhinyu akuva a ya ka 50 wa mimpimu a a kuma ntsena 20 wa yone. 17 A ni mi khatisa hi ku vanga mumu wa ku hisa ngopfu swinene, mavabyi* ni mazralana, swi wela masimu yenu, kambe a nga kone ni mun’we kwenu lweyi a tlheleliki kwanga’, ku hlaya Yehovha.

18 “‘Ni kombela ku sukela ka namunhla, 24 ka hweti ya wu 9, siku ledzri ku simekiwiki masungulo ya tempele dzra Yehovha, mi hamba mi xiyisisa leswi: 19 Xana ka ha ni tinhleke a tsrhaleni? A nsinya wa mawuvha, nsinya wa makuwa, nsinya wa magranada ni nsinya wa nhlwazri a swi bindzrulanga ntxhumu, a hi swone? Ku sukela ka namunhla ni ta mi tovokisa.’”

20 Hi siku dzroledzro dzra wu 24 a zritu dzra Yehovha dzri tlhela dzri tlhasela Hagayi hi khambi dzra wubidzri dzri ku: 21 “Byela Zerubabele govhernadori wa Yuda u ku: ‘Ni ta tsrekatsrekisa matilo ni misava. 22 Ni ta helisa xiluvelo xa mimfumu ni helisa ni ntamu wa mimfumu ya matiko; nakone ni ta helisa tin’qolo ta yimpi ni lava va fambaka hi tone, a makavhalu ni lava va fambaka hi wone va ta dlayanana hi xipada.’”

23 Yehovha wa makhandzra a li: “‘Hi siku ledzro ni ta ku teka, wene nandzra wanga Zerubabele n’wana wa Salatiyele’, ku hlaya Yehovha, ‘ni ta ku yentxa u va xitlan’wana xa ku funga hi xone, hikusa hi wene ni ku hlawuliki’, ku hlaya Yehovha wa makhandzra.”