Madzrungula Lamanene Lama Tsraliwiki hi Luka

19 Kutani Yesu a nghena Yeriko a tsremakanya hi kone. 2 Ka doropa dzroledzro a ku ni wanuna lweyi a vitaniwaka Zakewu; lweyi a a li muzrangeli wa vahakelisi va tinemba nakone a a ganyile.* 3 A a zama ku vona Yesu, kambe a a hluleka hi mhaka ya xitsrhungu hikusa a a gomile. 4 Xileswo, a zranga a tsrutsruma a ya khwela henhla ka nsinya wa nkuwa akuva a mu vona hikusa a a li kusuhi ni ku khaluta hi kolanu. 5 Loko Yesu a tlhasa mbangwini wolowo, a lavisa henhla kutani a mu byela a ku: “Zakewu, kahlula u xika hikusa namunhla ni fanela ku ya kaya kwaku.” 6 Xileswo a xika hi ku kahlula a mu yamukela kaya kwake na a nyonxe ngopfu. 7 Loko va vona leswo, hinkwavu va sungula ku n’unun’uta va ku: “A yendzrele wanuna lwiyani wa mudohi.” 8 Kambe Zakewu a sekeleka a byela Yesu a ku: “Hosi, ni ta nyika swisiwana hamfu ya leswi nga swanga, nakone mun’wana ni mun’wana lweyi ni mu tekeliki mintxhumu hi ku kanganyisa,* ni ta mu tlhelisela hi lani ku phindhiwiki ka mune.” 9 Loko Yesu a twa leswo, a mu byela a ku: “Namunhla muti lowu wu tlhaseliwi hi huluku, hikusa na wene u n’wana wa Abrahamu. 10 Hikusa a N’wana wa mhunu a tele ku ta djuletela ni ku huluxa lava lahlekiki.”

11 Na vadondzrisiwa va ha li ku yingiseteni ka mintxhumu leyo, a hlaya xifaniso xin’wana, hikusa a a li kusuhi ni Yerusalema nakone vone a va yanakanya leswaku a Mfumu wa Xikwembu Nkulukumba a wu ta tlhasa hi nkama wolowo. 12 Xileswo a te: “Wanuna wa kukazri lweyi a a li n’wana wa hosi a yendzre a ya tikweni dzra le kule akuva a ya yamukela wuhosi a gama a tlhela. 13 Kutani a vitana 10 wa vatizri vake, a va nyika 10 wa mamina* a va byela a ku: ‘Salani mi hamba mabindzru hi wone ku ya tlhasa loko ni buya.’ 14 Kambe a vhanu va tiko dzrake a va mu nyenya, xileswo va zrumela ntlawa wa kukazri wa vayimeli leswaku va ya tikweni ledzri a yiki ka dzrone va ya ku: ‘A hi swi djuli leswaku wanuna lweyi a va hosi yezru.’

15 “Loko a buyile na kutani a kume wuhosi, a vitana vatizri lava a va nyikiki mali* akuva a tiva leswaku va kume yini ka mabindzru lawa va ma hambiki. 16 Xileswo wa ku sungula a mu tsrhindzrekelela a mu byela a ku: ‘Hosi, a mina dzraku dzri bindzrule 10 wa mamina.’ 17 A hosi yi mu byela yi ku: ‘U yentxi ha hombe, mutizri lwenene! Leswi u dumbekiki ka mintxhumu ya yitsrongo ngopfu swinene, u ta fuma 10 wa madoropa.’ 18 Wa wubidzri a mu tsrhindzrekelela a ku: ‘Hosi, a mina dzraku dzri bindzrule ntlhanu wa mamina.’ 19 A mu byela hi lani ku fanaka a ku: ‘Na wene u ta fuma ntlhanu wa madoropa.’ 20 Kambe a mutizri mun’wana a tlhasa a ku: ‘Hosi, hi ledzri mina dzraku, a ni dzri tsrimbele hi panu ni dzri tlhota. 21 Nakunene ni yentxi leswo hi mhaka ya ku ku txhava, hikusa u mhunu wa ku kazrata, u teka leswi u kalaka u nga swi bekanga u tlhela u tsrhovela leswi u kalaka u nga swi byalanga.’ 22 Kutani a hosi yi mu byela yi ku: ‘Ni ta ku yavanyisa hi mazritu yaku, wene mutizri lweyi a bihiki. U li a wu swi tiva leswaku ni mhunu wa ku kazrata, ni teka leswi ni kalaka ni nga swi bekanga ni tlhela ni tsrhovela leswi ni kalaka ni nga swi byalanga? 23 Kutani ha yini u nga tekanga mali* yanga u ya yi beka banku akuva loko ni buya ni ta yi kuma na yi li yinyingi?’

24 “Xileswo, a hosi yi byela lava yimiki kolanu yi ku: ‘Mu tekelani mina mi nyika lweyi a nga ni 10 wa mamina.’ 25 Kambe va yi byela va ku: ‘Hosi, phela kutani a ni 10 wa mamina!’ 26 ‘Na mi byela, lweyi a nga na swone, a ta yengeseleliwa, kambe lweyi a kalaka a nga li na swone, nambi swa switsrongo leswi a nga na swone a ta tekeliwa swone. 27 Handle ka leswo, buyisani valala vanga, lava kalaka va nga swi djulanga leswaku ni va hosi yavu, mi va dlaya a mahlweni kwanga.’”

28 Ntsrhaku ka ku hlaya mintxhumu leyi, Yesu a ya mahlweni a tlhantukela a Yerusalema. 29 Loko a li kusuhi ni ku tlhasa a Betfage ni Betaniya a nhaveni leyi vitaniwaka Nhava ya Minhlwazri, a zruma vadondzrisiwa vake vabidzri, 30 a ku: “Fambani ka xidoropana lexiya xi vonekaka, loko mi nghenile ka xone, mi ta kuma ximbongolwana na xi tsrimbiwile, lexi ku nga liki na mhunu lweyi a samiki a khwela ka xone. Xi tlhantlhani mi buya na xone. 31 Kambe loko mhunu wa kukazri a mi vutisa a ku: ‘Mi xi tlhantlhela yini?’ Mi fanela ku mu hlamula mi ku: ‘Xi djuliwa hi Hosi.’” 32 Xileswo, lava a va zrumiwile va suka va famba va ya swi kumisa xiswoswi a va byelisiki xiswone. 33 Kambe a nkama lowu va xi tlhantlhaka, a vinyi va xone va va vutisa va ku: “Mi xi tlhantlhela yini ximbongolwana lexi?” 34 Va ku: “Xi djuliwa hi Hosi.” 35 Xileswo va xi buyisa ka Yesu, va xi kapeka timpahla tavu kutani Yesu a khwela ka xone.

36 A nkama lowu a fambaka, a vhanu a va yandlala timpahla tavu a ndleleni. 37 Na a ha ku tlhasa kusuhi ni ndlela leyi fulamelaka hi le Nhaveni ya Minhlwazri, a xitsrhungu hinkwaxu xa vadondzrisiwa xi sungula ku nyonxa ni ku dzrumisa Xikwembu Nkulukumba hi zritu ledzri tlakukiki, hi mhaka ya mintxhumu hinkwayu ya ku hlamalisa leyi xi yi voniki, 38 xi ku: “A tovokile lweyi a taka swanga Hosi hi vito dzra Yehovha! A ku ve ni ku zrula a matilweni, nakone a ku dzrumisiwi Xikwembu Nkulukumba lweyi a nga henhlahenhla!” 39 Nambitanu, van’we va Vafarisi lava a va li ka xitsrhungu xolexo va ku: “Mudondzrisi, kawuka vadondzrisiwa vaku.” 40 Kambe a va hlamula a ku: “Na mi byela, loko lava va miyela, a mazribye ma ta huwelela.”

41 Loko a tlhasa kusuhi ni Yerusalema, a vona doropa kutani a dzri dzrilela, 42 a ku: “Loko wene a wu yi xiyile mintxhumu leyi a yi ta ku tisela ku zrula . . . kambe swoswi u fihleliwe yone. 43 Hikusa ma ta masiku lawa a valala vaku va taka ku biyela hi timhandzri ta ku n’qidja* kutani va ku tsrandzrela va ku hlasela hi matlhelo hinkwawu. 44 Va ta ku tlatlalata hansi kun’we ni vanaku, a ku na zribye ledzri va taka dzri siya a henhla ka zribye dzrin’wana a doropeni ledzri, hikusa Xikwembu Nkulukumba a tile leswaku a ta ku yavanyisa, kambe wene a wu swi xiyanga.”

45 Ntsrhaku ka leswo, a nghena tempeleni a sungula ku hlongola lava a va li ku xaviseni, 46 a va byela a ku: “A Matsralwa ma li: ‘A yindlu yanga yi ta va yindlu ya xikhongoto’, kambe n’wine mi yi yentxa yindlu ya* vayivi.”

47 Siku ni siku a a ya mahlweni a dondzrisa tempeleni. Kambe a vaprista lavakulu, vatsrali kun’we ni vakulukumba va tiko a va djula ku mu dlaya; 48 kambe a va nga swi tivi leswaku va nga yentxisa kuyini, hikusa vhanu hinkwavu a va ku namanama na yene akuva va mu yingiseta loko a dondzrisa.