Levhitika

14 Yehovha a ya mahlweni a byela Moxe a ku: 2 “Loko mhunu lweyi a nga ni nhlokonho a yisiwa ka muprista, hi lowu nawu lowu taka landzriwa hi siku ledzri ku taka hlayiwa leswaku a basile. 3 A muprista a ta huma a mbangwini lowu va dzimiki ka wone mintxhatxha a va a mu kambela. Loko nhlokonho yake yi dahekile, 4 a muprista a ta mu byela leswaku a buyisa tinyanyana tibidzri leti hanyaka nakone ti kalaka ti nga nyamanga, lihunyi dzra nkedari, ngoti ya ku pshwuka ni xiphundla xa hisopa* akuva a basisiwa. 5 A muprista a ta zrumisa leswaku a nyanyana yin’we yi dlayeliwa ka xibya xa vumba lexi nga ni mati lama kiwiki xihloveni. 6 Ntsrhaku ka leswo, a ta teka nyanyana leyi hanyaka, lihunyi dzra nkedari, ngoti ya ku pshwuka ni xiphundla xa hisopa, a swi peta ka ngati ya nyanyana leyi dlayeliwiki ka mati lama kiwiki xihloveni. 7 Kutani a ta xwanya lweyi a hanyisiwaka ka mavabyi ya nhlokonho hi ngati ku dzringana 7 wa makhambi a va a hlaya leswaku a basile, a gama a tsrhika nyanyana leyi hanyaka yi haha yi tifambela nhoveni.

8 “Lweyi a tibasisaka ka mavabyi ya nhlokonho a fanela ku hlampswa mpahla yake, a byevula misisi yake hinkwayu* a va a hlamba, kutani a ta va lweyi a basiki. Ntsrhaku ka leswo, a nga nghena a mbangwini lowu va dzimiki ka wone mintxhatxha kambe a nge ti nghena a ntxhatxheni wake ku dzringana 7 wa masiku. 9 Hi siku dzra wu 7, a fanela ku byevula misisi hinkwayu ya nhloko yake, malepfu ni tinxiyi. Ntsrhaku ka loko a byevule misisi yake hinkwayu a ta ya hlampswa mpahla yake a va a hlamba, kutani a ta va lweyi a basiki.

10 “Hi siku dzra wu 8, a ta teka swihambana swibidzri swa xinuna leswi hanyiki ha hombe ku patsra ni xihambana xin’we xa xisati, na swo ho va ni lembe dzrin’we, a teka ni mapa lamanene ya kolomu ka makilu mazrazru* lawa ma patsriwiki ni mafuzra, akuva ma va gandzrelo dzra tinhleke, a teka ni mafuzra ya kolomu ka hamfu ya litru.* 11 A muprista lweyi a hlayaka leswaku mhunu lweyo a basile, a ta yisa mhunu yelweyo lweyi a basisiwiki ku patsra ni magandzrelo lawo a mahlweni ka Yehovha, a nyangweni wa tende dzra ntlhanganu. 12 A muprista a ta teka xihambana xin’we xa xinuna a xi nyikela swanga gandzrelo dzra nandzru ku patsra ni kolomu ka hamfu ya litru dzra mafuzra, kutani a swi yisa mahlweni na a swi tlhelisa ntsrhaku, swanga gandzrelo ledzri zrendzrelekisiwaka a mahlweni ka Yehovha. 13 Ntsrhaku ka leswo, a ta dlaya xihambana lexo xa xinuna a mbangwini wa ku xwenga lani hi ntolovelo ku dlayeliwaka kone swihazri swa gandzrelo dzra xidoho ni swa gandzrelo dzra ku hisiwa, hikusa ku fana ni gandzrelo dzra xidoho, a gandzrelo dzra nandzru dzri lumba muprista. I ntxhumu wa ku xwengisisa.

14 “Ntsrhaku ka leswo, a muprista a ta teka ngatinyana ya gandzrelo dzra nandzru, kutani a yi tota wugan’wini bya ndleve ya xinene, ka litiho dzra dzrikulu dzra kone dzra voko dzra xinene ni dzra nkondzro wa xinene, swa lweyi a tibasisaka. 15 Ka mafuzra lawo ya kolomu ka hamfu ya litru, a muprista a ta tekanyana matsrongo a ma txhela ka xiyandla xake xa voko dzrake dzra ximatsri. 16 A ta gama a peta litiho dzrake dzra xinene ka mafuzra wolawo lawa ma nga ka xiyandla xa voko dzrake dzra ximatsri a ma xwanyanyana a mahlweni ka Yehovha hi litiho dzrake, ku dzringana 7 wa makhambi. 17 Hi ku landzrela, ka mafuzra lawa ma salaka ka xiyandla xake xa voko, a ta totanyana matsrongo a wugan’wini bya ndleve ya xinene, ka litiho dzra dzrikulu dzra kone dzra voko dzra xinene ni le ka litiho dzra dzrikulu dzra kone dzra nkondzro wa xinene, swa lweyi a tibasisaka, a ma tota lani a sunguliki a tota ngati ya gandzrelo dzra nandzru. 18 A mafuzra lawa ma taka sala ka xiyandla xake xa voko, a ta ma txhela nhlokweni ya lweyi a tibasisaka, hi ndlela leyo a muprista a ta mu kombelela ku dzrivaleliwa a mahlweni ka Yehovha.

19 “A muprista a ta dlaya xihazri xa gandzrelo dzra xidoho, a va a kombelela mhunu lweyi a tibasisaka ka ku nyama kwake leswaku a dzrivaleliwa a gama muprista a dlaya xihazri xa gandzrelo dzra ku hisiwa. 20 Kutani a muprista a ta nyikela gandzrelo dzra ku hisiwa ni gandzrelo dzra tinhleke a altarini; hi ndlela leyo, a muprista a ta kombelela mhunu lweyo ku dzrivaleliwa, kutani a ta va lweyi a basiki.

21 “Kambe loko mhunu lweyi a tibasisaka a li xisiwana nakone a nga na makotela ya ku humesa mintxhumu leyi, a ta teka xihambana xin’we xa xinuna xa gandzrelo dzra nandzru, a xi nyikela akuva xi va gandzrelo ledzri zrendzrelekisiwaka, ku yentxela leswaku a tikombelela ku dzrivaleliwa, a nyikela ni kolomu ka kilu dzra* mapa lamanene lama patsriwiki ni mafuzra akuva ma va gandzrelo dzra tinhleke, mafuzra ya kolomu ka hamfu ya litru, 22 swivambalana swibidzri kumbe swituvana swibidzri hi ku ya hi makotela yake. Xin’we a ta xi tizrisela kuva gandzrelo dzra xidoho xin’wana xi va gandzrelo dzra ku hisiwa. 23 Hi siku dzra wu 8, a ta ma yisa mahlweni ka muprista a nyangweni wa tende dzra ntlhanganu a mahlweni ka Yehovha, akuva ku hlayiwa leswaku a basile.

24 “A muprista a ta teka xihambana xin’we xa xinuna xa gandzrelo dzra nandzru ni mafuzra ya kolomu ka hamfu ya litru, kutani a swi yisa mahlweni na a swi tlhelisa ntsrhaku swanga gandzrelo ledzri zrendzrelekisiwaka a mahlweni ka Yehovha. 25 Ntsrhaku ka leswo, a muprista a ta dlaya xihambana xa xinuna xa gandzrelo dzra nandzru a va a teka ngatinyana ya xone a yi tota wugan’wini bya ndleve ya xinene, ka litiho dzra dzrikulu dzra kone dzra voko dzra xinene ni le ka litiho dzra dzrikulu dzra kone dzra nkondzro wa xinene, swa lweyi a tibasisaka. 26 A muprista a ta teka mafuzranyana matsrongo a ma txhela ka xiyandla xa voko dzrake dzra ximatsri, 27 a gama a peta litiho dzrake dzra xinene ka mafuzra wolawo lawa ma nga ka xiyandla xa voko dzrake dzra ximatsri, a ma xwanyanyana a mahlweni ka Yehovha hi litiho dzrake ku dzringana 7 wa makhambi. 28 Kutani ka mafuzra lawa ma nga ka xiyandla xake, a muprista a ta totanyana matsrongo a wugan’wini bya ndleve ya xinene, ka litiho dzra dzrikulu dzra kone dzra voko dzra xinene ni le ka litiho dzra dzrikulu dzra kone dzra nkondzro wa xinene, swa lweyi a tibasisaka, a ma tota lani a sunguliki a tota ngati ya gandzrelo dzra nandzru. 29 A mafuzra lawa ma taka sala ka xiyandla xake xa voko, a ta ma txhela nhlokweni ya lweyi a tibasisaka, hi ndlela leyo a muprista a ta mu kombelela ku dzrivaleliwa a mahlweni ka Yehovha.

30 “A ta nyikela xin’we xa swivambalana kumbe xin’we xa swituvana hi ku ya hi makotela yake, 31 xi va gandzrelo dzra xidoho, lexin’wana xi va gandzrelo dzra ku hisiwa, a ta nyikela ni gandzrelo dzra tinhleke; kutani a muprista a ta kombelela mhunu lweyi a tibasisaka ku dzrivaleliwa, a mahlweni ka Yehovha.

32 “Lowu i nawu mayelanu ni mhunu lweyi a viki ni mavabyi ya nhlokonho kambe a kalaka a nga na makotela ya kuva a tibasisa.”

33 Hiloko Yehovha a byela Moxe na Aroni a ku: 34 “Loko mi tlhasa tikweni dzra Kanana ledzri ni mi nyikaka dzrone swanga pfindla dzrenu, ni va ni pfumelela leswaku a mavabyi ya nhlokonho ma hlasela yindlu ya kukazri a tikweni dzrenu, 35 a n’winyi wa yindlu a fanela ku yela muprista a tlhasa a mu byela a ku: ‘Ni ngheneliwe hi ntungu kaya.’ 36 A muprista a ta leleta leswaku ku humeseliwa mintxhumu hinkwayu a ndlwini na a nga si na ya a ya yi kambela, akuva loko a tlhasa a nga hlayi leswaku a mintxhumu leyi nga ndlwini yi nyamile; ntsrhaku ka leswo a ta nghena a yi kambela. 37 A muprista a ta kambela mbangu wolowo; kutani loko makhumbi ma ni mabati ya nkuxe wa ku ya ka halandi kumbe ya ku zuka, nakone ma tikomba na ma nghene ndzreni ka khumbi, 38 a muprista a ta ya nyangweni wa yindlu a va a hlaya leswaku a yi fanelanga ku tizrisiwa ku dzringana 7 wa masiku.

39 “Hi siku dzra wu 7, a muprista a ta tlhela a ya ka yindlu leyo akuva a ya yi kambela. Loko a mabati lawo ma hangalake ni makhumbi ya yindlu, 40 a muprista a ta leleta leswaku a mazribye lawa ma nga ni mabati ya ntungu ma susiwa ma ya txukumetiwa handle ka doropa a mbangwini lowu nyamiki. 41 Ntsrhaku ka leswo, a ta leleta leswaku a ndzreni ka yindlu leyo ku khwayiwa ngopfu swinene, kutani a mintxhumu leyi suseleliwaka* yi fanela ku ya txukumetiwa handle ka doropa a mbangwini lowu nyamiki. 42 Kutani ka mbangu lowu va suseleliki mazribye lawa a ma ni mabati ku ta bekiwa man’wana, nakone a yindlu yi fanela ku rebukariwa hi mbopfi ya nyiwana.

43 “Kambe loko ko tlhela ku humelela mabati nambileswi yindlu yi khwayeleliwiki, yi suseleliwa mazribye yi tlhela yi rebukarisiwa xinyiwana, 44 a muprista a ta nghena a yi kambela. Loko mabati ma hangalake ni yindlu swi hlaya leswaku i nhlokonho leyi dlayaka. 45 A muprista a ta leleta leswaku a yindlu leyo yi gilhitiwa, ku suseleliwa mazribye, timhandzri, ku va ku woliwa hinkwaswu swi yisiwa handle ka doropa a mbangwini lowu nyamiki. 46 Kambe loko mhunu wa kukazri o txhuka a nghena ka yindlu leyo na ka ha hlayiwe leswaku a yi fanelanga yi tizrisiwa, a ta va lweyi a nyamiki ku ya tlhasela madambyeni; 47 lweyi a yetlelaka ka yindlu leyo a fanela ku hlampswa mpahla yake ni lweyi a delaka ka yindlu leyo a fanela ku hlampswa mpahla yake.

48 “Kambe loko muprista a ya kambela a kuma leswaku a mabati a ma tlhelanga ma humelela ka yindlu ntsrhaku ka loko yi rebukarisiwe xinyiwana, a muprista a fanela ku hlaya leswaku a yindlu leyo yi basile* hikusa a mabati ma nyamalalile. 49 Akuva yindlu yi basisiwa,* a muprista a ta teka tinyanyana tibidzri, lihunyi dzra nkedari, ngoti ya ku pshwuka ni xiphundla xa hisopa. 50 A ta dlaya nyanyana yin’we ka xibya xa vumba lexi nga ni mati lawa ma kiwiki xihloveni. 51 Ntsrhaku ka leswo, a ta teka lihunyi dzra nkedari, xiphundla xa hisopa, ngoti ya ku pshwuka ni nyanyana leyi hanyaka, a swi peta ka ngati ya nyanyana leyi dlayeliwiki ka mati lawa ma kiwiki xihloveni a gama a xwanya ngati leyo ku dzringana 7 wa makhambi na a kongome yindlu. 52 Kutani a ta tizrisa ngati ya nyanyana, mati lawa ma kiwiki xihloveni, nyanyana leyi hanyaka, lihunyi dzra nkedari, xiphundla xa hisopa ni ngoti ya ku pshwuka akuva a basisa yindlu leyo leyi nyamiki. 53 A gama a tsrhika nyanyana leyi hanyaka yi haha yi tifambela nhoveni a handle ka doropa, a va a basisa yindlu* ka ku nyama ka yone; kutani yi ta va leyi basiki.

54 “Lowu i nawu mayelanu ni mavabyi ya nhlokonho, mavabyi ya xikhumba xa nhloko kumbe xa xilepfu, 55 nhlokonho ya le ka mpahla kumbe ka yindlu, 56 ni mayelanu ni ku pfimba, swilondzra ni mabati, 57 akuva swi ta tiveka leswaku ntxhumu wa kukazri wu nyamile kumbe wu basile. Lowu i nawu mayelanu ni mavabyi ya nhlokonho.”