Mintizro ya Vapostola
13 A bandleni dzra Antiyokiya a ku ni vaprofeta ni vadondzrisi, ku nga lava: Barnaba, Simeyoni lweyi a vitaniwaka Nigere, Lukiyu wa le Kirene, Sawulo na Manahene lweyi a a dondzre xikan’we xikole na Heroda govhernadori wa muganga. 2 Na va li ku tizreleni ka Yehovha va tlhela va titsrona swakuda, a moya wa ku xwenga wu te: “Ni hlawulelani Barnaba na Sawulo akuva va yentxa ntizro lowu ni va vitaneliki wone.” 3 Kutani ntsrhaku ka loko va titsrone swakuda va tlhela va khongota, va va tlhanteke mavoko va gama va va tsrhika va famba.
4 Xileswo vavanuna lava, lava zrumiwiki hi moya wa ku xwenga, va fulamele va ya Selukiya kutani a Selukiya va wela va ya Kipra. 5 Loko va tlhasa a Salamina, va sungule ku zrezra zritu dzra Xikwembu Nkulukumba a masinagogeni ya Vayuda. Nakone a va na Yohane swanga mupfunisi wavu.
6 Loko va fambafambe xihlale hinkwaxu ku ya tlhasa Pafo, va tlhangane ni Muyuda wa kukazri lweyi a vitaniwaka Bariyesu, lweyi a a li muloyi a tlhela a va muprofeta wa madzrimi. 7 A a na Serjio Pawulosi, govhernadori wa xifundzra, wanuna wa ku tlhazriha. Serjio Pawulosi a vitana Barnaba na Sawulo, hikusa a a swi djula ngopfu ku twa zritu dzra Xikwembu Nkulukumba. 8 Kambe Elima lwe wa muloyi (hikusa hi leswi a vito dzrake dzri tlhamuxelaka swone loko dzri ndzruluteliwa) a sungula ku va phikisa, a zama ku sivela govhernadori wa xifundzra ku kombisa lipfumelo ka Hosi. 9 Kutani Sawulo, lweyi a tlhelaka a vitaniwa hi vito dzra ku Pawulo, a tala hi moya wa ku xwenga a mu lavisisa 10 a ku: “Wene mhunu lweyi a taliki hi mixaka hinkwayu ya wukanganyisi ni mixaka hinkwayu ya wubihi, n’wana wa Diyavulosi, wene nala wa mintxhumu hinkwayu leyi lulamiki, ha yini u soholota tidondzro leti lulamiki ta Yehovha? 11 Wa swi twa! Yehovha a ta ku khatisa, u ta fa matihlo, a wu nge he ti ku vona ku vaninga ka dambu ku dzringana nkama wa kukazri.” Hi nkama wolowo a matihlo yake ma tekela ku va ni mphumelo ni munyama, a sungula ku hulumetela a djula mhunu wa ku mu khungisa hi voko. 12 Loko govhernadori wa xifundzra a vona leswo, a va mupfumeli, hikusa a hlamalisiwe ngopfu swinene hi tidondzro ta Yehovha.
13 Kutani Pawulo ni lava a va li na yene va suka Pafo va wela va tsremakanya lwandle va tlhasa Perga a Pamfiliya. Kambe Yohane a va siya a tlhelela Yerusalema. 14 Nambitanu va suka a Perga va ya Antiyokiya a Pisidiya. Hi siku dzra Savata va nghena sinagogeni va tsrhama. 15 Ntsrhaku ka loko ku dondzriwe Nawu ni mabuku ya Vaprofeta, a vazrangeli va sinagoga va va nyika zritu va ku: “Vavanuna, vamakwezru, loko mi ni mazritu ya kukazri ya ku tiyisa vhanu, ma hlayani.” 16 Xileswo Pawulo a sekeleka, a va byela hi voko leswaku va miyela a gama a ku:
“Vavanuna, Vaisrayele, na n’wine van’wana mi txhavaka Xikwembu Nkulukumba, yingisetani. 17 Xikwembu Nkulukumba wa vhanu va Israyele, a hlawule vakokwana vezru a va tlakuxa na va ha hanya swanga valuveli a tikweni dzra Egipta, a tlhela a va humesa a tikweni ledzro hi voko dzrake dzra ntamu. 18 A va lehisele mbilu ku dzringana 40 wa malembe a mananga. 19 Ntsrhaku ka loko a helise 7 wa tinxaka a tikweni dzra Kanana, a nyike vakokwana vezru tiko ledzro swanga pfindla. 20 Leswo hinkwaswu swi teke kolomu ka 450 wa malembe.
“Ntsrhaku ka leswo a va nyike vayavanyisi ku ya tlhasa a masikwini ya muprofeta Samuwele. 21 Kambe va game va londzra ku va ni hosi, kutani Xikwembu Nkulukumba a va nyika Sawulo n’wana wa Kixi, wa lixaka dzra Benjamini, nakone a fume ku dzringana 40 wa malembe. 22 Ntsrhaku ka loko a mu susile, a va hlawulele Davhida akuva a va hosi yavu, lweyi a nyikeliki wumboni mayelanu na yene a ku: ‘Ni kume Davhida n’wana wa Yese, lweyi a yamukelekaka a mbilwini yanga; a ta yentxa hinkwaswu leswi ni swi djulaka.’ 23 Hi lani a a dumbise ha kone, Xikwembu Nkulukumba a tisele Israyele muhuluxi ku nga Yesu, hi vana va* wanuna lweyi. 24 Na Yesu a nga si na tlhasa, Yohane a zrezrele vhanu hinkwavu va Israyele a livaleni a va byela leswaku va babatisiwa akuva va kombisa leswaku va tisola. 25 Kambe loko Yohane a ya ku hetiseni ka ntizro wake, a a ku: ‘Mi pimisa leswaku hi mine mani? A hi mine mhunu lweyi mi mu pimisaka! Lweyi a taka ntsrhaku kwanga a swi ni faneli ku tlhantlha tingoti ta masandaliya yake.’
26 “Vavanuna, vamakwezru, n’wine vana vandangu wa Abrahamu ni lavan’wana lava nga makazri kwenu lava txhavaka Xikwembu Nkulukumba, a dzrungula ledzri dzra mayelanu ni ku huluxiwa kwezru dzri zrumeliwile kwezru. 27 Hikusa a vayaki va Yerusalema ni vafumi vavu, a va mu pfumelanga muhuluxi lweyi, kambe loko va mu yavanyisa va hetisise leswi hlayiwiki hi Vaprofeta, ku nga leswi dondzriwaka hi masavata hinkwawu hi zritu ledzri tlakukiki. 28 Nambileswi va kalaka va nga kumanga xivangelo xa kuva a dlayiwa, va sindzrise Pilatu akuva a hlaya leswaku a dlayiwa. 29 Nakone loko va hetisise mintxhumu hinkwayu leyi tsraliwiki mayelanu na yene, va mu xixe mhandzrini* va va va ya mu beka sizreni. 30 Kambe Xikwembu Nkulukumba a mu pfuxile a ku feni, 31 nakone a humeleli masiku manyingi ka lava va fambiki na yene ku suka a Galileya va ya Yerusalema. Swoswi vone va nyikelaka wumboni mayelanu na yene a vhanwini.
32 “Xileswo hi mi zrezrela madzrungula lamanene mayelanu ni xidumbiso lexi yentxeliwiki vakokwana vezru. 33 Xikwembu Nkulukumba a xi hetisisile hi ku helela kwezru, hine vana vavu, hi ku pfuxa Yesu a ku feni hi lani swi tsraliwiki ha kone ka mapsalma ya wubidzri: ‘Wene u n’wananga, namunhla ni ndzruluke papayi waku.’ 34 Nakone mhaka ya leswaku a mu pfuxile ku feni akuva a nga ha tlheli a va ni mizri wa vhanu va nyama lowu faka wu tlhela wu bola, Xikwembu Nkulukumba a yi tiyisekise loko a hlaya a ku: ‘Ni ta mi komba lizrandzru dzra ntiyiso ledzri ni dzri dumbisiki Davhida, a xidumbiso lexi i xa kakunene.’* 35 Xileswo ka mapsalma mambeni nakone ku hlayiwa leswi: ‘A wu nge ti swi pfumelela leswaku nandzra waku lweyi a dumbekaka a bola.’ 36 Davhida, a wuton’wini byake a tizrele Xikwembu Nkulukumba,* a gama a fa a va a lahliwa ni vakokwana vake, nakone mizri wake wu bolile. 37 Kambe lweyi Xikwembu Nkulukumba a mu pfuxiki ku feni a mizri wake a wu bolanga.
38 “Kutani vamakwezru, tivani leswaku mhaka ya ku dzrivaleliwa swidoho leyi mi zrezreliwaka yone swoswi yi kone hi kola kwake, 39 ni leswaku ka mintxhumu hinkwayu leyi a mi ta voniwa nandzru ha yone hi ku ya hi Nawu wa Moxe, mun’wana ni mun’wana lweyi a pfumelaka a voniwa na a nga na nandzru hi kola ka wanuna lweyi. 40 Xileswo tivonelani leswaku leswi swi hlayiwaka ka mabuku ya Vaprofeta swi nga mi humeleli: 41 ‘N’wine vapoyili, lavisani ntizro lowu ni wu yentxaka a masikwini yenu, lowu i ntizro wa ku a mi nge ti txhuka mi wu kholwa, nambiloko mhunu wa kukazri a ngo mi tlhamuxela hi wunyaminyami. Kambe mi ta hlamala mi tlhela mi suva.’”
42 Nkama lowu Pawulo na Barnaba va humaka, vhanu va va kombela leswaku va tlhela va khanela hi timhaka leti ka Savata ledzri landzrelaka. 43 Xileswo ntsrhaku ka loko ntlhanganu wu helile a sinagogeni, a Vayuda vanyingi ni vaprozelita lava a va gandzrela Xikwembu Nkulukumba va landzre Pawulo na Barnaba lava loko va vulavula na vone va va kutxiki kuva va tama va va ni timpswalu letikulu ta Xikwembu Nkulukumba.
44 Hi Savata ledzri landzreliki ntalu wa vhanu va doropa ledzro va hlengeletana akuva va yingiseta zritu dzra Yehovha. 45 Loko Vayuda va vona switsrhungu, va tala hi matsrhoho va sungula ku khanela ku biha va soholota mazritu lawa Pawulo a a ma hlaya. 46 Kutani Pawulo na Barnaba va va byela na va nga txhavi ntxhumu va ku: “A swi vileleka kuva zritu dzra Xikwembu Nkulukumba dzri zranga dzri byeliwa n’wine. Kambe leswi mi dzri yalaka mi tlhela mi kombisa leswaku a mi faneliwi hi wutomi lebyi nga helikiki, hi ta ya ka vamatiko. 47 Hikusa Yehovha a hi lelete a ku: ‘Ni mi hlawule leswaku mi va livaningu ka vamatiko, akuva mi ta tisa huluku a misaveni hinkwayu.’”*
48 Loko vamatiko va yingela leswi, va nyonxa va dzrumisa zritu dzra Yehovha, nakone hinkwavu lava kombisiki leswaku va swi djula ku kuma wutomi lebyi nga helikiki, va ve vapfumeli. 49 Handle ka leswo, a zritu dzra Yehovha a dzri hangalasiwa a mugangeni hinkwawu. 50 Kambe a Vayuda va hlohlotela vavasati va ndhuma lava a va txhava Xikwembu Nkulukumba kun’we ni vavanuna va ndhuma va doropa, kutani va xanisa Pawulo na Barnaba va va hlongola doropeni dzravu. 51 Xileswo Pawulo na Barnaba va mphumuna ntsrhuzri a minkondzrweni yavu swanga ndlela ya ku va ba ndleve, va gama va suka va ya a Ikoniya. 52 A vadondzrisiwa va ye mahlweni va nyonxa va tlhela va tala hi moya wa ku xwenga.